रोमी 13
13
सरकारए ओकानुन भैंःन्या
1प़ाइँ ज़ घेप्पा हक दैवराए धूँल उलिरक। हक भरी ओल परमेस्वरनी ज़ हुज़्या। हक दैवर मनी परमेस्वरए ओराखतैवर ज़। 2है जैद हक दैवराकिन जो तँदा जैसिज़्या, हो परमेस्वरए ओपाँकिन तँदा ओजैसिउ मिताव ज़ लिज़्या। नितावराए परमेस्वरनी सजा दैन्या लेर। 3चाव य़ेन दाज़्यावर हक दैवराए ल्योनी छे·व मापरिए, माचाव य़ेन दाज़्यावर वाज़ छे·व परिज़्या। है जैद हक दैवरालाई रँःद माछे·द लिन्या ताकिन चाव य़ेन ज़ दोव ताके। हो ताकिन ची सजाए ओपोल ‘स्याबास’ दैन्या जेले। 4होए जेजूँनी परमेस्वरए ओखतैव य़ेन दोज़्याव। है जैद माचाव य़ेन दान्यात छे·च्यो। हक दैव मिँए ओतरवाली अइज़ सतैंद नैसिउ वाज़ माःक, परमेस्वरए ओय़ेन ज़ दोज़्याव। माचाव य़ेन दाज़्यावए ओक्याँत परमेस्वरए ओसजा सयो·दिज़्याव। 5है जैद हक धूँल ल्यो ज़ परिके — खाली सजा रँःद वाज़ माःक, ‘आव य़ेन ज़्यासो ज़ लिज़्या’ लिद दोव ताके। 6सरकारए ल्योदा सिर्मा जेफो·क ब नो पाँ चेतैव ताके। सरकारए ओय़ेन दाज़्यावराए प़ाइँए जूँनी परमेस्वरए ओय़ेन ज़ दोज़्यार। 7है जैद याव परिन्यालाई एचिके। सिर्मा फो·न्याल सिर्मा फो·चिके, दोरो फो·न्याल दोरो फो·चिके, छे·व परिन्याल छे·चिके, मान नैव परिन्याल मान नैचिके।
छुतलाई समारिन्यानी ज़ कानुन यो·ज़्या
8काताए ओभार धूँल ब तालिच्यो। खाली जे जेल खैद समारिसिन्या भार वाज़ ओताक। छुतलाई समारिन्यानी परमेस्वरए ओकानुन ब यो·ज़्या। 9परमेस्वरए ओकानुनल, “अर्काए ओज्याए ल्योदा माबान्या, मिँ मासैःन्या, माकुन्या, लोभ मादान्या,” लिद सर्सिउ लिज़्या। आव पाँर स़ोनो उपुर्काव कानुनलाव पाँ भरी ओपो·स ज़ आव तोबो पाँत थोम्सिज़्या — “जेक्याँलाई किताव जेसमारिज़्या, छुतलाई ब हिताव ज़ समारिउ ताके।”#प्रस २०:१३-१५,१७; ब्य ५:१७-१९; लेबी १९:१८ 10छुतए ल्योदा उयुँ थू जैद समारिज़्याव मिँए सुलाई ज़ माबले·व। है जैद छुतलाई समारिन्यानी ज़ कानुन भरी यो·ज़्या।
नम सँन्या बेला हुद ले
11है जैद बेला सैंद, है ङादाचिउ भरी दोचिके। ङ़ल्द लिन्या माःक, सैंसिद लिच्यो। परमेस्वरए ओपाँल गेहुव छ्यामकिन ख्रीस उहुन्या छ्याम नजिक हुद ले। 12री कुधु बाधुके, नम सँन्या बेला हुके। है जैद चुम चुमोलाव य़ेन भरी ऱास्द ज़गैवलाव य़ेन दोव ताके। 13पलाँवल ओसहिज़्याव मिताव ओतह ल्यो य़ेन दोव ताके — तुबुरी दुलिद राउँनी झ्याउँ लिन्या ब माःक, मँःन्या ब माःक, पातर्या पातर्नी जैसिन्या ब माःक, कोभादा बान्या ब माःक, मी तूद इ़सिन्या ब माःक। 14बुरू नोए ओपोल गेप्रभु येसु ख्रीसए ओगे रैद, ङ़ादाङाव जेयुँ मानैधुद माचाव जेखिमो भरी वैंद उमिन सम़ैद्याव ताके।
Valgt i Øjeblikket:
रोमी 13: NKham
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.