रोमी 11
11
परमेस्वरए उमीं इस्राएलीरालाई माराऱासो
1हितावत मनी उमीं इस्राएलीरालाई परमेस्वरए माराऱासो। ङा मनी इस्राएली ज़, अब्राहामनिकाव बेन्यामीनए ओथोलाव मिँ ज़। 2परमेस्वरए ङ़ादाकिनकाव थ·रैद ओरानैज़्याव उमींरालाई माराऱासो। आवए उजूँनी धर्मसास्त्रलाव सर्सिउ एलियाए ओपाँ ब तखेप चिऊव ताके। नोए इस्राएलीरालाई रँःद बनै हार मानिद अइ लिद पाँके,
3“अ परमेस्वर, नअगमबक्तारालाई यारासैःकेर।
नँलाई चरैःन्या थानर ब यारातैःकेर।
बाँचिउ ङा वाज़ ङालिज़्या।
ङालाई ब सैःन्याए जूँनी खिमो ज़ नैनाज़्यार।”#१ राज १९:१०-१४
4परमेस्वरए ओजवाप फरी अइ लिद हुके,
“माःक, बाल देवताए ओसेवा मादोज़्यावर सात हजार ङामींर लिज़्यार।”#१ राज १९:१८
5हो मिताव ज़ आज्याल मनी इस्राएलीराए खार्ल परमेस्वरए ओदयानी ओराछाँतिउ उमींर अझ लिज़्यार। 6खाली नोर या यादोव य़ेननी मातार, परमेस्वरए ओदयानी वाज़ ताकेर। हिताव ओमाताव ताकिन दया ते अऩाकलाव ज़ तान्या ओल्यो।
7है जैद इस्राएलीराए यानी ज़ परमेस्वरए ओयेम खिम्द ते मादैकेर। याखार्लाव परमेस्वरए ओराछाँतिउराए वाज़ दैकेर। उपुर्कावर झन ज़ यायुँ खाव तानाके। 8धर्मसास्त्रल मनी इतावनी सर्सिउ लिज़्या —
“परमेस्वरए नोरालाई ङ़ल्द लिज़्याव मितावर ज़ याजैक्यो।
यामी लिज़्यावत ब मारँःधुर,
यार्ना लिज़्यावत ब माथैधुर।
आज्याल पै ब हिताव ज़ लिज़्यार।”#ब्य २९:४; यसै २९:१०
9हो मिताव ज़ दाऊद राजाए ब अइ लिद सर्द नैव,
“नोराए याभत्यार ज़ याघुर्धुम ओताक,
नोर नल ज़ तेद सजा ओदैरक।
10यामी मारैंःद छाम छामोर ओतारक।
नोराए यावाँः एकम्न्या घोंत्यासो ज़ उलिक।”#भज ६९:२२-२३
परमेस्वरए ओपाँ छुत जातलावरालाई ब ताके
11ङा जेलाई है ङादाचिज़्या, इस्राएलीर त़ुम्द धलिउका धलिउ याताव ते माःक। नोराए बुरू परमेस्वरए ओपाँ यामाभैंःवए परमेस्वरए ओपाँ छुत जातलाव मिँराए ल्योक ब हुके। ननी ज़ परमेस्वरए इस्राएलीरालाई यामी तून्या याजैक्यो। 12नोराए परमेस्वरए ओपाँ माभैंःद तँदा याबावनी परमेस्वरए ओअसिक संसार भरिल रा·सिद छुत जातलाव मिँराए ल्योक ब ओबावए, नोर या मनी याभैंःवत प़ाइँलाई झन ज़ चाव ताया।
13-14आव पाँ भरी जे यहूदीकिन छुत जातलाव मिँरालाई है ङादाचिज़्या। परमेस्वरए ङालाई जेल्योदा ओल ओपाँ सथैन्यात ओसाची परींद नैनाव। हो ताकिन कसा ङाभेरा यहूदीर जेस खिस्द यायुँ परमेस्वरए ल्योदा माफर्कैर लिद जेस ङादोज़्याव य़ेन नोराए याङ़ाक बनै ङासघ्योःज़्या। 15परमेस्वरए नोरालाई ओराऱासोनी मानुवाताव मिँरालाई ओनैंर ओराजैवए, नो ओराऱासोरालाई फरी ओरारैकिन सिउनी ओरासोचोइव मितावर ज़ ताखेरहो।
इस्राएलीराए यासजा रँःद सघ्योःसिन्या माःक
16मुछिसिउ कनेनी तोचोप परमेस्वरलाई चरैःकिन कने भरी प़ाइँ ज़ चोखो ताज़्या। हिताव ज़ सींए ओजरा चोखो ओताकिन ओखार भरी ब चोखो ज़ ताज़्या। 17हितावत ब ख्वा यहूदीर जैतून सींए ओखारर च़म्सिउ मिताव ज़ लिज़्यार। जे छुत जातलावर फरी ज्याँलाव सीं स्यासोर जेल्यो। परमेस्वरए जेलाई रैद जैतून सींए ओक्याँत जोरैद ओरस दैन्या जैचिक्यो। 18है जैद नो ङ़ादाङाव खारराकिन जे तास॰च्यो। जे खारराए जरालाई अदैद जेनैज़्याव माःक, जराए ची जेलाई अदैद नैचिउ।
19जे है जेलिज़्याखेहो, “नो च़म्सिउ खारराए पोल परमेस्वरए गेलाई ची ओजोरैसिउ ओल्यो।” 20नो ते साचो ज़, नोर यायुँ ओमाहुबोए परमेस्वरए सींतिन याच़म्क्यो। खाली जे ते जेयुँ उहुबोनी वाज़ जोरैसिउर जेताके। है जैद जे छे·द लिचिके, तास॰च्यो। 21परमेस्वरए साचो ओखाररालाई बाँखी ओमारानैकिन जेलाई मनी बाँखी नैन्या माले।
22ननी ज़ परमेस्वरए उरिस ब रैंःज़्या, ओदया ब रैंःज़्या। नो च़म्सिउरालाई उरिस ताके, जेलाई ओदया ताके। खाली जे ओदयाल ल्यो ज़ ताके, म़ानी जेलाई मनी च़म्न्या ओछ्यास लिज़्या। 23नो च़म्सिउर फरी यायुँ उहुप्किन परमेस्वरए नोरालाई ङ़ादाङाव यापोल ज़ जोरैधुन्या ब ले। 24जे छुत जातलाव ज्याँलाव सीं स्यासोरालाई रैद चाव सींए ओक्याँत ओजोरैचिउए, साचो ओखाररालाई झन या यासींत कै जैद माराजोरैवके?
इस्राएलीराए परमेस्वरए ओयेम दैन्या लेर
25अ ङानैं ङामेंर, जेलाई तोबो कप्सिउ पाँ सतैंद ङायाचिरिज़्या। नो पाँ जेसैंकिन यहूदीराकिन सघ्योःसिन्या जेमाले। नो पाँ आव ज़ — परमेस्वरए ओराज्याल छुत जातलाव मिँर यामादुमा पै वाज़ इस्राएलीर परमेस्वरए ओपाँकिन तँदा तान्या लेर। 26हाःकिन इस्राएली भरिए परमेस्वरए ओयेम दैद बाँचिन्या लेर। धर्मसास्त्रल मनी इताव सर्सिउ लिज़्या,
“बाँचैज़्याव सियोननी हुरिज़्या,
याकूबए ओथोनी अधर्मलाव य़ेन भरी ब हाइद्यान्या ले।#यसै ५९:२०
27ङा नोराए यापाप हाइद ङारायोत
ङाबाचा भरी नत ज़ यो·न्या ले।”#यसै २७:९; यर ३१:३३-३४
28आज्याल ते नो इस्राएलीर आव गेरासथैज़्याव चाव थानी ते परमेस्वरए उसुतुर मितावर ज़ लिज़्यार। ननी ज़ जेलाई फाइदा ब ताके। खाली यासाखा पुर्खारालाई परमेस्वरए ओरायो य़ाकानी ते उयुँ नावर ज़ लिज़्यार। 29परमेस्वरए ओय़ाकालाई खर्क ज़ फिस्को माजैव, ओराछाँतिउ उमींरालाई ब माराऱासो।
इस्राएलीरालाई ओराऱासो ओलेखा ल्यो ज़ ताके
30ङ़ादा जे छुत जातलाव मिँराए परमेस्वरए ओपाँ जेमादोज़्याव। हितावत ब इस्राएलीराए परमेस्वरए ओपाँ यामाभैंःवए जे परमेस्वरए ओदया दैन्यार जेताके। 31नोर मनी परमेस्वरए ओपाँ यामाभैंःदी ब, जे परमेस्वरए ओदया जेदैवए तछा नोराए मनी दैन्या लेर। 32परमेस्वरए ओदया सतैंन्याए जूँनी प़ाइँलाई यामन लागिउदा तखेप याऱास्ज़्याव।
33परमेस्वरए ओगहक उबुद्धी बनै अचम्बलाव लिज़्या। परमेस्वरए ओथ·रैव पाँलाई सुए ज़ मापल्तैधुर, ओदोज़्याव य़ेन ब सुए ज़ माथ·रैधुर।#यसै ५५:८ 34धर्मसास्त्रल ब अइ लिद सर्सिउ लिज़्या,
“परमेस्वरए उयुँलाव पाँलाई थ·रैन्या सु ची उलिज़्यावदा?
नोलाई सल्ला यान्या सु ची उलिज़्यावदा?”#यसै ४०:१३
35“परमेस्वरए सुए ल्योनी ची लोस्द लोइ धूँल उलिज़्यावदा?”#अयू ४१:११
36ताज़्याव भरी ओल ओल्योनी ज़ ताज़्या, ओल उजूँनी ज़ ताज़्या, ओल उमींर ज़ ताज़्या। है जैद परमेस्वरलाई खर्क ज़ माखेम्न्या ज़गै मगैव ओताक। आमेन।
Valgt i Øjeblikket:
रोमी 11: NKham
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.