Esita 5
5
Esita alaanga omutuki neende Hamani hu sidyaalo
1Hu ludaalo lwa hadatu olw'ohusiiba, Esita yefwaala engubo chae koti omuhasi w'omutuki mani n'achia niyeema mu lwaanyi lwomuukati bweene mu dooho ly'omutuki, n'atingaalire esiseenge sy'esisaala sy'obwaami. Omutuki oyo yali naali mu bweene omwo, niyehaale hu sisaala sy'obwaami, yesi n'atingaalire ena mulyaango. 2Mani omutuki niyabona Esita niyeemere erwaanyi, yamuhalaka omwooyo, mani n'amusiingisiraho endabuhi y'obutuki y'esaabbu yae. Esita yasuda aambi mani n'adiira hu busoonjo bw'endabuhi y'omutuki. 3Omutuki oyo yateeba Esita ati, “Siina syeene, si ewe omuhasi waange Esita odaha? Mboolere esyo syoosi syooba n'odaha, mani huholere, kata syahaba esituundu sy'obwaami bwaange.”
4Esita yamukobolamo ati, “Nikali mbwe sihusangaasa ewe ow'Oluyaali, fukiirira wiichie olwoleero neende Hamani hu sidyaalo si ndi ohuhutekehera.”
5Omutuki mani n'alagira ati Hamani yeeche yaali bwaangu, boombi achie bakeniyire Esita. Mani omutuki neende Hamani nibachia hu sidyaalo sy'engoloobe si Esita yali n'amutekeheere. 6Nibali nibang'wa efiini, omutuki yateeba Esita ati, “Mboolere sy'osaba mani ochia ohusinyoola. Haandi sy'odaha syoosi njia ohusyooseresa, kata syahaba esituundu sy'obwaami bwaange.”
7Esita nae yakobolamo ati, 8“Nikali mbwe ewe ow'Oluyaali oli neende esisa esy'ohuumberesa esyo syoosi si mba njia ohuhusaba, ndaha ewe neende Hamani mube haandi abakeni baange muchuli hu sidyaalo siindi si njia ohubatekehera. Muchuli nilwo lu njia ohuhola koti lu oboolere. Njia ohuhuboolera esiindu si ndaha.”
Hamani ahoba ohwiita Modekai
9Hamani yatula hu sidyaalo n'asangaalire muno haandi niyeehoya mu mwooyo. Nae niyabona Modekai naali hu mulyaango kwomuukati okw'edooho, haandi Modekai niyahaya ohusiingira, neende kata ohweekesaho esilolero syoosi esy'ohumwiisamo oluyaali n'abitaao, Hamani mani n'amunyoolerera muno. 10Hamani mani niyetuka mu mwooyo, niyekobolerayo engo wae. Ao mani Hamani n'alaeche engo wae, haandi n'alaanga omuhasi wae Seresi yesi abediireho. 11Hamani yabehudumbasiraho koti lu ali omuyiinda, koti lu ali neende abaana basyaani baangi, koti lu omutuki amuhusire yaamuniinisya hu ngaasi ly'aakulu, haandi koti lu ali omuundu w'oluyaali muno ohuhira abahunuufu baandi boosi mu bwaami bw'omutuki. 12Hamani yemeeda ohuboola ati: “Haandi esihira byoosi, omuhasi w'omutuki Esita alaangire ese syeeng'ene ohuchia neende omutuki hu sidyaalo sy'atekeehe. Haandi neende muchuli atulaangire hukoboleyo hu sidyaalo. 13Nae bino byoosi haba sibihoonya daawe, nisibona Modekai Omuyudaaya oyo n'asihaale hu mulyaango kw'edooho.”
14Omuhasi wae Seresi alala neende abeecha bae boosi nibamuberesa amakesi bati: “Yoombaha esimikiro esy'emiita amahumi kabiri neende chibiri obuleeyi, mani muchuli echuli osabe omutuki, bamikireho Modekai afwe ao mani onyale ohuchia hu sidyaalo n'osangaalire.”
Hamani yesi n'abaasa ati ako kali amakesi malai, mani niyoombaha esimikiro.
©Bible Society of Kenya, 2019
©Bible Society of Uganda, 2019