Loma 5
5
Macikaop ji Ama ta do to
1O na abnekan jyaten ni Ama ta do to a abo so raraten do tangain na am ta ipeyhanhan si Yeso Kizisto a Panirsirngen ta. So ikanoyong ta rana macikaop ji Ama ta do to. 2O ta ikakman sang sicyaikwaya am pangangarilawan na ni Ama ta do to, do ta kapeyhanhan ni Kizisto. Am ori o ikasaray ta, ta katenngan ta o kahap na jyaten ni Ama ta do to do teyngato a macikasaray do azwazway na. 3Tana amyan so alalaw ta am masaray ta. Ta ori ipakateneng ta rana do ahapan ta sya no myan so alalaw ta. 4Ta si myan rana so peyneynaran ta sya do alalaw ta am mowyat ta na so onowned a omnanala so itoro na jyaten ni Ama ta do to sarasaray ta, 5do kapeyhanhan ta ni Ama ta do to a mangononong do mina ciring na jyaten. Ta o Seyzi a nitoro na jyaten ni Ama ta do to am ori o yaomoyat do onowned ta a makateneng ta do pangangarilawan na ni Ama ta do to.
6No kakwa pa am abo oyowyat ta a komaro do peyraratenan ta. Am kanimangozay na jya ni Kizisto do nipamnekan ni Ama ta do to a araraw a mangay mawakwak nyaten. 7Yabo o tao a mawakwak no icyatatao na. Am ala yamyan so mawakwak no apiya so ahahapan sya tao. 8Am no kapeyraraten ta pa am nikawakwak na yaten ni Kizisto. Ori rana am yongkad na ori ni Ama ta do to, do na karilaw nyaten. 9No ta manoyong rana a yanimavonas so raraten no rala ni Yeso Kizisto am abneken na rana yaten ni Ama ta do to a abo so raraten do tangain na. No si akman sang am maliklik ta o peyoyaoyyan na ni Ama ta do to no makwa. 10No kakwa am abo o kasngesngenan ta ji Ama ta do to. Am mina kawakwak na nyaten no Anak na. Am ori o ta na ipacikaop ji Ama ta do to. No manoyong o akman sang am jyabo kaji na ngahapan jyaten a. Ta si Yeso Kizisto rana am yamyan do teyngato a yasomidong jyaten. 11Tamo isaray ji Ama ta do to o na kanimapanop jyaten ni Yeso Kizisto ji Ama ta do to. Am ori o yata ipacikaop ji Ama ta do to. So ta na ikasaray do yana kanimahap ni Kizisto so vazay na ni Ama ta do to a yasomidong jyaten.
Si Adam a kani Kizisto
12Si Adam o yapwan no raraten do karawan. Am ori o nyangay na no inawan na do kapeyraraten na. Ori o nikapwan no kawakwak rana no tao do karawan. Ta yamamimin o tao a yameyraraten. 13No kabo na pa no nitoro na ni Ama ta do to a iwawalam na ji Moyse am amyan rana so raraten no tao do karawan. Am o raraten no tao am ji pa mancyan a raraten da, ta abo pa o iwawalam a pangozayan da. 14Am no kabo pa no iwawalam na ni Moyse am amyan rana so tao a mawakwak. Tana ji sira akman si Adam a ji niomamizing si Ama ta do to am akman sira si Adam a mawakwak, ta amyan so raraten da.
Si Adam am pehngehngain ji Yeso Kizisto. Am meytarek o pamoonen da do tao. 15Ta si Adam rana am nimeyraraten. Am ori o nikapwan no ikawakwak no tao. Am si Yeso Kizisto am tey mangarilaw, ta nikawakwak na o raraten no tao. O akman sang a pangangarilawan na ni Ama ta do to a yana nitoro do aro a tao am yabo tonggal na. 16Meyraraten si Adam. Am ori o iyan no raraten no tao a mangay do kararatan. Am o meyhanhan ni Yeso Kizisto a tao am mavonas o raraten da, ta mahap da o pangangarilawan na ni Ama ta do to. Am ori o abnekan na rana sira abo so raraten do tangain na. 17So ikanoyong na no raraten na ni Adam a yapwan no ikawakwak rana no tao. Am arakorako pa o pangangarilawan na ni Ama ta do to a kani Yeso Kizisto a yamapeyvaliw jyaten a abo so raraten do tangain na ni Ama ta do to a manta nyaten so to meyyonong a ikavyay no pahad ta.
18So ikanoyong na no raraten na ni Adam a yapwan no kapeydedna no oyaoyyan na ni Ama ta do to do tao do karawan. Akman sang, ta o kapyapya na ni Kizisto am ikamimin no meyhanhan nya tao a mavonas rana so raraten a ipakahap da rana so to meyyonong a ikavyay no pahad da. 19Yakman sang o aro a tao a omamoon so raraten ni Adam. Am kanyahap na rana ni Yeso Kizisto so vazay ni Ama ta do to a mawakwak no raraten ta. Am ori o ikamimin no tao a meyhanhan nya abneken na ni Ama ta do to a abo so raraten do tangain na.
20O nitoro ni Ama ta do to a iwawalam na ni Moyse am ipakateneng no tao do raraten da. Am tana akman sang am arakorako pa o aryarilaw na jyaten ni Ama ta do to. 21No kakwa pa am niharag no raraten o tao do karawan. Am ori o ikamimin da mawakwak no tao. Am o pangangarilawan na ni Ama ta do to am na nitoro do meyhanhan nya tao. So ikamimin da rana vonasen na so raraten. So ipakahap da rana so to meyyonong a ikavyay no pahad da, do da kanoyong ji Yeso Kizisto a Panirsirngen ta.
Valgt i Øjeblikket:
Loma 5: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan