Loma 12
12
Iyangay no mahap so vazay na ni Ama ta do to
1Manga kakteh, ko vavagan inyo an. Ta yatey rako na kasyan nyaten ni Ama ta do to. Am ori o torwan nyo no kataotao nyo a italamozong na a komaro do raraten nyo. Ta ori sarayan na ninyo ni Ama ta do to a meyngongyod so onowned a amraralay nya. 2Ji nyo to panwanoda o kataotao nyo do yamarahet so yahahapan sya tao do karawan. Ta apyapya pa o kablis na so onowned nyo ni Ama ta do to. Ta ori o ipakateneng nyo do apya nakenakem na jinyo ni Ama ta do to a kano isaray ni Ama ta do to a vazay.
3Yaken rana a nipamnekan ni Ama ta do to a lamlamsoy na a nipantan na so aryarilaw na am ko vavagan inyo. Ji nyo pahamaha o kataotao nyo. Ta to nyo palololwa o ahahapan nyo so kataotao nyo do na nitoro jinyo ni Ama ta do to a teneteneng nyo. 4O makakaday a peyvongvongwan ta am ori o ta ikamaog a yasa ka tao. Am yameykataretarek o vazay da no peyvongvongwan ta. 5Yakman sang, ta tana tamo aro a tao am tamo akmey asa ka tao ji Yeso Kizisto a yamacisidosidong.
6Na ikarilaw yaten ni Ama ta do to a nimanta nyaten so meykataretarek a teneteneng ta. Am ori o pangozayan ta do teneteneng ta a nitoro na jyaten ni Ama ta do to a somidong so akma tey kakteh do cinai. No teneteneng a mangononong so ciriciring na o nitoro na jyaten am pangozayan ta o nakenakem ta si Ama ta do to a mangononong so ciriciring na. 7No panidongan ta o na nitoro jyaten am manidong ta so tao an. No na nitoro jyaten o ikateneng ta mangnanao am mangnanao ta so tao an. 8No manvavaga o nitoro na jyaten am vavagan ta o icyatatao ta an. No mazonos o nitoro na jyaten am ji ta mangbeywan do icyatatao ta an. O meypanirsirngen am ji maciziziknai o vazay an. No mangarilaw so tao am masaray onowned.
9Beken a hapet no onowned o ipangarilaw so tao. Ji nyo akzan o marahet a vazay, ta o kahap nyo so apiya vazay. 10Masicyakarilaw kamo an. Ta inyo rana am akmey meyketeketeh kamo do tangain na ni Kizisto. So ipasikakanig nyo. 11Taosya o malma, ta kowyat nyo a meyvazay. Ahapen nyo o makdeng a nakenakem nyo a omahap so vazay na ni Ama ta do to. 12Masaray kamo a omnanala so na itoro jinyo ni Ama ta do to. Tana amyan so alalaw nyo am ji kamo ahayo a meynozi ji Ama ta do to. 13Sidongen nyo sira o makasi a tao a akma nyoy kakteh do cinai. Taotawwen nyo sira o minangilili a tao.
14Ipeynozi nyo sira o mapakakasi jinyo a tao. Ji nyo manircirngi sira o macioya jinyo a tao. 15Macikasaray kamo do somaray a tao. Macikalavi kamo do amlavi a tao. 16Peyyangangain nyo o tao a sidongen. Ji nyo pahama o nakenakem nyo, ta pehbowen nyo o nakem nyo. Ji kamo mapakateneteneng.
17Ji kamo mapatongtonggal. O ipanci no tao apiya vazay am ahapen nyo a peyvazain. 18Makapya kamo so nakenakem do icyatatao nyo. 19Ji nyo to meyneynakman o kapatonggal nyo do amwoya ninyo a tao, manga keypong. Cyaha, ta si Ama ta do to o mapasapa do dang. Ta maniring do Seysyo am, “Yaken o mapasapa do oyaoyyan da ninyo. Yaken o mapeyvazay so amwoya ninyo.”#12:19 Sen Ming Ci 32:35. Ori rana am ciring na no Panirsirngen ta. 20Maniring pa do Seysyo am, “No makcin o kavosoyan nyo am pakanen nyo sira. No mawaw sira am peyyopen nyo sira. Si akman kamo sang am to sira nasnek a manig ninyo.”#12:20 Tsen Yan 25:21-22. 21O marahet a vazay da jimo no tao am ji mo rata. Ta o apiya ahahapan mo sya am itovis mo do marahet a vazay da.
Valgt i Øjeblikket:
Loma 12: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan