Nimlivolivon 27
27
No kangay da ni Pawlo do Loma
1Ikongo do nipamnekan da no panipanirsirngen o kangay da ni Pawlo do Itadi, am ori o nitorwan da ni Pawlo a kano aro a nipteng da do mimong no itaysang no Loma a meyngaran si Sodian. 2So nisakay namen do avang a nimapo do Atamityan a mangay do Yasiya a pongso. Nimacihza jyamen si Aditako a tao do Tesalonicya. O ili rana am macinapnap do Maciton. 3Ikadwa na araw am makaranes namen do Siton. Ikongo do ikaglaw na si Pawlo ni Sodian, am ori o nipya na sya makarala a komala so kagagan na. 4Karwan namen do Siton am izasen na yamen no rako a pagpag. Am ori o ninanad namen a mangay a macimazeveng so avang namen do Saypolose a pongso. 5Peyhavasan namen o ili do Cidicya kado Pangveydiya am makaranes namen do Mila a ili a macinapnap do Dicya. 6Makaranes namen dang am macita ni Sodian o asa ka avang apo do Adisanta a meypangay do Itadi. Karahan am ipanci na yamen a somakay do avang ang.
7O avang rana ori am tey mapakeh a somongay. Am ori o nikahay namen a makaranes do Kenito, ta ji namen a sangoz o pagpag. Am ori o mina to namen meyhavasi do Kedite a pongso a to namen paninida o avang do kehtengan na. Mownay am makaranes namen rana do kananayan do Samoni. 8Pandan namen rana nimapaninid so avang namen, do kaji namen makasangozan sya. Mownay am makaranes namen do ngaranan da Tey yapya a minato. O minato rana am macinapnap do Lasiya ili.
9Makaranes namen rana dang am ilawden na. Am ori o nikainin namen. Maniring rana si Pawlo do aro a tao no avang am, 10“Manga keypong, ko citahen o palanginan am manginanawa ta no si meypangay ta. Jyabo kaji na kavan no avang ta. Ji na zyodan o aro a warawara do avang eya.” 11Am o mimong no itaysang a tao am apyapyahen na pa o kamizing na so mapasongay so avang a kano mapeyyavang sya. Ji na ngamiznga o ciring ni Pawlo. 12No ahemyan am masakboz na o minato ang. Am ori o to da lovoci no tao no avang a manci no kapasongay so avang, ta tey kakza da o kapakaranes da do Venici do Kedite a pongso. Ta tey meymatek o minato do dang a nanalan da so kapiya rana no kakawan.
Rako a pagpag do awa
13No kano nang am nimehteng pa. Am ori o ningingitan namen so ipanenbong namen a mangay rana. Am to namen paninida o avang namen do Kedite a pongso. 14So nikakeykai na nisangsang na. 15Karahan am sibsiblakan na o avang namen. Ori o ji namen makasangozi sya. So to namen panowji rana sya. 16Ikongo do nimacimazeveng namen do asa ka mahataw a ngaranan da so Kawtaw, ori o nikapya namen rana a mapasakay so tataloran. Karahan am pakedkeden namen rana do avang. 17Mateyka namen rana pakedkeden o tataloran am imatkan namen no ovid o avang namen. Ta ihawa namen a makava. Ikongo do ikanyahey namen o avang a mangay somahag do kananayan do Siarti, am ori o nipakarwan namen so rako a vilad namen, kato namen rana macyocyozayan do angayan na nyamen no pagpag. 18Ikongo do ji na heman no kakawan, am ori o to namen rana meywalici no karwan no warawara do avang do ikadwa na araw. 19Ikatlo na araw am ji na pa ngehtengan. Am meywasik namen pa dang so maoran no avang ikarehmet na. 20Nimownay namen a jya nimakacita so araw a kano mata no hanit, do kaji na ablisan no hangin. Am ori o to namen rana macirierisi.
21Ikongo do tey mownay namen a jya nimangakaday, am ori o nipeytatanek ni Pawlo. Maniring am, “Kokay kamo. No nyamizing nyo o ciring ko asyo do kaji ta pasongayan sya do Kedite a pongso am jyabo ta mina kakman sya yamakavakava so avang a. 22Am ko ipanci pa jinyo am ji kamo anyahey. Ta apya tamo. Am o avang ta ya am todabo rana makavakava. 23Ta si Ama ta do to rana a yako iraralay am nimanovoy so tinsi na no kamahep a yamanci nya jyaken. Yamaniring jyaken am, 24‘Mo Pawlo, ji ka onib. Ta manoyong o kangay mo do tangain na ni Kaysa. Ta na rana nimamizing ni Ama ta do to o inozi mo. So ikamimin nyo a apzatan na so kataotao do avang eya.’ Ori o ciring na jyaken no tinsi. 25Am ori o ji nyo anyahei, manga keypong an. Ta ko anoyngan si Ama ta do to a mangononong do ciring na jyaken. 26Cyaha, ta amyan so asa ka likta pongso a kazadawan ta.”
27Ikapat na so icyarwa (14) no araraw no niyan namen do karakwan no awa am to na rana pavyota yamen do meyngaran so Yatediya awa. Avak no ahep am ipanci da no tao no avang o kasngen namen rana do pamsan na. 28Paliwaten da o ovid a iktokto da do kararahem no awa am to ngyan so ikasi kapat na (40) anet no kararahem na. Ipirwa da aktoktwan am to ngyan so ikasi katlo na (30) anet. 29Ikongo do ikanyahey da kasahag no avang, am ori o nipakasan da so apat a ka ipanenbong namen do maoji a omapanala so karaw na. 30Ikongo do meykagcigcin sira o tao no avang, am ori o nipagcinan da so tataloran da. Am o karwan da am mangay sira do morong na akmey mapagcin so ipanenbong. 31Am maniring si Pawlo do mimong no itaysang a kano macilolo jya itaysang am, “No si somaway sira ito am jyabo kavyay ta.” 32Am ori o nikteban da sya no itaysang so ovid no tataloran a kahatahataw na meyparai do avang ang.
33Meyzengazengang rana am ipanci na sira ni Pawlo a koman. Maniring jira am, “Kamo kapat rana so icyarwa so araraw a yajya nimangakaday do nyo kalaw. 34Sijya kamo rana, ta koman ta na. Ta ori o iyan no oyowyat nyo. Cyaha, ta apya ta.” 35Teyka na o ciring na am mangap si Pawlo so myanpaw a kasaray na nya ji Ama ta do to do tangain da kakcikcil na sya kanen. 36So ji da na mogawi a koman rana. 37Yamen rana nimaoran do avang a tao am namen nanem so ikakawaowan so ikakatlwan na poo (276). 38Teyka namen rana koman am pipowa da rana o nimavezed a mogi, ta ihepaw da do avang.
Nisomahag o avang da Pawlo
39Penzak rana am ji da singkaji no tao no avang o pongso am macita da o kananayan. Ikakza da o kangay da mapanbong so avang da do dang. 40Karahan am akteben da o ovid no panenbong da kowvay da so ovid a iktan no savilak a kangingit da so vilad do morong na kapavyot na so avang do pasalan. 41Karahan am mangay somahag o avang namen a kaji na rana makapeygonagonayan a kakavakava no maoji na sibsiblakan na no rako azda.
42Naknakmen da no itaysang o kazakat da so nipteng da tao, ta ihawa da sira meyyawawat a somaway. 43Am o mimong no itaysang am ikarilaw na si Pawlo. So ji na nimyai sira amwakwak sira. Maniring rana do aro a aptengen da tao am, “Inyo rana yamakeykeyyawat am peyyawat kamo na mangay do pamsan na.” 44O macikavang jira tao am amyan jira so mangap so tapi. Amyan jira so mangap so oraoran no avang a peyyawatan da. Am ori o nikamimin namen rana nimeyyawawat a mangay do pamsan na.
Valgt i Øjeblikket:
Nimlivolivon 27: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan