1 Kedinto 4
4
Nipamnekan na ni Kizisto amlivolivon no ciriciring na
1Inyo rana am panadnaden nyo yamen a lamlamsoy na ni Kizisto a nipamnekan na ni Ama ta do to a meylimwang no ciriciring na an. Ori rana am ji da tenngi no tao no kakwa. 2O kakzeben no lawpan do lamlamsoy na am manoyong so onowned. 3Yaken rana am tana pacicin nyo yaken am tana pacicin da yaken no mapacicici so tao am to ko pa nazibwan o akman sang a vazay. Ta ji ko mancyan kapya na, karahet na no vazay ko. 4Yako jyatenngi o keyyan no ko karatan. Am yako ji mancyan o kabo na. Ta si Ama ta do to o manoyong a makateneng jya. 5Am ori an, ji nyo manamwaji so tao do ji na pa makaranesi no yai ni Kizisto. Ta si ipirwa mai si Yeso am ori o ipeytotwaw na rana no makakaday a nitayo a vazay a kano amyan do onowned no tao. No marateng rana ori am mamimin o tao a makahap so itoro na jira ni Ama ta do to a sarasaray da. Am palololwen na do mina vazay da.
6Manga kakteh, o ko pancyan no aro a vazay namen si Apolo am ipakateneng nyo do kaji nyo mapeycyakabanan so lamlamsoy na ni Ama ta do to akman so domket do Seysyo a ciring. 7Inyo rana mapakazwazway am sino ney mowyat na jinyo a makaharag so tao. Manngwa, nyo jyatenngi o yamakakaday jinyo a yamamimin a yapo ji Ama ta do to? Ikongo nyo peyzezwayan no nitoro na jinyo. Am ori o pavevehan nyo pa so nakenakem nyo an.
8Ala nyo ipanci o kabwata rana no yaji ngyangyan jinyo, a yarana makataptap so teneteneng a kano makakaday a itoro na jinyo ni Ama ta do to a akmey amyan rana do panirsirngen. Inaoy no si manoyong keyyan nyo do peypakarangan nyo a kapacikazway namen jinyo a panirsirngen. 9Ta no ko citahen am yamen rana nipamnekan na ni Yeso a amlivolivon no ciriciring na am yakmey nipazasing na yamen ni Ama ta do to do pakananaken a tao do karawan. Akman so nipamnekan da rana wakwaken a meyraraten a tao a ipeyyangwangongoyod da no tao do karawan a kano tinsi. 10Da ipanci yamen no tao do karawan a abo so kapsepsekan, do namen kapangnanao no ciriciring na ni Kizisto. Am inyo am nyo ipanci o kataotao nyo a mateneng a meyhanhan ni Kizisto. So nyo ikowyowyat pa ka nyamen. So da kolalahan jyamen a da kanig ninyo. 11Yato ngai sicyaikwaya o yanamen ipacikekcin a yamawaw a yamamez a abo so ayob a yamasangib a yada bakbakan a yabo so vahay, 12a yamowyat a yameyvazay a yamyaw no velek namen. So yanamen ikasangib a yada avain. Am namen ipeynozi sira. No yada peymetdehan yamen am namen to nazibwan. 13No yada yamen pasnesneken am namen tovisan sira no apya a ciriciring. Na kai sicyaikwaya no yada pancyan nyamen a akmey ibeybek no karawan, abo so angangayan a tao.
14O yako vatvatkan do yakman sang a ciriciring am beken a ko ipasnesnek jinyo, ta yako ipeypakatkat jinyo akma koy anak. 15Tana todaro tao amnanao jinyo a mapeypahagnat so nakenakem nyo ji Kizisto am asa saon o ama nyo am. Ta yaken rana am nipeylimwang ko jinyo o Mapasaray a Ciriciring na ni Ama ta do to. So yako icyakmey ama nyo a omanoyong ji Yeso Kizisto. 16Am ori o ko vavagan jinyo a ominara jyaken. 17So tovoyan ko si Timotay a mangay jinyo do dang. Ta iya rana do ta raralayan ni Yeso am ney mowyat ori akma koy anak. So pazimanan na sya jinyo so ahahapan ko sya, do ko kararalay ni Yeso Kizisto. Ori rana am nipangnanao ko rana ori do peycyakyokyokayan na.
18Yamyan so yatatasa ka tao jinyo a yamapahama so nakem a yamanci no kaji ko rana nangayan jinyo do dang. 19Am no si apyahen na yaken ni Yeso a Panirsirngen ta am jyabo kapeyyahahay ko a mangay a tomita jinyo a. No si marateng rana o araraw no yangay ko jinyo do dang am jyabo kaji ko ankadan do vazay da kano ciring da no mapakazwazway a tao. 20Ta o tao rana a macikaop do italamozong na ni Ama ta do to am to rana cita do vazay da o oyowyat na ni Ama ta do to. So ji na makaneci no ciriciring da. 21Ikongo apyahen nyo a vazay ko si makaranes ko jinyo do dang. Manngwa, apyahen nyo o kaoya ko ninyo? No apyapyahen nyo o kasaray ko ninyo.
Valgt i Øjeblikket:
1 Kedinto 4: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan