Romanos 2
2
Judiokunapis Diosnejta juchachasqa kallanqankutaj
1Chayrayku, qanqa judío kashaspapis, mana ni imata kutichikuyta atinkichu, imaraykuchus wajkunata juchachaspaqa, qan kikillaykitataj juchachakushanki.#Mt 7.1; Lc 6.37; Jn 8.7. Qan wajkunata juzgashaspapis, kikillantataj ruwanki. 2Aswanpis yachanchej Diospa juicionqa millayta ruwajkunaj contranpi cheqa kajman jina kananta. 3Qanrí, chay jinata ruwajkunata juchachashaspa, qanpis kikillantataj ruwanki. Ajina chayqa, yuyankichu Diospa juicionmanta llusp'inaykita? 4Ajinata ruwaspa, qanqa Diospa qhapaj khuyakuyninta qhesachashanki, paciencianta, jatun munakuyninta ima. Manachu yachanki munakuynenqa Diosman kutirikunaykipaj qanta pusashasusqanta?#Ez 18.23; Sab 11.23; 2 P 3.9.
5Qanrí mana uyarikuyta munasqaykirayku, Diosman mana kutirikuyta munankichu. Chayrayku qan kikiykipaj k'araj phiñakuyta tantakushanki k'araj phiñakuy p'unchaypaj, maypachachus Diospa cheqan kaj juicion sut'inchasqa kanqa, chaypaj. 6Chaypacha Dios sapa ujman ruwasqanman jina qoponqa.#Sal 62.12; Pr 24.12. 7Allinta ruwaspa mana sayk'ojkunaman Dios wiñay kawsayta qonqa, pikunachus Diospa ñawpaqenpi jatunpaj qhawasqa kayta mask'anku, mana jayk'aj wañuyta ima, chaykunaman. 8Churanakojkunata, cheqan kajta mana kasojkunata, millay kajta ruwajkunata imarí, Diosqa k'araj phiñakuyninwan jasut'enqa. 9Jinallataj tukuy millay kajta ruwajkunapaj ñak'ariy, llakiytaj kanqa, ñawpajta judío kajkunapaj, qhepantataj mana judío kajkunapaj. 10Allin kajta ruwajkunapajrí kanqa Diospa ñawpaqenpi jatunpaj qhawasqa kay, sonqo tiyaykusqa kay ima, ñawpajta judío kajkunapajraj, chaymantataj mana judío kajkunapajpis.#Ro 1.16. 11Chayqa ajina, imajtinchus Diosqa runata mana uyanta qhawaspachu juzgan.#Dt 10.17; Ef 6.9.
12Mana judío kajkunaqa Moisespa kamachisqanmanta mana yachaspa juchallerqanku. Paykunataj chayman jina jasut'isqa kanqanku. Judío kajkunarí Moisespa kamachisqanmanta yachashaspapis juchallinku, paykunataj chay kikin kamachisqanejta juzgasqa kanqanku. 13Chayqa jina, imaraykuchus mana kamachisqata uyarejkunallachu Diospa ñawpaqenpi cheqan runapaj qhawasqa kanqanku. Aswanpis kamachisqaj nisqanta kasojkunamin cheqan runapaj qhawasqa kanqanku.#Mt 7.21; Stg 1.22,25. 14Mana judío kajkuna Diospa kamachisqanta mana rejsishaspapis, chay kamachisqata yachasqankuta yachayta qonku sonqonkoj nisqanta kasuspa, amapis ni jayk'aj Moisespa kamachisqanmanta uyarinkumanchu karqa. 15Ajinamanta paykuna imaynatachus purisqankuwan yachayta qonku, Diospa kamachisqan sonqonkupi qhelqasqa kasqanta, imaraykuchus kikin sonqonku paykunaman nin ruwasqanku allinchus kasqanta, chayrí juchachanapaj jinachus kasqanta. 16Chay jinaqa Jesucristomanta sumaj willayta willasqay yachachin Diospa juzganan p'unchay qayllamushasqanta. Chaypachataj Diosqa tukuy runakuna pakaypi ruwasqankuta Jesucristonejta juzganqa.
Judío kajkuna Diospa kamachisqanta mana kasusqankuchu
17Qanrí, judío kani, nispa jatunchakunki, jinataj kamachisqakunapi atinikunki, Dioswan kawsakusqaykimantataj runaykachanki. 18Jinallataj Diospa munaynin imachus kasqanta yachanki. Chantá aswan allin kajta ajllakuytapis yachallankitaj, kamachisqanejta yachachisqa kaspa. 19Qan ñawsa jina kajkunata makinkumanta jap'ispa, pusayta yuyanki, jinallataj laqhapi chinkasqa kajkunata k'anchayta atisqaykita ima. 20Yuyallankitaj mana yachayniyojkunata, jinataj wawa jinallaraj kajkunata ima yachachiyta atisqaykita. Qanqa ajinata yuyanki Diospa kamachisqannejta sumaj junt'asqa yachayta, jinataj cheqa kajta tarisqaykirayku.
21Ajinaqa, sichus qan wajkunaman yachachinki chayqa, manachu qan kikiykita yachachikunki? Wajkunaman mana suwakunamanta parlashaspa, qanrí, imaraykutaj suwankiri? 22Wajkunata ninki mana khuchichakunata. Qanrí, imaraykutaj khuchichakunkiri? Jinallataj lantikunata chejnikunki. Chaywanpis qanqa lantikunaj templonkumanta suwanki.#Dt 7.25. 23Qanqa Diospa kamachisqankunata yachasqaykimanta runaykachanki. Chaywanpis Diospa kamachisqanta mana kasuspa, payta p'enqaypi rikhurichinki. 24Chayrayku Diospa Qhelqachisqanpi nin: Qankunarayku mana judío kajkuna Diospaj millayta rimanku,#Is 52.5; Ez 36.20. nispa.
25Uyariway, ujta nisqayki: Moisespa kamachisqanta kasojtiyki, circuncisionqa allinpaj kasunki. Jinapis sichus kamachisqata p'akinki chayqa, circuncidasqa kasqaykeqa qhasi manakajlla. 26Chayrayku sichus mana circuncidasqa runa Diospa kamachisqanman jina ruwan chayqa, Diospa qhawayninpi pay circuncidasqapis kanman jina kanqa, amapis circuncidasqachu kachun. 27Chay jinaqa, pichus ukhunpi mana circuncidasqa kashaspa kamachisqata kasojqa qanta juchachasonqa, imaraykuchus qan kamachisqakunata yachashaspa, chantá circuncidasqa ima kashaspapis, Moisespa kamachisqanta p'akinki.
28Chantá pitaj cheqapuni judiori? Mana pejpatachus tatan maman judío kanku chayllachu, nillataj ukhun circuncidasqa kajllachu. 29Cheqapuni judioqa sonqon ukhumantapacha judío. Cheqapuni circuncidasqa kajtaj Santo Espiritunejta sonqonpi circuncidasqa kaj,#Dt 10.16; Jer 4.4; Ro 9.6-8; Flp 3.3. manataj qhelqasqa kamachisqanejtachu. Chay jina judiotaqa Diosmin allinpaj qhawan, amapis runa allinpaj qhawachunchu.
Valgt i Øjeblikket:
Romanos 2: DQDC
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Revisión Biblia Quechua Boliviano © Sociedad Bíblica Boliviana, 2017.