Ɛsta 9
9
Juu tena yo ba dɔma dɛ kpoo ba
1Adar korobie tɔpera fi dɛ atoro weeree tɔpere kooro aa do mmara ŋɔ, Júu tena pɛ nyoa dɛ́ yo ba dɔma. Dɛ ba dɔma la dɛ lii kɛ baa won yoo ba dɛ́ pɔ ba nɛ. Kɛ waa la berɔ berɛ. Juu tena la pɛ nyoa yo ba dɔma, dɛ pɔ ba nɛ. 2Juu tena baa lɔ bwɛɛre aa lɔ Kooro Sɛksɛs harɛre ta la bwa chemo kɛ, bá yo ba dɔma baa dɛ ba bá ha ba la. Nɛra la bɛlbwa ta wone puu ba yo, dɛkalkɛ wobobele aa lɔ bela la bwa nɛra dɛ ɔm ba. 3Hale harɛre la bwa nomonjena ne koranar ne nomonome baa chɔ harɛre nyoo, dɛ nɛra baa dɛ tomɛ kooro la bwa baa che Juu tena la habɔɔ, dɛkalkɛŋɔ ba bwa dɛ ɔmɛ Mɔdekae taeh. 4Mɔdekae berɛ nomonjen koodem bela, nomɛlbwa no o waa harɛre la bwa ta, asɛ o ta na dɛɛ dɔ kpeɡri saŋ bɛlbwa.
5Juu tena la kpɔ keri dɛ ka kpoo ba dɔma dɛ he ba. Ba ɛɛ ba ɡɛ bwa baa dɛ nyin. 6Koobwɛɛ Susa ɡbo ta la, Juu tena la kpoo nɛra lafraanue. 7Ba kpoo Pasandata ne Dalfɔn dɛ Aspata, 8ne Porata ne Adalia dɛ Aridata, 9ne Pamasta ne Arisai, ne Aridai dɛ Vaisata, 10baa ɛ Hamedata bibaa Heeman bibaala. Dɛ Heeman ɛ Juu tena dɔm. Kɛ Juu tena la ta ba komɛlbwa kpɔe kaa.
11Awola tenten la, ba baɡle nɛra baa kpoora koobwɛɛ Susa bela la kooro be. 12Kooro Sɛksɛs ŋɔ Ɛsta be ŋɔ, “Koobwɛɛ Susa bonɔ ɡbo, Juu tena la kpoo nɛra lafraanue, dɛ kpo Heeman bibaala fi ja. Dɛ he nyiŋaa, nɛra baŋwɛnɛɛ baa ba kpoora harɛre maa dɛ di kora a ta nɔ ta nɔ?” Dɛ berɛ bɔɔ Ɛsta ja ŋɔ, “Waane lole ń ɛ tɛɛ ja aa? Baɡle kon haa dɛ nyin ásɛ n ɛ tɛɛ.”
13Belaa Ɛsta chaŋo ŋɔ, “N naa, dɛ hɛɛ sɛoh waa, tɛ Juu tena baa lɔ Susa bonɔ ŋwɛnɛ kere ɡe ba ɛ ɡɛ baa ɛa fini nɔ, dɛ́ kpɔ Heeman bibaala fi la lala la ka saɡɛ daa ta.”
14Kooro no ɡɛ dɛ ɡel Susa tena no dɛ ɡel ba saɡɛ Heeman bibaala fi la. 15Adar korobie tɔpera fi dɛ anaarɛ wee la, Juu tena baa lɔ Susa la chemo. Ba kpoo nɛra lafraatoro bwɛɛ la ta ja, kɛ ba ta ba komɛlbwa kpɔe.
16Gɛ saŋ waa nɔ aa chiɡ Susa la, dɛ Juu tena baa lɔ harɛre la kabora ta ɡe chemo, dɛɛ kpa ba nyu. Ba kpoo ba dɔma kaɡboŋa fifraanuanɛ dɛ banue, dɛ dɔ ba te. Ba ta ba ɡe komɛlbwa kpɔe. 17Adar korobie tɔpera fi dɛ atoro taa waa nɔ chiɡ, asɛ o tɔperafi dɛ anaarɛ ta ba onɛ, dɛ di kwaa dɛ lɛ ba sie, dɛ kpɔ a ɡɛ tɔpere la berɛ ba tɔpejen.
Purim Tɔpejen dii
18Juu tena baa lɔ Susa la yoo tɔpera fi dɛ atoro ne fi dɛ anaarɛ la ta. Tɔpera fi dɛ anue wee la, ba ɡel yoi dɛ onɛ, dɛ di kwaa lɛ ba sie.
19A waa Juu tena baa lɔ bwɛjeɡre ta kpɔ a ɡɛ korobie la tɔpera fi dɛ anaarɛ wee la ɛ ba tɔpejen, dɛ di kwa dɛɛ lɛ ba sie, dɛ berɛ dɛɛ kɛ kwaa o ta.
20Mɔdekae chwerɛ waa aa chiɡa la bwa bil. O berɔ chwerɛ tɔne ka tɛ Juu tena baa soɡe Kooro Sɛksɛs harɛre bojaŋa ne bela aa bɛno bwa ta. 21O ŋɔ bá kpɔ Adar korobie tɔpera fi dɛ anaarɛ ne fi dɛ anue wee la ɛ tɔpejena dɛɛ dia bena bɛlbwa, 22dɛɛ lii tɔpera Juu tena aa lɛ ba te le ba dɔma nɔn ta, ne tɔpera ba suna dii aa ber ba silɛɛ, ba wii ɡe berɛ hɛɡra la. Mɔdekae ŋɔ, dɛ ba dɛ di tɔpera la aa, báa di kondikonjena dɛɛ lɛ ba sie, dɛɛ tɛ dɔŋa ne nyaara bwa kondikwa.
23Anomanta, Juu tena la teŋɛ waa Mɔdekae aa chwera tɛɛ ba la ta, dɛɛ di ɡɛ tɔpejena nɔ bena bɛlbwa. 24Gɛ tɔpera nɔ munii kɛŋɔ Hamedata bibaa Heeman waa ɛ Aɡaɡ naa, Juu tena bwa dɔm la, fa aa vɔrɔwa kɛŋɔ bá kpoo Juu tena bwa la. O bil daa dɛ na tɔpere baa kpɔ kpoo ba dɛ́ he ba kwaraa.#Yel 7:16 25Ɛsta aa la Kooro Sɛksɛs be dɛ ŋɔ Heeman vɔrɔwe Juu tena vɔrɔwa dɛ́ fee kpoo ba la, kooro do mmara dɛ ɡel Heeman liichɔɡa waa liira la ɡure o ɡbaɡba nyu ta, asɛ ba saɡɛ o ne o bibaala fi la. 26Anomanta, dɛ ba dɛ yerɛ ɡɛ tɔpere nɔ Purim,#9:26 Purim munii daa bila. O ɛ Juu tena tɔpejen baa dɛ di dɛ kpɔ dɛɛ lii saŋ Korowii aa lɛɛ ba le ba dɔma nɔn ta. tɔn Mɔdekae aa chwera ne waa aa puu ba la bwa wa. 27Juu tena la lɛo dawɛ ba nɛɛ kɛŋɔ, ba ne ba naanar ɛɛ nyiŋi kɛrɛdɛɛ, dɛɛ di ɡɛ tɔpera anɛ la bena bɛlbwa. Hale banɔ la baa wola Juu tena ɛɛ, dɛ kpɔ ba te ba ja ba nɛɛ la bwa jao. Asɛ baa dia ɡɛ Mɔdekae aa do ba, ne saŋ waa lea cheɡ tɛɛ ba la. 28Ba ɛa a chɔ kɛŋɔ, Juu tena ne ba naanar baa lɔ harɛre ne bwɛɛ bɛlbwa ta, Kooro Sɛksɛs aa di kora a ta la ɛɛ di ɡɛ tɔpera anɛ nɔ saŋ bɛlbwa dɛɛ la. A chɛ kɛ bá bwa won dɛɛ di a ɡɛ Purim tɔpera nɔ bɛlbwa.
29Anomanta, Abihel bihaah Ɛsta waa ɛ kooro haah la kpɔ kpeɡri waa dɔa la, asɛ Juu te Mɔdekae la chao, dɛ chwerɛ o Ɛsta ɡbaɡba tɔn dɛ bol Purim dii la wa, ásɛ a ɡel Mɔdekae tɔn nɛɛte la won ɛ toma kɛrɛdɛ. 30Mɔdekae bɔne tɔne la tɛ Juu tena baa lɔ Kooro Sɛksɛs harɛre lafa fifraanɛ dɛ anuanɛ la bwa ta. O chwerɛ tɔne la, dɛ do ba ɡbemba kɛŋɔ tɔpera aa lɔ sie nɔ baa dɔ deŋnesɔɔhnaa, 31dɛ́ berɛ ɡel a ɡɛ Purim tɔpera nɔ che kiŋkiŋ baa dia saŋ la Juu te Mɔdekae ne kooro haah Ɛsta aa doa tɛ ba ne ba naanar kɛŋɔ, ba fa aa cheɡ nyoa vɔwa ne suna dii tɔpera la. 32Ɛsta mmara la ɡelɔ ɡɛ baa dɛɛ di Purim tɔpera la che kiŋkiŋ, asɛ ba chwera do tɔn bini.
Valgt i Øjeblikket:
Ɛsta 9: mzw
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.