Matayo 5
5
Erĩkangĩrĩrya lya Yesu oko kitwa
1Neryo omugulu Yesu alangira esyondeko mwahetukira oko kitwa; neryo abere abĩkala, abiga buwe mobahĩka aho ali. 2Neryo mwatsũka erĩkangĩrĩryabo ati,
3Obutseme buli oko basĩ ko bali nʼobwaga bwa Nyamuhanga,
Kusangwa Obwami bwʼelubula ni bwabo!
4Obutseme buli oko bali nʼobũlĩge,
Nyamuhanga asyakĩranĩabo!
5Obutseme buli oko bʼomutima molo,
Nyamuhanga asyahabo ebyo alaga!
6Obutseme buli nʼabanzĩre kutsibu erikola ekitunganene ekyo Nyamuhanga anzĩre.
Kusangwa Nyamuhanga asyaha kyobo ndeke!
7Obutseme buli oko bakaganyira abandi,
Kusangwa Nyamuhanga asyaganyirabo!
8Obutseme buli nʼabʼomutima mubuya,
Kusangwa basyalola uku Nyamuhanga!
9Obutseme buli oko bakahĩra Obuholo:
Kusangwa Nyamuhanga asyahulabo mo bana buwe!
10Obutseme buli oko babĩrĩendererĩbwa busana nʼeritunganene,
Kusangwa Obwami bwʼelubula ni bwabo!
11Obutseme buli nenyũ omugulu abandu bakabatsuma nʼerĩbendererya, nʼeribalega omo mĩsĩndo yosĩ yʼebibi nʼamabehĩ busana nʼomwatsi wage. 12Mutseme, mutsange kutsibu, kusangwa oluhembo lwenyũ ni lungi elubula. Ko banendereraya batya abamĩnyererĩ ababya embere syenyũ.
Omũnyũ nʼekyakakala
(Mk 9.50; Lk 14.34-35)
13Ĩnywe muli mũnyũ wʼekihugo Nĩkwa omũnyũ amatalya obusi bwago, asyaswabana obusi bwago bwʼati kwehĩ? Ĩsyowene busana na kindu; lye nʼeriguswa eyĩhya inialyatangirirwa nʼabandu.
14Ĩnywe muli kyakakala kyʼekihugo. Omũyĩ owahĩmbĩre oko kitwa sialitoka erĩbĩsama. 15Sihali mundu oyũkakaya etala nʼerĩhĩrayo omwisi wʼekitiri; nĩkwa akahĩrayo oko mbaniko, neryo ĩyakolerya abosĩ abali omo nyũmba. 16Muleke ekyakakala kyenyũ kĩkoleraye kitya embere syʼabandu, balangire emĩbĩrĩ yenyũ mibuya, bapipe Tata wenyũ oyuli elubula.
Erĩkangĩrĩrya lyʼEmigambo
17Sĩmũganĩraye muti nasa erisangula Emigambo ya Musa nʼerĩkangĩrĩrya lyʼAbamĩnyererĩ. Mondasa erisangulayo, nĩkwa monasa erĩberereryayo. 18Kusangwa ngabũga nenyũ kwenene, nyiti, Erĩhĩka aho lubula nʼekihugo byasyahweraho, sihali akakwararĩ kutse katondĩ kʼoko Migambo akakandĩsyalũa oko Migambo erĩhĩka aho ebyosĩ byasyabererera. 19Neryo Omundundi oyo wasyaketa ekiguma kike kyʼoko mahano aya, nʼerĩkangĩrĩrya abandu atya, asyahulwa mo muke kutsibu omo Bwami bwʼelubula; nĩkwa Omundundi oyũkaberereraya nʼerĩkangĩrĩryabyo, asyahulwa mo mukulu omo Bwami bwʼelubula. 20Kusangwa ngababwira nyiti, Eritunganene lyenyũ lyamatendilaba eritunganene lyʼabakangĩrĩrya nʼeryʼAbafarĩsayo, simwendisyingira omo Bwami bwʼelubula.
Omwatsi wʼerihitana
21Mwabĩrĩowa ngoko abakera babwirawa ambu, Sũsyĩta; nʼoyũkĩta ali kʼomusango wʼeritswera. 22Nĩkwa ngababwira nyiti oyukahitana uku mugala wabo asyaletwa embere wʼomũtswerĩ, kandi oyũkabũga na mugala wabo ati, uwe mbulamugaso; asyabya nʼomusango embere wʼerĩbũgĩro lyʼabatswerĩ; nʼoyũkabũga ati, Uwe mũkĩrũ! Asyabya nʼomusango wʼeriya omo muliro wʼeKũlĩmũ. 23Neryo wamabya ukaleta olũsũnzo lwawe oko kiherero kya Nyamuhanga, ukibuka ngoko mũlĩkyenyũ ali nʼolubanza ukʼuwe, 24ũsĩganaye olũsũnzo lwawe embere syʼekiherero, ugende lũba uku mũlĩkyenyũ, musangane naye, neryo iwasa nʼerireta olũsũnzo lwawe uku Nyamuhanga. 25Usangane lũba nʼomũtsongerĩ wawe imukinagenda okwʼĩbũgĩro; omũtsongerĩ wawe siakutwale oko mũtswerĩ, nʼomũtswerĩ iniakuha oko mũpolĩsĩ, iwaguswa omo mũlĩkĩ. 26Kwenene ngakubwira, sĩwendĩsyalũa eyo ute waliha esengĩ eyikabugirira olubanza olo.
Erĩkangĩrĩrya busana nʼerĩsĩngĩra
27Mwabĩrĩowa ngoko kyabũgawa kiti, Susyesĩngĩra. 28Nĩkwa ĩngye ngababwira nyiti, Obuli mundu oyukasamalira omũkalĩ nʼengumbu nyibi iniamabimũsĩngĩra omo mutima wuwe. 29Nʼerĩso lyawe lyʼamali lyamaleka iwakola ebibi, ukuleryo, uguseryo! Kusangwa lyowene ukʼuwe ekĩtsũko kiguma kyʼomubiri wawe ikyahera kwilaba omubiri wawe gosĩ eriguswa eKũlĩmũ. 30Nʼebyala byawe byʼamali byamaleka iwakola ebibi, ũtwebyo, Ugusebyo! Lyowene ukʼuwe ekĩtsũko kyawe kiguma ikyahera kwilaba omubiri wawe gosĩ eriya omo Kũlĩmũ.
Erĩkangĩrĩrya busana nʼerikomola omũkalĩ
(Mt 19.9; Mk 10.11-12; Lk 16.18)
31Kandi kyabũgawa kiti, Oyukakomola mũkalĩwe, amuhe engomolo yʼerimuhiga. 32Nĩkwa ĩngye ngababwira nyiti, Obuli mundu oyukakomola omũkalĩ wuwe, butsira busana nʼomwatsi wʼerĩsĩngĩra, akaleka ĩnĩasĩngĩra, nʼomundu oyũkahĩkaya omũkalĩ oyuliakomolawa iniamasĩngĩra.
Erĩkangĩrĩrya lyʼerĩlahĩrya
33Kandi mwabĩrĩowa ngoko abandu ba kera babwirawa ambu, Susyelahĩraya nʼamabehĩ, nĩkwa wasyakola oko Mukama ebyo walahĩraya. 34Nĩkwa ngakubwira nyiti, Sũlahĩraye nʼahake; kutse nʼelubula, kusangwa nĩ kĩtũmbĩ kyʼobwami kya Nyamuhanga. 35Kutse sũlahĩraye nʼekihugo, kusangwa nĩ kĩtũmbĩ kyʼebisando biwe; kutse busana nʼeYerũsalema, kusangwa nĩ mũyĩ wʼOmwami Mukulu. 36Sũsyelahĩraya nʼomutwe wawe, kusangwa siwangatoka eriyira oluywiri luguma mo lweru kutse mo lwĩragũlũ. 37Nĩkwa erĩbũga lyenyũ libye, ega, ega, kutse iyihi, iyihi! Ebĩrengĩre ebĩ ni byʼomubi.
Erĩkangĩrĩrya busana nʼerĩkĩsya
(Lk 6.29-30)
38Mwabĩrĩowa ngoko byabũgawa biti, Erĩso busana nʼerĩso, nʼerĩno busana nʼerĩno. 39Nĩkwa ĩngye ngakubwira nyiti, Sũkĩsaye oyukakukolera nabi; nĩkwa oyũkakũswĩraya oko lĩtema lyawe lyʼamali, ũmũbindũkĩraye nʼerindi. 40Nʼomundu Oyukasonda erikutsongera, iniakaheka ekanzu yawe, uleke abye nʼerĩkotĩ ryawe nibya. 41Kandi omundu oyukakuhatikana eriya oko kilometre kiguma, ugende naye ebilometre bibiri. 42Kandi omundu amakũbũlya kindu, umuhekyo, kandi siguyĩloleraye oko yukasonda eriyibweka ukʼuwe.
Olwanzo busana nʼesyonzĩgũ
(Lk 6.27-28,32-36)
43Mwabĩrĩowa ngoko kyabũgawa kiti, Wanze mũlĩkyenyũ, ũkwe enzĩgũ yawe yʼobusu. 44Nĩkwa ĩngye ngababwira nyiti, Mwanze esyonzĩgũ syenyũ, musabire abakabendereraya, 45imwatoka eribya bagala ba Tata wenyũ oyuli elubula. Kusangwa, akahũlũkaya eryuba liwe oko babi nʼoko babuya, kandi akatuma embũla oko batunganene nʼoko batatunganene. 46Kusangwa mwamanza abasanzĩre, mwasyahemberwakĩ kwehĩ? Abasolesya sibekola batya kwehĩ? 47Kandi mwamabũkya abalĩkyenyũ basa, imwamakola ebĩrengĩre ebyʼabandi byo muti kwehĩ? Abʼebihanda sibekola batya kwehĩ? 48Neryo mubye abahĩkene, ngoko Tata wenyũ wʼelubula ahĩkene.
Valgt i Øjeblikket:
Matayo 5: KB80
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Bible in Kinandi © Bible Society of the Democratic Republic of Congo, and Bible Society of Uganda, 1980.