Nau Ntơm 3
3
Ntơm geh nau tih bunuyh
1Ntơm nơh geh du mlŏm bêh jêng mpômpa (siŭm) bri, păng blao rlăm nau rlao bu, đah ma mpômpa (siŭm) aƀă êng ta bri i Brah Yêhôva lĕ jêh njêng. Geh du nar bêh nây ôp ma bu ur i nây: “Hơi yôh, ngăn lah Kôranh Brah lah nơh: «Mâu ăn khân ay may sa play dâng lĕ ta mir dja?»”#NTM 12:9; 20:2 2Bu ur i nây ơh ma păng: “Lĭch ndri ôh, play ta mir dja Kôranh Brah ăn hên sa dadê, 3tơm play i nklang mir i nây du tơm dơm, Kôranh Brah lah: «Play tơm si i nklang mir i nây mâu ôh ăn khân ay may sa, mâu ôh ăn khân ay may pah, lah sa lah pah khân ay may mra khât ro», ndri lah pre nơh”. 4Bêh lah ma bu ur i nây jât: “Mâu khât ôh yôh, khân ay may mâu khât vă. 5Kôranh Brah Păng gĭt, lah khân ay may sa, măt mra ang, ri mơ dâng khân ay may jêng tâm ban ma Kôranh Brah nơm, gĭt năl ndơ ueh ndơ djơh đŏng ê̆”. 6Jêh ri bu ur i nây say play si i nây dŭm ueh ngăn, ŭch ma sa ro, păng kơnh geh nau gĭt blao i ri, n'ho ma tât păng pĕ sa. I sai păng gŭ đah păng nơm ta nây đŏng, jêh ri pă ăn i sai păng sa, i sai păng sa đŏng. 7Jêh sa play i nây, măt khân păng say ang ngăn ro, n'ho ma gĭt lah săk khân păng nơm gŭ lahôk đŏng, jêh ri khân păng pĕ n'ha Rvijâng tâm nkrêp jan bok gay ma mbăn săk jăn khân păng nơm.
8Tât nar vet nsrĭnh rĭnh nđik rngêt nây, khân păng tăng nteh Brah Yêhôva hăn brô̆ rŏ mir nây, khân păng du nchuăt krap ta nâm tơm si ta mir nây ro, gay ma lơi ăn Brah Yêhôva say.#NMƠ 139:7-10; Yêr 23:24 9Jêh ri Brah Yêhôva kuăl i sai ri: “Hơi Ađăm#3:9: «Hơi Ađăm», mâu lah: «Hơi bunuyh», ta nau ngơi Hêbrơ «Ađăm» rnha «Bunuyh» đŏng., ah may hiơ?”#2:7 10Păng ơh: “Gâp tăng May hăn rŏ mir nây, gâp klach nsŏr ngăn, yorlah gâp nơh gŭ săk lahôk dơm, kơt ndri dâng gâp krap Kôranh Brah mê”. 11Brah Yêhôva ôp jât: “Bu moh mbơh ma may, dâng may gĭt lah gŭ lahôk? Gĭt may geh sa play si i Gâp buay mâu ăn may sa nơh mâu?” 12Ađăm#3:12: «Ađăm», mâu lah: «Bunuyh». ơh: “Bu ur i May ăn gŭ ndrel gâp nơh, păng ăn play i nây ma gâp, jêh ri gâp sa đŏng”. 13Jêh ri Brah Yêhôva lah bu ur i nây: “Moh jan ay kơt ndri ri?” Bu ur i nây ơh: “Bêh de mƀrôh đă gâp sa, dâng gâp sa play si i nây nơh, Kôranh Brah mê”.#2Kô 11:3; 1Ti 2:14
14Brah Yêhôva lah bêh:
“Yor ma may jan nđay
Dâng lĕ mpômpa (siŭm) aƀă êng
I ta bri ta ƀon
Du mlŏm may dja Gâp rtăp ăn may brô̆ hung ma ndŭl
Ndrel ma sa ler neh
Du njăr nau rêh may.
15Jêh ri Gâp ăn geh nau tâm lơh may, đah bu ur i nây
Ndrel ma rnoi deh bu ur i nây, đah ma i kon sau may tay đŏng
Rnoi deh păng tay mra jot bôk may
Jêh ri may tay mra chôk rmăng iăr rnoi deh păng đŏng”.#NTM 12:17
16Jêh ri Brah Yêhôva lah ma bu ur i nây đŏng:
“Dôl ay gŭ oh Gâp ăn ay geh nau jêr hô rlao jât
Ay geh nau ji ndŭl hô ngăn ro
Nuih n'hâm ay mra ŭch ngăn mât bôk sai ay#3:16: «Nuih n'hâm ay mra ŭch ngăn mât bôk sai ay», mâu lah: «Nuih n'hâm ay ŭch sai ay hô đŏng».
Tih ma sai ay mât bôk ay”.#Êph 5:22-23
17Jêh ri Brah Yêhôva lah Ađăm đŏng:
“Gâp rtăp neh dja, mâu ôh ăn geh jêng
Yor ma may iăt nau ur may sa play bơh tơm si i Gâp mâu ăn sa nây nơh
Ndri dâng may joi ndơ sông sa pŏk neh rơah rgănh ăp nar du njăr nau rêh may.#Hêb 6:8
18Jêh ri may sông sa ndơ i hon lôh tă bơh bri bơh mir
Yơn ma neh hon rêp hon lok đŏng
19May jan kar lôh rhal pal mlay ngăn
Ri mơ geh ndơ sông sa ma siăm săk tât khât nkre ma lêk tay ta neh
Yorlah Gâp sŏ mon may nơh tă bơh neh môi
Kơt ndri may mra jêng tay neh môi kơt ơm đŏng”.#NMƠ 103:14; KNN 3:20; 12:7
20Jêh ri Ađăm tê̆ rnha ur păng i nây kuăl lah «Êva»#3:20: Ta nau ngơi Hêbrơ nteh rnha «Êva» tâm ban ma nteh «Nau rêh»., yorlah păng nơh i mê̆ dâng lĕ rngôch bunuyh. 21Jêh ri Brah Yêhôva sŏ ntô mpômpa (siŭm) sơm jan bok ao sơm nsoh ăn ma khân păng.
22Brah Yêhôva lah êng Păng Nơm: “Aƀaơ ri bunuyh jêng tâm ban ma Bân, lĕ gĭt năl ndơ ueh ndơ djơh, lah ndri gay ma lơi ăn khân păng geh nau rêh n'ho ro, lơi ôh ăn khân păng pĕ sa tay play tơm si ăn nau rêh”.#NTM 22:14 23Ndri dâng Brah Yêhôva ntrŭt mprơh khân păng du lôh bơh mir Êđen nây, ăn khân păng gŭ ntŭk êng, jan mir pŏk neh i Brah Yêhôva sŏ mon njêng khân păng nơh. 24Jêh ntrŭt mprơh khân păng du lôh bơh mir Êđen i nây, Brah Yêhôva ăn tông păr Chêrupin#3:24: «Tông păr chêrupin», păng i bunuyh du mpôl gŭ ta kalơ trôk, gŭ jan kar ma Kôranh Brah nơm., ndrel ma đao ŭnh rvao njrăng trong, kŏp bơh mpeh lôh nar mir Êđen nây, gay ma lơi ôh ăn bunuyh plơ̆ tay ta tơm si i ăn nau rêh n'ho ro.
Valgt i Øjeblikket:
Nau Ntơm 3: cmoL
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.