Populære bibelvers fra SAN MARCOS 11

Del

Lo'o jua'a̱ lcaa lo cha' nu ndijña ma̱ ji'i̱ ycui' Ni laja lo'o nchcui' ma̱ lo'o Ni, chañi cha' ta ycui' Ni cha' bi' ji'i̱ ma̱, si chañi cha' jlya ti' ma̱ ji'i̱ Ni.

Chañi cha' nu nchcui' na' lo'o ma̱ juani, cha' si chcui' ma̱ lo'o ca'ya re: “Tyu'utsu' nu'u̱, yaa xcua nu'u̱ nde lo hitya tyujo'o”, ñacui̱ ma̱, jua'a̱ cua'ni ycui' Ni lo'o ca'ya bi'. Jua'a̱ caca si chañi ji'i̱ ma̱ cha' jlya ti' ma̱ cha' caca sca cha' nu jña ma̱ ji'i̱ Ni, pana si ná jlya ti' ma̱ cha' nu nchcui' ycui' Ndyosi, ná caca bi' li'.

La cui' jua'a̱, lcaa quiya' nu lo'o ndu̱ ma̱ cha' chcui' ma̱ lo'o ycui' Ndyosi, ntsu'u cha' cua'ni clyu ti' ma̱ ji'i̱ tya'a ñati̱ ma̱, si ntsu'u cha' ngusu'ba ñasi̱' ngu' ji'i̱ ma̱. Li' ycui' Ndyosi Sti ma̱ nu ntucua nde cua̱, caca ji'i̱ Ni cua'ni clyu ti' Ni ji'i̱ ma̱ ji'i̱ cha' cuxi nu ntsu'u ji'i̱ ma̱.

―Nga'a̱ cha' jlya ti' ma̱ ji'i̱ ycui' Ndyosi ―nacui̱ Jesús ji'i̱ ngu' li'―.

Li' nda Jesús sca cha' lo'o ngu' jua: ―Ndi'ya̱ nscua lo quityi ji'i̱ ycui' Ndyosi cuentya ji'i̱ laa re: “Ni'i̱ su caca chcui' lcaa ñati̱ lo'o ycui' Ndyosi, jua'a̱ ñacui̱ ngu' cha' ji'i̱ ni'i̱ 'na, nacui̱ Ni”. Jua'a̱ nscua lo quityi ―nacui̱ Jesús li'―, pana juani, cua ngua'ni ma̱ cha' to' tyi ngu' cuaana laca ni'i̱ re ―nacui̱ Jesús ji'i̱ ngu' bi'.

Ngusi'ya ngu' nu ndyaa nde loo Jesús, ngusi'ya ngu' nu lijya̱ nde chu̱'; lye tsa ndyu'ni chi̱ ngu' loo Jesús: ―Cua'ni tlyu na ji'i̱ ycui' Ndyosi ―nacui̱ ngu'―. Culacua̱ ycui' Ni ji'i̱ nu qui'yu re nu lijya̱ lo'o chacuayá' ji'i̱ ycui' nu Xu'na na. Masi juani ti, cua'ni tlyu na ji'i̱ ycui' Ndyosi ―nacui̱ ngu'―.

Tso'o tsa si cua'ni tlyu na ji'i̱ yu re, cha' cua ngulala ti cha' caca ycui' Ndyosi loo ca nde. Li' caca ñi'ya̱ nu ngua lo'o ngua jyo'o cusu' David loo cua sa'ni la ―nacui̱ ngu'―. Masi juani ti, cua'ni tlyu na ji'i̱ ycui' Ndyosi ―nacui̱ ngu'.