Populære bibelvers fra 2 Corintios 5

Del

tan ab'il uva' at ve't ok k'atz u Cristo, as ak'nal ve't vitxumb'ale'. As kat sotzyu ve't vitxumb'ale' uva' eq'omalik sta'n sb'axa. As a' ve't u ak' txumb'ale' eq'omal sta'n cheel.

tan kat ib'an u Tiixhe' uva' k'uxh ye'l ipaav u Cristoe' ati, as Aake' kat eq'on u kupaave', ti' uva' la toksa ve't o' u Tiixhe' jikla aamail ta'n u Cristoe', jank'al o' uva' at ve't ok o' k'atz Aak.

As k'uxh ye'l Aak ni qile', as k'ujle'l chit kuk'u'l ti' Aak.

As u ak' txumb'ale' uva' eq'omal sqa'n cheel, as a' u Tiixhe' kat aq'on sqe, tan ti' vikameb'al u Cristoe' kat ik'ujb'a'kat kan u Tiixhe' uva' ye'l ve't kuxo'l tuk' Aak. As Aake' kat aq'on ve't qijle'm ti' kupaxsat u yole' uva' k'ujb'a'mal kan ta'n Aak. As a' u yole' uva' ti' vikameb'al u Cristo, as an kuxh u Tiixhe' kat b'anon uva' la uch tok unq'a tename' k'atz Aak. As ye'l ixo'l unq'a tename' tuk' Aak la ib'ane'. As la uchi uva' ye'l ve't ipaav unq'a tename' la toksa ve't Aak stuul. As Aake' kat aq'on kan sqe ti' uva' la b'en kupaxsa u yole', aq'al uva' la uch tok unq'a tename' k'atz Aak.

As o' b'anol ivatz u Cristoe'. As tul ni qal u yole', as eela kuxh stuk' uva' a' u Tiixhe' niyolone'. Esti'e' tuk' vib'ii u Cristoe' ni qal sete, enimataj u b'a'nla yole' ti' u Cristoe', ti' uva' ye'l exo'l tuk' u Tiixhe' la ib'ane'

As kat kam ve't Aak ti' unq'a tename' skajayil, aq'al uva' jit u kutxumb'ale' la qeq'ola tetz, jank'al o' uva' at kutiichajil k'atz u Tiixhe'. Pet a' ve't vitxumb'al u Jesúse' la qeq'ola tetz uva' kat kam sqi'. As kat ul taama Aak unpajte. Esti'e' uva' jit'e'ch ni qitz'a cheel ti' umaj uxhchil eche' uva' nik qitz'a b'axa, tul uva' ye'xnik ok o' k'atz u Cristo, tan a' kuxh unq'a vatz tx'ava'illa txumb'ale' eq'omalik sqa'n. As k'uxh ech nik qitz'a ti' u Cristo b'axa, pet ech koj cheel, tan jit'e'ch ni qitz'a ve'te' ti' Aak

As kam uva' nu kub'an sevatz, tan ti' uva' xo'n o' te u Cristo nu kub'ankat. As ootzimal ve't sqa'n uva' kat kam Aak ti' unq'a tename' skajayil. Esti'e' uva' vatz u Tiixhe', as kat ib'an u Jesús kuvaatzil skukajayil, ti' kukame' vatz u paave'.