Populære bibelvers fra Njé gə́ Pilibə 4

Del

Arje meḛ sí pélé wəs-wəs dɔ né gə́ kára kara el, nɛ né gə́ rara kara maji kar sí dəjije Ala gə tamaji lə sí ləm, gə ndòo gə́ seḭ raje ndòo rəa’g ləma, gə ta oiyo gə́ seḭ reaje ləm tɔ.

Bèe ndá meekulɔm lə Ala gə́ dum kḛji lé a kaḭ ŋgaŋ takə̰ji gə́ meḛ sí-seḭ gə́ ɔmje na̰’d gin Jeju Kristi lé.

Ŋgakɔmje, ges ta gə́ nai lé ɓa nee: Ta gə́ rara gə́ to gə́ kankəmta ləm, əsé riɓar gə́ maji gə́ rara ləm, əsé né gə́ rara gə́ to gə dɔ najee ləm, əsé né gə́ rara gə́ àr ŋgad-ŋgad ləm, əsé né gə́ rara gə́ taa kəm dəwje ləm, əsé né gə́ rara gə́ kəm ndigi sə dee dɔ’g ləma, əsé néje lai gə́ maji dum gə́ kəm kiŋga pidi ləm tɔ lé maji kar sí waje meḛ sí dɔ’g bururu ya.

Mbɔl dɔ yeḛ gə́ orəm més lé lé riri kara m’askəm ra ya.

Alje rɔ sí ta-ta gin Mbaidɔmbaije’g. Ma m’tel gə mba pa ya tɔɓəi, alje rɔ sí ya.

Mbɔl dɔ boo-nébaoje gə́ nduba rɔ dee rəa’g gin Jeju Kristi’g lé Ala ləm a kar sí néje lai gə́ seḭ awje ndòo dee ya.

Né gə́ ma m’ndoo sí ləm, gə́ ma m’ar sí ləm, gə́ seḭ ooje tam’g ləma, gə́ seḭ ooje rɔm’g ləm tɔ lé maji kar sí raje née ya. Bèe ɓa Ala gə́ njeyelko meelɔm lé a nai sə sí ya.

Maji kar dəwje lai gər sí loo kaw yururu’g lə sí gao ya. Mbaidɔmbaije si aw gə́ nee dəb ŋga.

Loo si dan ndòo’g m’gər gao ləm, loo si dan bao’g kara m’gər gao ləm tɔ. Loo gə́ rara kara gə́ m’isi gə mée ndan lé m’gər gao ləm, si gə mée ɓoo lé kara m’gər gao ləm tɔ. Tɔgərɔ ya, m’gər loo si dan nékiŋga’g gao ləm, m’gər loo si loo gə́ né lalm’g gao ləm tɔ.

Ta neelé ma m’pa mbata né gə́ m’aw ndée el mbata loo gə́ rara gə́ m’isi keneŋ ndá kəm inja am m’gər loo kisi keneŋ gə meekulɔm ya.