Populære bibelvers fra ลามูลา 17

Del

ตานา อับราม อูมอยํ นะ ญา_ ซือมีลัด ปูโลฮ ซือมีลัด (99) ตาโฮด ดัฮ_ ตูฮัด บือซัยํ เดะ อาตัซ มาแรฮ ปลีฮัจ กะ ญา_ มือเลา จะ_ “กู นี เลอ_ ฌาดี ตูฮัด นู มือฆัฮ. เกา กือนา บูวัจ ตูโรจ โซะ ฮือลด มูคา นะ กู_ ฌาดี ซือมียา บาฌิ ซือมูฮา เลอ.

ตะเดะ อีนี_ นะ เตด ซือโบจ ปือนามา นะ เกา จะ_ อับราม_ ตาปี นะ ซือโบจ จะ_ อับราฮัม เลอ. กรานา กู นะ บรี เกา ฌาดี อาโปก นะ ลูมอฮ ซือมียา_ บาญะ บักซา.

“ปือมือเลา บือฌาญี บือตือตู นะ กู อีนี_ นะ ฌาดี ปือมือเลา บือฌาญี บือตือตู_ ซือมาญัก รอจ. อาดา เดะ ตืองัฮ กู ฌางัน เกา_ ฌางัน บือแนฮ นะ เกา_ ตูโรด มือนูโรด ฌูฆา. กู นะ ฌาดี ตูฮัด นะ เกา_ ตูฮัด นะ บือแนฮ นะ เกา ฌูฆา.

“อีนี ฌาดี ปือมือเลา บือฌาญี บือตือตู นู กู บูวัจ ดัฮ ฌางัน เกา_ ฌาดี กะฆีนี เลอ. เกา เลอ_ นะ ฌาดี อาโปก นะ โกะ ลูมอฮ บักซา บาญะ.

ตูฮัด เดะ อาตัซ ตีกัฮ จะ_ “โงฮซูโงฮ เตอ_ ซารา_ บีนี นะ เกา_ ญา นะ ดูโดะ เดะ อาปี_ นานะ กีลากี กะ เกา. เกา กือนา ตืองะ_ ปือนามา นานะ อีตู จะ_ อีซัก. กู นะ ตืองะ ปือมือเลา บือฌาญี บือตือตู นะ กู_ ฌางัน ญา_ ฌางัน บือแนฮ นะ ญา_ นะ ฌาดี ปือมือเลา บือฌาญี บือตือตู_ นู อาดา ปี ซือลาลู เลอ.

นังฆรี คานาอัน นู เกา ตืองัฮ มือนูปัก ดูโดะ อีนี_ ซือมูฮา_ กู นะ บรี กะ เกา_ นะ ฌาดี นังฆรี นะ เกา_ นังฆรี นะ บือแนฮ นะ เกา_ ซือลาลู. กู นะ ฌาดี ตูฮัด นะ กูญา อีตู เลอ”_ ตูฮัด ญา จะ.

กะฆีเตอ_ อับราฮัม ตูโนะ มือญือมัฮ ตือมะ รอจ กะ ตานัฮ. ญา บรีงัจ บือฆือละ เดะ ฮาตี จะ_ “กาลา กีลากี อูมอยํ ซือราตุซ (100) ตาโฮด_ ญา นะ บือเลฮ นานะ เฆอ? ซารา เตอ_ นู อูมอยํ ซือมีลัด ปูโลฮ (90) ตาโฮด ดัฮ_ นะ ดูโดะ เดะ อาปี บือเลฮ เฆอ?”

ตูฮัด เดะ อาตัซ มือเลา ฌางัน อับราฮัม ลาฆี จะ_ “ปาซัน ซารัย_ บีนี นะ เกา เตอ_ ฌางัน บลาโลก ปือนามา นะ ญา จะ_ ซารัย_ ลาฆี_ ตาปี กือนา บลาโลก ปือนามา นะ ญา จะ_ ซารา.

กาเญา กือนา กรัจ กูเละ ซูแลว นะ กาเญา_ นะ ฌาดี ปือนานา นะ ปือมือเลา บือฌาญี บือตือตู_ เดะ ตืองัฮ กู ฌางัน กาเญา.

ตาปี ปือมือเลา บือฌาญี บือตือตู นะ กู_ กู นะ ตืองะ ตาโรฮ ฌางัน อีซัก. ญา เตอ_ นู ซารา นะ ดูโดะ เดะ อาปี_ บรี ฌาดี นานะ นะ เกา_ เดะ ตาโฮด ฮือลด_ เดะ มูเซด อีนี เลอ”_ ตูฮัด ญา จะ.

กาลา นานะ กีลากี นะ กาเญา_ อูมอยํ ลาปัด อารี ดัฮ_ ญา ฆาโดฮ ซาโมจ ลาฆู กรัจ. โกะ กีลากี_ ราตา ซือมียา_ นู ฌาดี บือแนฮ นะ กาเญา เตอ_ นู ดูโดะ เดะ อาปี เดะ รูมัฮ นะ กาเญา โปด บาฌิ_ นู กาเญา บือลี เดะ ซือมียา บักซา อาซิก_ นู บูกัด บือแนฮ นะ เกา โปด บาฌิ. ซือมียา นู ดูโดะ เดะ อาปี_ เดะ รูมัฮ นะ เกา เตอ_ ซือมียา นู เกา บือลี_ ฌางัน ดูเวะ เตอ_ กูญา กือนา ซาโมจ ลาฆู กรัจ เลอ. ปือมือเลา บือฌาญี บือตือตู นะ กู_ อาดา เดะ ญาวา กาเญา_ ฌาดี ปือมือเลา บือฌาญี บือตือตู นู อาดา ซือมาญัก รอจ เลอ.