Populære bibelvers fra Cibraan 11

Del

Kado lel imaan tamaa cag adde linom takko kinamah thummut nok aba, ambulluyinnixem tanem lel ni yashshimine. Kalxit mari lel kaa araxah kinni Yallih shahaada geyeenim.

Imaan hinnim lel kayya xedenishaanam takkem maki, amayim lel Yallalle kab-arhxinnanti usuk yane tiya kinam kee kaa wagiya marah ten casbe akah yaxayem yaamano kaalle tanemhi sabbatah kinni.

Umbuka caalam Yallih waanittah tunkhulluqhem akah naarhigem imaan araxah kinni, ta kado nablem lel tambulluwemko siraaximtem maki.

Abraahimih deeco akah tekke gedda, imaanah yim-izzizeyaako, tamaa miiraasah kabbaatole baarho fanah yedee. Yewce gedda lel awlalle aduuk yinem aarhuguk miyine. Imaanah lel tamaa wacdi baarholle sigo yedeeyaako, godobotta yekkeh, kayya balih tamaa wacdi worosa kuuk yine Isxaaq kee Yacqooblih tenududde marak yine.

Nuux lel, Yalli tamaa kaddih tumbulluweh sodhdhamhi zacabah kaa asuuseyaako, dhacuma Yallih mashshiilih ishi xawaz akah gargeera naba doonik imaanah siraaxe. Taymih caalam cadaleyaako tamaa imaanah yamiite xaqqe yiwrishe.

Xanookh lel rabekkah imaanah aganalle kaa beyen, Yalli kaa beyemhi sabbatah lel migeytiminna. Kaa beyekkah lel Yalla xedenisheh yinemih shahaada akah tomxowweh tine.

Abeel imaanah kinni Qaayinko ziyaada tashshe sadaqha Yallah yoxoyem, kaa araxah lel xaqqi-wanna kinamah Yallaako shahaada geye, Yalli lel akah yishhideyaako kaa muttuxuwa kabbaate. Ishi imaanhi araxah lel, rabeh yane hanuk, kaddih waanisha.

Saara lel tee waqhti tillaabeh yine hanuk, tamaa wacde akah yoxoyeti umun kinam teerhegemhi sabbatah soonoyitto imaanah xayla kabbatte.

Amayim lel, tamaa Yalli yisiileyaako siraaxe daafo masarrat leya ilaalak yinemhi sabbatah kinni.

Moosa yenebe gedda, amaa Fircawun barhahi barhah decsiimam imaanah xine. Amayimhi idhdhah, zambeelih dago geddahi raaxadde raaxassiitamko, Yallih xiyawlih bixna-yabliinim imaanah doorite. Usuk niiroohit casbe waacensiitak yinemhi sabbatah, Masriiti gaddaako, Masiix idhdhadde wattiimam naba gaddah yuble. Tamaa ambulluyinnixe tiya yublemhi sabbatah cursuusute, amaa nugus kuraako mashshiitekkah lel imaanah Masri xabe.

Abraahim cakanadde saye gedda, Isxaaq imaanah kinni sadaqhah yoxoyem, wacde kabbaateh yine hanuk lel, inkettak le ishi barha sadaqhah yoxoye.

Sharmuutha kin Rahab tamaa giba meceetih arxibishshemhi sabbatah, tamaa Yalla xine maraalih maalayinna.

Israa-eel xiyaw Casa Badko kafin baarho balih imaanah akko taben, Masriiti xiyaw laakin amah aboona yicikkinin gedda yumundhucin.

Yerikhooti qaana malxina max akko maklaliteenik sarrah imaanah radde.

Tamaa riish yaylayti ten dhagamkohi ciloh, imaanah Faasigi cid kee biili anasnas abaanam erherhishe.

Yoosuf rabo kab-yerhxe gedda, imaanah Israa-eel cindham Masriiko yawcoona kinoonim warisheh, ishi lafufhi zacabah lel masxassa yoxoye.

Yacqoob lel rabo farhe gedda, ishi ilolle addiiduk cibaadah cunuuneyaako, Yoosuf cindham barakä geyoona inkeekettah imaanah dhaaco akah abe.

Isxaaq lel Yacqoob kee Ceesawuh tamaa niiroh takko lemih imaanah barakä geyoona dhaaco akah abe.