Populære bibelvers fra Matteyo 24

Del

Bwo omumutararo adi namuno wati hun olwaji’to nyo obobolororoi adi arrohojita. Ati lya ol odihu’to many isidi, italahuni adi.

Bwo fe ittittoye adi asayyo hun oyiji’to huno olobye ono Hollum many ifauhyen daŋ te etamijani jyo laati daŋ bwo ihalu ottu adi esidi fau.

Itaniŋuna adi itai jo owon narrem bwo fe ikyanai laati jo erem adi hohoi, ati helafuhoti. Oŋida erre huna daŋ ofwonni ati hobeŋ esidi fau.

Nyo ofwoi adi laati hutto miji obo jyo obo irryomoniere bwo fe ofwoi adi laati hutto lobye obo jyo obo. Owon adi ahure iko ekikiro fau imasik arryai. Arai erre huna daŋ etteri ono ettigemita hun obolori.

Obyaŋarani adi nedou iko afau ati nekyanita hoŋ obeŋi adi olitohini ’tuŋ.

Nyo ofwonni adi enyabak arryai ta afure hoŋ hul ojori jo, Ani alya Kristo, bwo itisyabari adi isi laati arryai.

Isyori adi isi itai jyo ettigemita bwo fe ottohori adi isi itai. Oliwarik adi laati daŋ itai nyo iruhoto tai afure hoŋ. To oŋitek huna ipali adi laati arryai to hiruk addi, bwo isyori adi isi illarak hosi ittohori bwo fe oliwarik adi isi illarak hosi. Odyotoi adi ebwanak arryai hul inyobye’to ette itisyabara laati arryai.

Itarraŋ Yesu jihosi ojo, Ihumata irrirrya, helaha obo atulo itisyaba itai.

Tania ihumata ’ra nyo ilunyu adi Lonyi tulo lunyuna.

Tania ihumata mijo nyo ibyaŋata tai imijana anani oloŋ on ottuniere adi Hobu hatai.

Ati to oloŋ ania iko asaa on ottuniere inyi obeŋ obo omijak, dwadi bu anjelohyen hutte dou iko Lonyi Hollum, obeŋ obo omijak arari Monye hama omijak.

Nyo odyotoi adi Kristohyen lenyabak iko ebwanak lenyabak hul ihanie adi etamijanita hun obolori iko nedwariti ikemyere hul onyimuni itisyabari isi.

Ihwa ninya ihanie laati to noŋitek huno Noa, ihanie adi bwo fe isi ihwo nya ta attuna ono Lonyi tulo. Ihwa ninya to noŋitek hwa hobeŋ ebulyo hari ottu, oŋiye isi, amatai isi bwo fe ayamai, many jo oloŋ ninya ojiŋaniere Noa itogol. Bwo fe obeŋi bu isi igigiloi omuk erre many ottuniere ebulyo hari iyari isi daŋ addi. Tania ara adi attuna ono Lonyi tulo ihwo nya.