Populære bibelvers fra Roma 1

Del

Hau la moe foo sai Novidade Diak nee. Tanba Novidade Diak nee iha kbiit hosi Maromak hodi salva see-see deit mak fiar, primeiru ema Judeu sira, depois ema hosi nasaun sira seluk.

Tanba Novidade Diak nee foo sai Nai Maromak nia lia loos. Maromak nia lia loos nee mak nee: liu hosi fiar ba Nai Maromak maka Nia simu ita, hanesan hakerek ona iha Livru Sagradu nebee dehan, "Ema nebee moris loos, sei moris hosi fiar."

Tanba desde Maromak halo lalehan ho rai, ita ema bele hatene klaru katak Nia nee Maromak i Nia kbiit rohan laek, maski ita nia matan la haree. Nunee la iha razaun ida ba sira atu dehan katak sira la hatene Maromak, tanba sira bele hatene liu hosi buat nebee mak Nia halo tiha ona nee.

Maski sira konhese Maromak, maibee sira lakohi foti aas Nia naran nudar Maromak, i lakohi foo agradese ba Nia. Sira nia hanoin la loos ona, sira nia neon mos nakukun tiha.

Sira troka tiha lia loos hosi Maromak ho buat nebee falsu. Sira la adora Maromak Kriador nebee halo buat hotu-hotu, maibee sira adora fali Maromak nia kriasaun. Tuir loloos Maromak nee mak ita tenki hahii too tinan ba tinan. Amen.

Maromak iha lalehan hatudu sai katak, Nia hirus teb-tebes ema nebee moris iha sala no ema nebee hahalok aat. Sira nia hahalok aat nee taka ema seluk nia matan atu la bele haree dalan loos.

Tanba nee mak Maromak husik tiha liman para sira bele halo sala foer saida deit tuir sira nia hakarak. Too sira nia feen sira mos la toba ho sira nia laen hanesan baibain, maibee sira halo fali relasaun seksual ho feto maluk. Nunee mos laen sira husik tiha relasaun seksual ho sira nia feen, hodi kaan fali sira nia mane maluk, too mane ho mane halo fali relasaun seksual ba malu nebee aat liu. Tanba nee sira hetan ona kastigu tuir sira nia hahalok aat nee. Ema sira nee despreza atu konhese kona ba Maromak. Nee mak Maromak husik tiha liman para sira hanoin mak buat aat deit, i halo buat nebee tuir loloos la bele halo.

Sira foti aan dehan, sira ema matenek, afinal sira sai beik-teen. Sira la adora Maromak ida nebee forsa teb-tebes i moris rohan laek. Maibee sira adora fali estatua nebee ema mak halo hanesan: ema, manu fuik, animal ain haat ho animal nebee dolar. Afinal buat sira nee hotu sei mate.