Populære bibelvers fra Yaya 14

Del

PataakonKu dikovu iti kasandadan do ginavoKu, supaya osondod i ginavo muju. Nga iri kasandadan do ginavo itaakKu dikovu om okoniko irad di kasandadan do ginavo itaak di tulun siti vonuvo. Ada kou kosurau om ada kou korosi.

Nga kadii di Yisus mintangar disido, “Iokuno irad do vajaan mongoi soi di Kinoringan, om nokoilo kou do toinomod mantad Dogo, om manaak Oku do kovijaan di tongotulun. Nong okonko mantad Dogo, auso iiso tulun korikot soi diAmoKu.

Om kadii di Yisus kavagu dagai di tongotulunJo, “Ada kouno sumurau. Parsaya kouno do Kinoringan om parsaya kou nogi Dogo.

Nga iri nopo i Mongunguup, irino i Tatod Tolidang, om suuon Isido diAmo sumuvoli mongoi siti dikovu saralom di ngaranKu. Om Isidono iri monuduk dikovu do kasangkat onuu nopo, om popoondom dikovu kasangkat diti natangarKu dikovu.

Nga isaai nopo iri nokoilo maja diri nisuuKu om vojoon disido, irino au kojuu Dogo. Om isaai nopo iri au kojuu Dogo, om irino i au kojuuan diAmoKu, om Ioku nogi nga au kojuu disido, om mintalang Oku siri disido,” kadi Yisus.

Mokianu Okupo diAmo, om onuan kou nogi dino Disido do iso Mongunguup, irino i Tatod do Kinoringan i monuduk diri oinomod, do maja-vaja dikovu gosob salaid-laid. Au kotorima tulun siti vonuvo Disido, sabap au Isido aantangan diolo om au Isido otutunan diolo. Tapi ikovu nopo nga kotutun Disido sabap Isidono mindada si dikovu, om kopiiso dikovu do talaaid.

Om onuu nopo iri pokionuon muju nga onuanKu ikovu nong mokianu kou sabap maja kou Dogo supaya koinggajo iAmo saralom Dogo, i TanakJo. Nong mokianu kou do onuu nopo saralom di ngaranKu nga onuanKui ikovu,” kadi Yisus.

Om kadi Yisus kavagu, “Nong aui kojuuan Oku dikovu, vojoon mujui iri nisuuKu dikovu.

Siri valai diAmoKu soi suruga oguu ijonon, om mongoi Oku posodia diri ijonon muju soi. Nga nong auso irad dino tantu do patangaronKui dikovu.

Om koongoi Oku nopo dino soi, do posodia di ijonon muju, om rumikot Oku nogi dino kavagu do mongovit dikovu siri pantokKu diri, supaya koiso kou Dogon do nijonon.

Nga kadi Tumas mintangar di Yisus, “Tuhan, au ikoji koilo nong inombo pakaayanNu, om potingkukuro ikoi dii do koilo di vajaan mongoi silo?” ka.