Populære bibelvers fra Ɓalɔma 12

Del

Nɔɔkpatakɔmʉ moni kʉ ʉɓɨɨ ngua wʉ ɓʉɓʉnɨ. Ɨkyɛmɨngana, sɨeni Asʉɓɨɨ ninu kunicho nʉ ninu kunzo mbɨmbanaka yɨ ɨtakɨ‑takɨ. Kʉ ɓwanɨ, na꞊kwanana kupimiso ɓʉkʉnda ngiɓa ɓʉ Asʉɓɨɨ, iɓa ɓɔɔ ɓuɗo, iɓa ɓaamʉkataa, nʉ iɓa ɓɔɔ ɓʉkwananakɛ.

Kʉ ɓwanɨ, ɓayoo ɓʉsɛmɛ, aka ekoo ʉ 'ʉtʉma wʉ ikoko ngua Asʉɓɨɨ anawɔ ekoo ʉndɛsʉ, mʉnɨta ɓɔ nzeni ndʉtʉ nʉ ʉɓɨɨ nguʉndɛnʉ ndʉ 'ʉtʉmbɨa ngua wa kʉkʉʉ, uwa wɔɔ jaɓanakɨɛ, nʉ wɔɔ bayanɨɛ apɛɛ ʉ Asʉɓɨɨ. Ɨngbaa ngia yɨkwanana‑ɔɔ kubibiso Asʉɓɨɨ kingono iinanɨ.

Kweni ɨgyagya ekoo moni ngika na꞉napɨa‑ɔɔ itungwio. Ɓieni tʉkʉ kʉpɨa ɓʉka‑ɓʉkaɨ, nambuɓio tʉkʉ kʉta Asʉɓɨɨ chʉkɔmʉ nʉ ndokono.

Nɔɔsɨakɔmʉ ɓʉɓɨɓɨ ninu kʉɓaa angu, ɨkyɛmɨngana ɓaeni ɓʉɓɨɓɨ angu ɨngbaa kʉkyɨa ɓuɗo.

Ɓieni nʉ ɓʉkʉnda ati ʉndɛnʉ tʉkʉ ndʉ iya ɓayoo ɓaakyɨa‑ɔɔ nʉ ɓʉkʉnda ati ʉndaɓʉ. Kyɨeni ɓʉmʉ kukumono ati ʉndɛnʉ.

Ɓʉkʉnda ngiɓa ɓa ati ʉndɛnʉ ɓɔɔɓiokɔmʉ nʉ ɓufili. Yaeni moni kɔɔ ɓɨɓɨ kʉ muɓomu, nambuɓotono tʉkʉ nʉ ika kɔɔ muɗo.

Kyɨeni kʉ iɓomu ngia nakwanana kʉkyɨa, ambʉ ɓieni nʉ majɨɔ nʉ ɓombi kʉ ɓuɓomu.

Inu ɓayoo ɓʉ ɓʉkʉnda, nɔɔtisiokɔmʉ ikosi. Nasɨeni ɛmɛ Asʉɓɨɨ akʉ 'ʉnganga nguʉsɛmɛ kutisio ikosi. Jʉ amati ʉ Mubio kʉ Asʉɓɨɨ ɓa꞉tɨndakɨa ɓɔ: « Ɛmɛ kʉ ma꞊tisio ikosi. Ɛmɛ kʉ ma꞊tisio ikosi yɨ ɓʉɓɨɓɨ ngiɓa ɓa꞉kyɨa. »

Ɓieni ɓombi ɓɔɔ ɓuɓote kuu nʉ angu ngiʉndɛnʉ kʉ 'uɓomu, chʉkɔmʉ naɓio ɓadʉɓa. Ɓieni kʉkyananakɨa Makʉʉɓɨɨ tʉkʉ nʉ kɛkɛɛ amati ʉ mɨtʉma ngiindɛnʉ.

Jʉ aka ekoo ʉ ɨjɨɔ ngia Asʉɓɨɨ a꞉pananiso ekoo asɛmɛ, maninu kʉɓɨa ɓɔ mombi gʉkʉ mʉngana ati ʉndɛnʉ ɔɔɓiokɔmʉ nʉ 'ʉtʉma wʉ ɨmbʉka kʉɓaa aka yɨkwanana‑ɔɔ. Ɨkyɛmɨngana, ɓieni nʉ itungwio yɨ mbɨmbanaka kʉkpatanakɨa tʉkʉ nʉ ɓʉjanana ɓʉ baya ngia Asʉɓɨɨ aɓio uninzeni.

Nɔɔtisiokɔmʉ mombi ɓʉɓɨɓɨ akʉ ɓʉɓɨɓɨ. Kyɨeni angu tʉkʉ kʉkyɨa moni kɔɔ muɗo apɛɛ ɓombi kʉ ɓuɓomu.

Ɓieni tʉkʉ nʉ kɔnɔ ati ʉndɛnʉ. Nɔɔɓiokɔmʉ nʉ 'ʉtʉma wɔɔ ʉja, ɨkyɛmɨngana bayeni kijisiniso nɨsɨ. Nɔɔnanakɔmʉ ɓɔ nanʉ mbɨmbanaka nadɨndɨ.

Ɨkyɛmɨngana, ɓa꞉matɨa ɓata kʉ ɓɔ, « Ndʉ makwa wʉsɔɔ waɓio nʉ taa, munzo idyo tʉkʉ nzoo. Ndʉ aɓio nʉ taa yɨ mepo, munzo ɛkɔ tʉkʉ nzoo. Jʉ kʉkyɨa ɓwanɨ ya ndʉ wanayɔ kuto makyɛkyɛ kʉ dyaa akʉ 'ʉtʉ. »

Ɓieni tʉkʉ kʉta Asʉɓɨɨ ɓɔ umbuiso ɓombi ngiɓa ɓaanɨkyananaka. Ɓieni tʉkʉ naɓɔ kʉtɨa ɓɔ ɓʉmbʉa mbʉaa, chʉkɔmʉ naɓɔ kugboso. Kweni ɨgyagya ɨzɔ nʉ ɓombi ngiɓa ɓa amati ʉ ɨgyagya. Ndɨeni ɨzɔ nʉ ɓombi ngiɓa ɓa amati ʉ ndɨa.

Ɓieni tʉkʉ kʉsalɨa ɓombi ɓʉ Asʉɓɨɨ ngiɓa ɓa amati ʉ ɓanangyɨa, nʉ ɓieni tʉkʉ kʉjananɨa mubika.

Ndʉtʉ ngia yɨ mombi yanʉ lizi lɨja, ɨkyɛmɨngana lizi ngilʉnanɨ kʉ liɓomu lambʉkɔmʉ nɨngbaa yɨ kuu tʉkʉ mɨngana. Ngbanga kʉ ɓwanɨ, isu ngiɓa ka ɓaja, ka tiga ndʉtʉ mɨngana amati ʉ jubunio ngia kanayɔ nʉ ɔɔ Klisito. Nʉ isu ati ʉndɛsʉ kʉ nangana nangana ka tiga ɨkyɛmɛ mɨngana, ndʉ lizi lʉ ndʉtʉ mɨngana.