Populære bibelvers fra Éxodo 10

Del

à yoa israe masare faraõ to wa wio duaerachʉ ñʉno, Yawe sehe Moisere õ sehe niha tjoa: —Faraõ mehne durucu ñʉi wahaga tjoa. à wahai, “Wiho warota wahaihca yʉhʉ” ni, tʉhotui tjiga mʉhʉ. Tó panore yʉ mʉhʉre niriro seheta, yʉhʉta jija faraõre, ã jichʉ to doca macaina pʉhtoa cʉ̃hʉre ã yʉhdʉrʉcaina jichʉ yoariro. Yʉ ã yoaa mehne yʉhʉ sehe ñʉ cʉachʉ yoaa baro chorire tinare yoa ño, yʉ tua yʉhdʉrʉcʉ sʉriro yʉ jia tia cʉ̃hʉre tinare ño mʉjai nija. Tíre mʉsa cʉ̃hʉ ñʉna, yʉ egipto masare doca dahre, payʉ ñʉ cʉachʉ yoaa baro mehne tinare yʉ buhiri dahre mʉjachʉ. Yʉ ã yoaa mehne potocãta Yawe yʉ jia tiare mʉsare masichʉ yoai nija yʉhʉ. Tíre masina, mʉsa sehe mʉsa pohnapʉre, mʉsa panamanapʉ cʉ̃hʉre jipihtia yʉ ã yoarire yahu turianahca. à jicʉ cariputiro marieno faraõ mehne durucu ñʉi wahaga tjoa —niha Yawe Moisere.

à yoa israe masare faraõ to wa wio duaerachʉ ñʉno, Yawe sehe Moisere õ sehe niha tjoa: —Mʉ yachʉre mʉanopʉ naroca mʉoga. Mʉ ã yoachʉta, Egipto yahpa jipihtiropʉre tuaro nahitiano waharohca —niha. To ã nichʉ tʉhoro, Moise sehe to yachʉre mʉanopʉ naroca mʉoha. To naroca mʉochʉta, Egipto yahpa jipihtiropʉre ñamine nahitiasoro bui tuaro nahitiano wahaha. à waharo, tia dacho waro tuaro nahitiano jirucuha. à tuaro nahitiano jichʉ, Egipto yahpa macaina sehe ti basi cahma ñʉ bocaera tiha. Tuhsʉ, ne pa sehepʉ tini macaa wahaera tiha. Wiho mejeta israe masa ti jiri si sehere noano buhriaro jinocaa tiha.

To ã ni yahuchʉ tʉhoro, to tjuadʉre Egipto yahpa bui ñui purocaha Moise. To ñui purocachʉ, Yawe sehe sʉ̃ mʉja taro caha sehe wihno ti mʉ mʉja tachʉ yoaha. To ã yoachʉ, tí wihnono sehe cʉ̃ dacho, cʉ̃ ñami tí yahpare wã turucuha. Ã yoa pa nʉmʉ bohrearo sehere tí wihnono mehne poreroa peri payʉ wihiha jʉna. Wihi, tí yahpa mʉ sʉro puro wʉ site sahserʉcʉ sʉa wahaha. Wʉ site sahserʉcʉ sʉ, duji caha sʉha jʉna. Tí dachore ti wihiriro sehe ne cʉ̃ taha tópeina peri wihi ñʉera tiha tó panopʉre. Ne pari turi tí yahpare tópeina peri bajua namosi.