Populære bibelvers fra 1 Samue 16

Del

To ã ni tʉhotuchʉ ñʉno, Yawe sehe tirore õ sehe niha: —Tiro noariro bajura. Tuhsʉ, mʉariro wʉrʉ jira. Wiho mejeta tí mehne ñʉ wisiai tjiga mʉhʉ. Tiro jierara yʉ beseriro. Yʉhʉ sehe masare besei, masa ti besero yoaro seheta beseraja. Masa sehe masʉnore besea, to bajua tiare ñʉ, besera. Wiho mejeta yʉhʉ sehe ã jieraja. Masare besei, yʉhʉre ti wacũ tuaa tiare, yʉ yare ti cahmaa tiare, ã yoa paye noaa ti tʉhotua cʉ̃hʉre ñʉ, beseja yʉhʉ —ni yʉhtiha Yawe Samuere.

To ã nichʉ tʉhoro, Samue sehe to wahmisʉma ti ñʉrocaroi oveja cjiro saharopʉ olivo se to posarire cua pisaro mehne to dapu bui mahano pio payoha. Ã yoaro, —Ahrirota jira israe masa ti pʉhtoro cjihto, Yawe to beseriro —ni, ñono niha Samue. Tiro Yawe to beseriro sehe Davi wama tiriro jiha. Ã yoa to ã yoari pjaihta Yawe to Catia Macariro Espíritu Santo cʉ̃hʉ Davire yoadohoro taro, dija wihi mʉa waha, tirore piti ti dʉcaha jʉna. Ã yoa Samue sehe ã yoa tuhsʉ, tinare coha siti, to ya maca Ramapʉ coha tjuaa wahaha.

Ãta yoa, tina to pohna sietere Samue cahapʉ pjiroca wio, tirore ño pahñonocaha Jesé. To ño pahño tuhsʉchʉ ñʉno, Samue sehe tirore õ sehe ni sinitu ñʉha: —Ahrinare Yawe ne cʉ̃iro beserara. ¿Pairo mʉ macʉ maerajari mʉhʉ? —ni sinitu ñʉha. To ã ni sinitu ñʉchʉ tʉhoro, Jesé sehe õ sehe ni yʉhtiha: —Jica cʉ̃iro dʉhsariropʉ. Tiro ovejaare ñʉ wihboro nica —ni yʉhtiha. —Tí pja cjero tirore pji dutiga. Tiro marieno, Cohamacʉre jʉ̃ wa mʉo, ño payosi mari —niha Samue.