Populære bibelvers fra LIRAANGA 39

Del

Mwami Nyasaye yali na Yosefu, ma Yosefu nakasitswa mu shia shindu shiosi shia yakholanga. Yosefu yali wamenya mu inzu yu muruchi wewe Mumisri

Potifa yaha Yosefu vunyali vu khusinjilila shia shindu shiosi. Shindu shivulakhuho shiaheenditsa mwoyo Potifa, nikakhali shiukhulia shia yaliitsanga shionyene. Yosefu yali mundu mukhomeelu khandi wi likoondo liakasa.

Yaha Yosefu vunyali vu khusinjilila vavohe vandi voosi, khandi khusinjilila shia shindu shiosi shiakholekhanga mucheela.

Muruchi mwenoyo yavukula Yosefu namuvoha mucheela, havundu ha vavohe vu Mwami wa Misri vali nivavohwa. Yosefu navohwa mucheela. Navutswa Mwami Nyasaye yali na Yosefu khandi namukasitsa; nikalomba mundu wavohanga vandu mucheela khumulolela malahi.

Lwa matukhu mati kali nikakhavira, mukhali wu muruchi wewe yaheenza Yosefu namwikomba khukona naye. Yosefu yambakhana namuvoolela, “Lola, muruchi wanje shiaheendelakhu mwoyo shindu shiosi shili munzu yumu tawe, shichila ndi hanu. Wamba vunyali vu khusinjilila miandu chiosi chiali nachio. Ndi nu vunyali hali khanyishi muno munzu yumu khuli vwa ye ali navwo, khandi ashili khunzikalilakhu shindu shiosi nikakhali yivi wonyene. Khulwa yako, nyala khukhola ndina shikholwa shi shifwavi yishi, mbe kholi vwoni imbeli wa Nyasaye?”

Litukhu lindi, lwa Yosefu yinjila munzu khukhola muhinzilu kwekwe, khali mulala khu varumishi vu munzu mwenomo navulamu. Mukhali wu muruchi wewe yamukumila ikaanzu yeye navoola, “Hamba khukone nivi.” Navutswa Yosefu yilukha natsia ilwanyi; niyivala ikaanzu yeye mu makhono keke.