Populære bibelvers fra 2 PETERO 1

Del

Rĩu-rĩ, nĩ hinya wake wa Ũngai ũtũtugĩte nĩ gũtũkinyĩria maũndũ mothe marĩa matũbatairie, nĩ getha tũtũũre twĩ muoyo na twĩamũrĩire Ngai, nĩ ũndũ wa kũmenyana nake, we watwĩtire tũgĩe na riri wake mwene, o na wagĩrĩru wake. Na nĩ ũndũ wa maũndũ macio nĩaatũtugire na ciĩranĩro ciake iria irĩ goro na irĩ nene mũno; nĩ getha, na ũndũ wacio, mũkahonokio harĩ ũbuthu ũrĩa wĩ gũkũ thĩ, ũrĩa ũgĩĩte kuo nĩ ũndũ wa merirĩria moru, na mũgwatanĩre nake Ũngai wake.

Na rĩrĩ, tondũ wa ũhoro ũcio kĩũmbe, ĩkagĩrai kĩyo kĩnene nĩguo muonganĩrĩrie wĩtĩkio wanyu na wagĩrĩru, naguo wagĩrĩru mũwonganĩrĩrie na ũmenyo, naguo ũmenyo mũwonganĩrĩrie na kwĩgirĩrĩria merirĩria ma mwĩrĩ, nakuo kwĩgirĩrĩria kũu-rĩ, mũkuonganĩrĩrie na gũkirĩrĩria, nakuo gũkirĩrĩria mũkuonganĩrĩrie na kwĩamũrĩra Ngai, nakuo-rĩ, mũkuonganĩrĩrie na gũtuga ariũ a Ithe witũ, nakuo-rĩ, mũkuonganĩrĩrie na wendani.

Nĩ ũndũ mũngĩkorũo mwĩ na maũndũ macio na makamũingĩhĩra mũno-rĩ, nĩmo mangĩgiria mũkorũo mũgũtarĩte kana mũkaaga gũciara maciaro ũhoro-inĩ wa kũmenya Mwathani witũ Jesu Kristo.

Hakĩrĩ ũguo, ariũ a Ithe witũ-rĩ, ĩkagĩrai kĩyo o makĩria, nĩguo gwĩtwo kwanyu na gũthurũo kwanyu gũtuĩke kũrũmu; amu mweka ũguo-rĩ, mũtirĩ hingo mũkahĩngwo.