Populære bibelvers fra Namba 1 leta prom Pita 2

Del

Bat yupla no demkain wase dempla. Yupla i ol pipol wea God i bin suzem. Ane yupla i blo aus blo king ane prist, ol oli pipol blo God. Ane yupla i blo em, so yupla ken soe ol nada pipol da gudwei blo God, bikoz em bin singaut yupla kam ausaid prom dat dakples, kam po dat prapa nadakain gudlait blo em.

Wen Zizas Kraist i bin ded, em bin kare ebridem sin blo yumpla wea oun bodi blo em lo da kros, so yumpla i kan ded nau prom dem sin bat mata stap wea rait wei. Yupla i bin kamgud nau prom dem badting wea em i bin sapa. Yupla i bin wase ol sip wea i bin gowei prom dat rait rod. Bat nau yupla i bin kambaigen po pole da Bos blo lugaut sip, da wan uda i lugaut laip blo yupla.

Baibol i spik diskain: ‘Wea wantaim yupla no bin ol pipol, bat nau yupla i ol pipol blo God. Wea wantaim God i no bin soe yupla sorewei blo em, bat nau God i soe sorewei blo em po yupla.’

Yupla mas prapa anggre po dat milk wea i da wod blo God, so yupla i go gro kam prapa gad sens baut wiswei God i seibe yupla. Yupla mas prapa anggre po dis wod wase niu beibi i anggre krai po milk

Mai bala ane sisi, yupla i streinza ane ausaid pipol. So ai wone yupla po stap longwei prom nugudwei bikoz demting i pait gense spirit blo yupla. Prapa lugaut wiskain yupla i stap midel wea dem neiba uda i no bilib. Iben ip dempla i spik yupla i bin meke rong, dempla i go luk dem gudsamting wea yupla i mekem, ane dempla i go bilib ane gibe ona po God wen em go kam po zaze da wold.

Lete God zoine yupla wase ston wea i gad laip, po kam tugeda wase tempol blo God. Ane zob blo yupla i po bi oli prist blo em ane po meke spesil opring prom spirit blo yupla po meke em api bikoz prom Zizas Kraist.

Yupla mas stap nau nomo peibaik, nomo lai ol pipol, yuze laiwei. No akt wase yupla gud o wase ol tupes pipol. Nomo zeles ane no kareyan.

Yupla kam klostu po da BosLod uda i da meinston blo da Tempol blo God ane em i mata stap laip. Em nau wea ol pipol i bin meke em rabis, bat God i bin suze em ane meke em impotant.

Yupla i no sleib, yupla i pri. Bat da priwei blo yupla i mas no meke no nugudting. Yupla i pri po stap wase sleib blo God.

God i wande yupla po mata meke ol gudsamting solong i go stape demwan uda i meke laitok gense yupla.