Populære bibelvers fra Madiyu 17

Del

A꞉la꞉dabu ba꞉dabiki, Ya꞉su eyo꞉ imo꞉wo꞉ a꞉la꞉sio꞉, “Gili tili dabuwo꞉ mada ha꞉lula꞉sule ko꞉lo꞉, gi o꞉lia꞉yo꞉ mo꞉ililo꞉. Niyo꞉ to we hendele so꞉lo꞉l. Tilidabu gililo꞉wo꞉, kiwo꞉lo fo ha꞉lula꞉su o꞉ngo꞉ dowalega, giliyo꞉ misio꞉ wemo꞉ sa꞉lakiyo꞉, ‘Ge dasilia꞉ga꞉ honona hamana,’ a꞉la꞉sa꞉lalikiyo꞉, e o꞉li ka ha꞉na꞉ib. A꞉la꞉ta꞉ga꞉ nanog imilig gililo꞉ mo꞉dimidama꞉no꞉ dowo꞉ nowo꞉ aundo꞉ma.”

Bidayo꞉ to a꞉no꞉ o꞉sa꞉la꞉labikiyo꞉, iyo꞉ kol ho꞉lo꞉ fo꞉fo꞉lesodo꞉ ho꞉len a꞉ma꞉ ga꞉lula꞉. Kola꞉ us a꞉namio꞉, to nowo꞉ a꞉la꞉sio꞉, “We no꞉no꞉ so꞉wale ko꞉lo꞉, niyo꞉ e mada alan asulo꞉. Gio꞉ to elo꞉ sa꞉lab a꞉no꞉ dabuma.”

A꞉la꞉sa꞉labiki Ya꞉su eyo꞉ a꞉ma꞉la꞉yo꞉ towo꞉ a꞉la꞉sio꞉, “Kaluka꞉isale gio꞉ tilidabuwo꞉ aundo꞉ma iliki, togo꞉ hala kudu ha꞉na꞉sen. A꞉la꞉fo꞉ko꞉lo꞉ ne gi o꞉lia꞉yo꞉ ho꞉len o꞉biba꞉s doma꞉no꞉wa꞉le? Ne gio꞉ asulo꞉wo꞉ nodoma꞉kiyo꞉ ho꞉len o꞉biba꞉s yasilima꞉no꞉wa꞉le? So꞉wa ko, nelo꞉ wena tililia꞉ mena.” Ya꞉su eyo꞉ mama mogago꞉ o꞉mo꞉wo꞉ gadi sa꞉labikiyo꞉, mama mogago꞉ a꞉ma꞉yo꞉ so꞉wa a꞉no꞉ ta꞉ta꞉ga꞉ ha꞉nabiki, wigibole a꞉naka walaf elo꞉ a꞉no꞉ a꞉na falelo꞉.