Populære bibelvers fra ရူဝ်းမႃႉ 12

Del

ယႃႇပေ​ႁဵတ်း​ၸွမ်း​ၸိူဝ်ႉ​ၼင်ႇ​ၵူၼ်းလေႃးၵီႇ​ၶဝ်​သေၵမ်း။ ယဵင်ႈၶႅၼ်း​ၶၢမ်ႇ​ဢဝ်​တၢင်း​ဢၼ်​ၽြႃးပဵၼ်ၸဝ်ႈ​ၶိုၼ်း​မႄး​ပၼ်​တၢင်းၶႆႈၸႂ်​သူ​ပဵၼ်​ဢၼ်​မႂ်ႇ​မႃး​လႄႈ​ပုတ်ႈ​လၢႆႈ​ဢၵျၢင်ႉ​ၵဝ်​သူ​ၼၼ်ႉ​တႃႉ။ ပေႃး​ႁဵတ်း​ၸိူဝ်ႉ​ၼင်ႇ​ၼၼ်​ၸိုင်၊သူ​တၵ်း​လႆႈ​ႁု​လူဝ်ႇ​ၽြႃးပဵၼ်ၸဝ်ႈ​ဢၼ်​မျၢတ်ႈ​လီ၊တၢင်း​ဢၼ်​ထုၵ်ႇၸႂ်​မၼ်းၸဝ်ႈ​ဢိၵ်ႇတင်း​တၢင်း​ဢၼ်​ပျေႉၸုမ်ႇ​ၼၼ်ႉ​ဢေႃႈ။

ပိူဝ်ႈ​ၼႆ​လႄႈ ပီႈၼွင်ႉ​ၶဝ်႟။ ၵွပ်ႈပိူဝ်ႈ​ၵျေးၸူး​ၵရုၼႃႇ​ၽြႃးပဵၼ်ၸဝ်ႈ​ယႂ်ႇ​ၼႃႇ​ပုၼ်ႈ​ႁဝ်း​လႄႈ​ၵဝ်​တိုၵ်းယူင်း​တွင်းပၢၼ်ႇ​သူ​လႄႈ​ဝႃႈ​ၸမ်ႉ၊ဢဝ်​တူဝ်​သူ​သၢၵ်ႈလူႇ​တီႈ​ၽြႃးပဵၼ်ၸဝ်ႈ​ႁႂ်ႈလႆႈ​ပဵၼ်​ၶိူင်ႈ​တၢင်းလူႇ​ဢၼ်​ဢသၢၵ်ႈလိပ်း​ယူႇ၊မူတ်းၸၢင်ႇ​လႄႈ​ထုၵ်ႇၸႂ်​ၽြႃးပဵၼ်ၸဝ်ႈ​တႃႉ။ ၼႆႉ​ၸမ်ႉ၊ပဵၼ်​တၢင်း​ဢၼ်​ၵူဝ်းၵႂၢႆႇ​ၸႅတ်ႈ​ၸႅတ်ႈ​ဢၼ်​သူ​ထုၵ်ႇလီ​ႁဵတ်း​ၼၼ်ႉ​ဢေႃႈ။

ႁႂ်ႈ​တၢင်း​ဢၼ်​မုင်ႈမွင်း​သူ​ၼၼ်ႉ​ႁဵတ်း​ႁႂ်ႈ​သူ​ၸူမ်းသိူဝ်း​လႄႈ​ယိူၼ်ႉၶၢမ်ႇ​ၽေး​တုၵ်ႉၶႃႉ​လႆႈ​တႃႉ။ သူးတွင်း​ၵူႈၶိင်ႇ​ၵူႈမိူဝ်ႈ​ယူႇ​တႃႉ။

ယႃႇပေ​ႁႂ်ႈ​တၢင်း​ဢၼ်​ႁၢႆႉမိူၵ်ႈ​ပႄႉၼႅင်ႇ​သူ။ ဢဝ်​တၢင်း​ဢၼ်​လီ​ဢၼ်​ငၢမ်း​ပႄႉၼႅင်ႇ​ဢၼ်​ႁၢႆႉ​ဢၼ်​မိူၵ်ႈ​တႃႉ။

ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ​ႁၵ်ႉပႅင်း​ၵၼ်​မိူၼ်​ၸိူဝ်ႉ​ၼင်ႇ​ပီႈၼွင်ႉ​ၵၼ်​ၼႂ်း​ ၸဝ်ႈ​ၶရိၸ်ႈ၊ လႄႈ​ၶဵင်ႇ​ၵၼ်​ပၼ်​ၵုင်ႇသရေႇ​ၵၼ်​တႃႉ။

ႁႂ်ႈ​ၸႂ်​မႅတ်ႈတႃႇ​တဵမ်​ဝႆႉ​တင်း​ၸႂ်​သိုဝ်ႈ​ၸႂ်​ယူဝ်း​တႃႉ။ လီႁင်ႈ​လွင်ႈတၢင်း​ဢၼ်​ႁၢႆႉမိူၵ်ႈ​လႄႈ​ၵမ်ၵျၢင်ႉ​လွင်ႈတၢင်း​ဢၼ်​လီ​ဢၼ်​ငၢမ်း​တႃႉ။

ၵႃႈ​ၼင်ႇ​ဢၼ်​ပဵၼ်​လႆႈ​ၼၼ်ႉ​ပုၼ်ႈ​သူ​တၵ်း​လႆႈ​ႁဵတ်း​ၸိုင်၊ယူႇ​ႁႂ်ႈ​ထုၵ်ႇမေႃ​ၵၼ်​တင်း​ၵူၼ်း​တင်းလၢႆ​တႃႉ။

ၵေႃႉသႄႈ​ၶဝ်႟။ ယႃႇပေ​ၶိုၼ်း​တွပ်ႇ​တၢင်းၽိတ်း​ပိူၼ်ႈ။ ႁႂ်ႈ​ၽြႃးပဵၼ်ၸဝ်ႈ​ၶိုၼ်း​တွပ်ႇတႅၼ်း​ပၼ်တၢမ်ႇ​ၶဝ်​တႃႉ။ ၸွမ်းၼင်ႇ​ဢၼ်​ၼႂ်း​ၵျၢမ်းလိၵ်ႈ​တႅမ်ႈ​ဝႆႉ​ဝႃႈ၊ “ၸဝ်ႈၽြႃး​မီး​ဢမိင်ႉ​ၸမ်ႉ၊ ‘လွင်ႈ​ဢၼ်​ပၼ်တၢမ်ႇ​ဢပျတ်ႈ​ၼၼ်ႉ​ပဵၼ်​ၵၢၼ်​ၵဝ်​ၵူၺ်း။ ၵဝ်​တၵ်း​တွပ်ႇတႅၼ်း​ပၼ်​ဢေႃႈ၊’ ဝႃႈ​ၼင်ႇ​ၼႆ​ဢေႃႈ၊” ဝႃႈ​ၼင်ႇ​ၼႆ​တႅမ်ႈ​ဝႆႉ​ဢေႃႈ။

ၵႆႉ​ႁဵတ်းၵၢၼ်​တႃႉ။ ယႃႇပေ​ၶၢၼ်ႉ​ပေ​ဢိူၼ်။ ပႃးၸႂ်​ပႃး​ၶေႃး​ႁဵတ်းၵၢၼ်​ၸဝ်ႈၽြႃး​တႃႉ။

ၵွပ်ႈပိူဝ်ႈ​ၽြႃးပဵၼ်ၸဝ်ႈ​ႁဵတ်း​ၵျေးၸူး​ပၼ်​ၵဝ်​ၼမ်ၼႃႇ​ၼၼ်ႉ​လႄႈ​ၵဝ်​သင်ႇ​လၢတ်ႈ​သူ​တင်းသဵင်ႈတင်းလူင်​လႄႈ​ဝႃႈ​ၸမ်ႉ၊ယႃႇပေ​ထၢင်ႇယႂ်ႇ​တူဝ်ၸဝ်ႈၵဝ်ႇ​လိူဝ်တွၼ်း​သေ​ဢၼ်​သူ​ထုၵ်ႇလီ​ထၢင်ႇ​ၼၼ်ႉ​သေၵမ်း။ ၶႅၼ်းတေႃႈ​ၶႆႈၸႂ်​ဝူၼ်ႉ​တူၺ်း​တူဝ်ၸဝ်ႈၵဝ်ႇ​ၸွမ်းၼင်ႇ​တၢင်းယုမ်ႇမၢတ်ႈ​ၽႂ်​တၢင်းယုမ်ႇမၢတ်ႈ​မၼ်း​ဢၼ်​ၽြႃးပဵၼ်ၸဝ်ႈ​ပၼ်​ဝႆႉ​ၼၼ်ႉ​ၵူၺ်း​တႃႉ။

ပေႃး​သေၵေႃႉသေၵူၼ်း​ႁဵတ်း​ႁၢႆႉမိူၵ်ႈ​တီႈ​သူ​ၸိုင်၊ယႃႇပေ​ဢဝ်​လွင်ႈတၢင်း​ဢၼ်​ႁၢႆႉမိူၵ်ႈ​ၶိုၼ်း​တွပ်ႇ။ ၵမ်ၵျၢင်ႉ​ႁဵတ်း​ၸွမ်း​မဵဝ်း​ဢၼ်​ၵူၼ်း​ၵူႈ​ၵေႃႉ​မၢတ်ႈ​ပဵၼ်​ဢၼ်​လီ​ဢၼ်​ငၢမ်း​ၼၼ်ႉ​တႃႉ။

ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ​မီး​ၸႂ်သၽေႃး​ဢၼ်လဵဝ်​ၵၼ်​တႃႉ။ ယႃႇပေ​ထၢင်ႇယႂ်ႇ​တူဝ်ၸဝ်ႈၵဝ်ႇ​လႄႈ​ႁပ်ႉ​ႁဵတ်းၵၢၼ်​ဢၼ်​ၶျႃးတႅမ်ႇ​ၼၼ်ႉ​တႃႉ။ ယႃႇပေ​ထၢင်ႇ​တူဝ်ၸဝ်ႈၵဝ်ႇ​ပဵၼ်​ၵူၼ်း​မီး​ပိင်ႇၺႃႇ။

ယင်း​ဢမ်ႇ​ၶိုၼ်း​တွပ်ႇ​ဢမ်ႇၵႃး၊ႁဵတ်း​ၸွမ်း​ၵႂၢမ်း​ဢၼ်​တႅမ်ႈ​ဝႆႉ​ထႅင်ႈ​ဝႃႈ၊ “ပေႃး​ရၢၼ်ႇသူႇ​မႂ်း​တွင်ႉမႆႈ​ၸိုင်၊လဵင်ႉလူ​မၼ်း​တႃႉ။ ပေႃး​မၼ်း​တွင်ႉမႆႈ​ၼမ်ႉ​ၸိုင်၊ပၼ်​ၼမ်ႉ​ၵိၼ်​တီႈ​မၼ်း​တႃႉ။ ပေႃး​မႂ်း​ႁဵတ်း​ၸိူဝ်ႉ​ၼင်ႇ​ၼႆ​ၸိုင်၊မိူၼ်ၼင်ႇ​မႂ်း​ၵွင်​ထၢၼ်ႇၽႆး​လႅင်​ယူႇ​ၼိူဝ်​ႁူဝ်​မၼ်း​ဢေႃႈ၊” ဝႃႈ​ၼင်ႇ​ၼႆ​ၼၼ်ႉ​တႃႉ။

တီႈ​ၶဝ်​ၸိူဝ်း​ဢၼ်​ၼိၵ်ႈၸၢၵ်ႈ​ငႅၼ်းသႄး​သူ​ၼၼ်ႉ​သူးတွင်း​ႁႂ်ႈ​ၽြႃးပဵၼ်ၸဝ်ႈ​ပၼ်​မၢင်ႇၵလႃႇ​တီႈ​ၶဝ်​တႃႉ။ သူးတွင်း​ႁႂ်ႈ​ၽြႃးပဵၼ်ၸဝ်ႈ​ၵိၼ်ႇလႃႇ​ဢမ်ႇၸႂ်ႈ​လႄႈ​သူးတွင်း​ႁႂ်ႈ​ပၼ်​မၢင်ႇၵလႃႇ​တႃႉ။- ၸွၼ်ၸူမ်း​လူၺ်ႈ​ၵၼ်​တင်း​ၶဝ်​ၸိူဝ်း​ဢၼ်​ၸူမ်းသိူဝ်း​လႄႈ​ႁွင်ႉႁႆႈ​လူၺ်ႈ​ၵၼ်​တင်း​ၶဝ်​ၸိူဝ်း​ဢၼ်​ႁွင်ႉႁႆႈ​ၼၼ်ႉ​တႃႉ။

ၽေးၸွၼ်း​ပၼ်​ပီႈၼွင်ႉ​ ၶရိၸ်ႈယၢၼ်ႇ၊ ၼင်ႇ​ၵၼ်​ၸိူဝ်း​ဢၼ်​ၸုတ်ႈ​ဢၼ်​လုတ်ႈ​တင်းလၢႆ​လႄႈ​ႁႂ်ႈ​မေႃ​ႁပ်ႉ​ၶၢမ်ႇ​လဵင်ႉလူ​ၶႅၵ်ႇ​တႃႉ။

ႁဝ်း​မီး​တူဝ်​ၶၼ်ႇထႃႇ​ဢၼ်​မီး​ဢၢင်ႇၵႃႇ​လၢႆ​မဵဝ်း​ၼၼ်ႉ​လႄႈ ဢၢင်ႇၵႃႇ​မဵဝ်း​လႂ်​မဵဝ်း​ၼၼ်ႉ​မီး​ဢၵျူဝ်း​ႁင်း​ၽႂ်​ႁင်း​မၼ်း​ဢေႃႈ။- မိူၼ်ၼင်ႇ​ၼၼ်​ပိၵ်ႉသမ်ႉ​ႁဝ်း​မီး​ၵူၼ်း​လၢႆ​ၵေႃႉ​သေၵေႃႈ​ႁဝ်း​လႆႈ​ပဵၼ်​ၸိူဝ်ႉ​ၼင်ႇ​တူဝ်​ၶၼ်ႇထႃႇ​ဢၼ်​လဵဝ်​ၵၼ်​ၼႂ်း​ ၸဝ်ႈ​ၶရိၸ်ႈ၊ ပႃးလဵဝ်​ၵူၺ်း​သေလႄႈ​ႁဝ်း​ၵပ်းသိုပ်ႇ​ၵၼ်​ဝႆႉ​ၸိူဝ်ႉ​ၼင်ႇ​ဢၢင်ႇၵႃႇ​ၼင်ႇ​ၵၼ်​ၼႂ်း​တူဝ်​ၶၼ်ႇထႃႇ​ဢၼ်လဵဝ်​ၼၼ်ႉ​ဢေႃႈ။