Begin nuutنموونە

Wie jy kan word …

Ken jy jouself? Weet jy werklik wie jy is? Meer nog: Onthou jy elke dag wie jy in Christus is? En wie jy elke dag kan word?

Selfkennis is die wortelstelsel van enige verhouding. Hoe sterker ons in onsself geanker is, hoe meer kan ons groei in ander verhoudinge. Hoe meer kan ons groei as mens-soos-Christus en deur die Gees vrugte dra wat ander seën.

Om jouself te ken, vra ’n groot klomp eerlike selfondersoek. Baie gebed. ’n Gewillige hart om sy Gees te hoor. Oop oë vir wat die Woord vir jou wil sê. Die bereidheid om die waarheid vas in die oë te kyk en te sê:

Here, in U sien ek wie ek waarlik is. In en deur U raak my gebrokenheid sigbaar en sien ek my nié-soos-U-wees-nie. Vader, dankie dat ek ook, wanneer ek myself só sien, u ongeag-liefde kan voel en kan weet dat U my áltyd liefhet. Ag, Vader, groei deur my sodat ek sal word wie ek deur U kan wees. Wie ek eintlik is.

Wees moedig genoeg om met eerlikheid na jou hart te kyk. Wees dan dapper genoeg om te verander en toe te laat dat Hy jou beeld nuut maak.

Here, ek wil deur U in myself groei. Amen.