Matayo 28
28
Okuyimbooka kwa Yesu
(Mak 15:42-47; Luk 23:50-56; Yok 19:38-42)
1Esabbiiti neweire, omu kibbambya ekiro ekikwekeera omu wiiki, oMalyamu Magudaleena nʼoMalyamu owondi ni baaba okubona embi omwatairwe omulambo gwa Yesu.
2Nibaikire oku mbi, ni wabbaawo okukankana okwa nsi okwʼamaani, kubba omalaika wa Mukama yazwire omwiguru nʼaiza, nʼagalanzula eibbaale, nʼaliiya oku mulyango gwa mbi nʼaliikaaraku. 3Obusyo bwamwe nibukuseryaserya nkʼeisana, nʼebizwalibwa byamwe nibikwera muno. 4Abalindi ni bakankana olwa kutiina omuno, ni batinduka nkʼabafiire.
5Omalaika nʼakoba abakali abo ati, “Mutatiina mmaite nga mukutoolya oYesu, eyabambirwe oku musaalaba. 6Ani taliwo. Ayimbookere nka ni yakobere. Mwize mubone ekifo waabbaire. 7Mwabe mangu mukobere abeegesebwa baamwe nti, ‘Ayimbookere era abeekereireyo e Galiraaya. Eyo nigyo mwamubonera.’ Muteebeera kyembakobeire.”
8Abakali ni balabuka okuliga oku mbi nibatiinire, baitu era nibaizwire okusemeerwa, ni bairuka okukobera abeegesebwa baamwe. 9Nibaali bakwaba, oYesu nʼabaitirana nʼabakoba ati, “Emirembe gibbe naanywe!” Ni bamusembeera, ni bamukwata amagulu ni bamuramya. 10OYesu nʼabakoba ati, “Mutatiina. Mwabe mukobe abaganda bange baabe e Galiraaya. Eyo nigyo bambonera.”
Obukwenda bwʼabalindi ba mbi
11Abakali nibaali bakwaba, abamwei oku balindi, ni baaba omu kibuga, ni bakobera abakabona ebibbairewo byona byona. 12Abakabona abakulu ni bakumbaana amwei nʼabantu abakulu omwiyanga, ni bateesa, ni baweerya abasirikale empiiya zingi, 13ni babakoba bati, “Mumale mubaze muti, ‘Abeegesebwa baamwe baizire obwire nituwungukire, ni baibba omulambo gwamwe.’ 14Ekyo omufugi niyakiwura, twabawoleezeera ni tubawonia omusango.” 15Abalindi ni batwala empiiya, ni babaza nka nibaakoberwe. Ekigambo ekyo ni kiika woona woona omu Buyudaaya nʼokwica ati.
OYesu akubonekera abeegesebwa baamwe eikumi nʼomwei
(Mak 16:14-18; Luk 24:36-49; Yok 20:19-23; Bik 1:6-8)
16Awo abeegesebwa eikumi nʼomwei ni baaba e Galiraaya, oku lusozi oYesu gyeyabalagiire okwaba. 17Nibaamuboine ni bamuramya. Baitu abamwei oku bo ni bagulucaguluca. 18OYesu nʼabaigeeraku, nʼabakoba ati, “Mpairwe obuyinza bwona omwiguru nʼoku nsi. 19Olwʼekyo mwabe, abantu bʼamanga goona goona mubafoole abeegesebwa bange, nimukubabatiza omwibara rya Ite waiswe, nʼerya Mwana nʼerya Mwoyo Akwera, 20nimukubeegesya okukwata byenabalagiire byona byona. Nje ndi amwei naanywe okwica ensi neriwaawo.”
دیاریکراوەکانی ئێستا:
Matayo 28: RUULI-NYALA
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە