Matáyoso 14
14
Nigú ná Sáŋa Batísite
(Mál 6.14-29; Lúk 9.7-9; 3.19-20)
1Agá gɛsɛgɛl igiány, ofuŋ Elódo mɔ́ɔb bégúmenyi Yésu. 2Uganyɛ gá bél buol bág ká: «Mɔnd uwaány nyɛ Sáŋa Batísite! Ɔwɔ́ unyá guanyɔg gá ebeguén, buád buanda unyá na bugaga báguala bisey ibiány.» 3Búnyɛ ká Elódo mɔyɛ́d ká bádɛgɛn Sáŋa bágɔ́d wɔ́ na masɛŋɛ, beéti wɔ́ agá gians gá mbíne. Búmabá gá busió bá Elodiád agany endimen waga Fílibe. 4Agá meliŋítas, Sáŋa mɔyɔɔ́n Elódo ká: «Bisele digúgufánan bugaga bá gugɔ́l Elodiád anyɛ agany wɔ́w.» 5Elódo mambá guɔ́n Sáŋa, umabiánán gɔg buwa na band gágual ká bámabá bɔ́gɔ́lɔɔn Sáŋa anyɛ ibús. 6Buɔ́s gɔg bá budɔ́mb bá nubiényé ná Elodo, ɔmbúlɔ wa Elodiád uwebíne ogóbusió bá band ɔbɔ́ Elódo máabɛ́lɛ́gɛ́n gá budɔ́mb, mebín amaány amásɛmɛdɛn Elódo. 7Uwabɛ́lia agá eŋís yá band ká, ugeguéŋin ɔmbúlɔ waga buanda gidigid ugogúnuófún wɔ́. 8Inyódió wág gudídígeen wɔ́ ká wɔɔ́yɛ́dɛ́n sié ká: «Mfá aya agá ɛdɔ́ga ibalɛbaliá, ɔduɔ́ wá Sáŋa Batísite.» 9Buand ubuány ubuégényígenyi ofuŋ, ta anaány, anyɛ́ umáabá umámán gúbɛ́liá ogóbúsió bá band bámáabá agá budɔ́mb, uwasásɛ́d ká béŋin wɔ́ waád ɔduɔ́. 10Uwadɔ́m gɔg mɔnd ká wásɔ́mb Sáŋa Batísite ɔduɔ́ agá gians gá mbíne. 11Obólónin ɔmbúlɔ ɔduɔ́ wá Sáŋa agá ɛdɔ́ga ɛbalɛbaliá, uwenéŋín inyódió. 12Bafɔ́nɔfɔ́n bá Sáŋa ɔbɔ́sigɔ́l gikukul kúkúlé gá Sáŋa, obónonyó, guɔyɛ́dɛ́n Yésu buanda gidigid bumáabɛ́dɔ́mbaán.
Yésu ményísí gianta gá giŋi gá band
(Mál 6.30-44; Lúk 9.10-17; Sáŋ 6.1-15)
13Anyɛ́ Yésu mɔɔ́b nsɔ́m ya nigú ná Sáŋa, uwabɔ́lɛ́g agá gilu gá gúbɛ́gɔ́gɛ́d agá gióndɔ. Biŋi bá band bá bɔtísɔn máal na guɔ́b anaány, abáládaan wɔ́ na bɛgɔnd. 14Anyɛ́ Yésu meéselén agá gilu, uwaán gianta gá giŋi gá band, uwaán bɔ́ gɔsɔ́g, uwéŋúgenyi band bɔ́b bámáabá bábɛ́dáŋɔ́na. 15Niɔ́b máal na gusiege, bafɔ́nɔfɔ́n bág abábɛ́sɛdɛnɛn wɔ́, bágányɛ ká: «kɔɔ́m ege nyɛ ayáyá, gɛsɛgɛl saman gudɔ́mb sɔ́n, gúgí gɔg biŋi bá band ká bɔɔ́ndɔ́ manda mágunyá agá bɛdɔŋ.» 16Yésu guondinyi bɔ́ gɔg ká: «Bádigúbianan ká bóndoon agá bɛdɔŋ. Ánufá bɔ́ buanda bágunyá banuá muát.» 17Bafɔ́nɔfɔ́n ganyɛ gág ká: «Dɛgɔ́bianan aya gɔɔ́gɔ muɔbɔ muándɛ na bɛnyɔka bɛ́tán.» 18Uganyɛ ká: «Ónuŋólónín mɔ́ aya.» 19Uwelukumenyi giŋi gá band agá bigud. Uwɔgɔ́l bɛnyɔka bɛ́tán, na muɔbɔ muándɛ, uwedugi busió ugumuana, uwéŋin Gɔdányá nukany, uwad guánsa bɛ́, uwéŋin bafɔ́nɔfɔ́n bág, abáfaan band. 20Abányánan bɔ́bɔ́ bem, obódúgoón. Ɔbɔ́gɔ́l biéns bá bɛnyɔka bímeésién, bímabá agá insada siát na ɛ́yandɛ tás liéŋ. 21Ebe bámáanyánán mabá buanda bá dɔns dútáan, ta guban baábayɔ na bagánd.
Yésu guánda ugumuana wa madɛ́ga
(Mál 6.45-52; Sáŋ 6.16-21)
22Kɔ́ na kɔ́, Yésu uwaal gá bafɔ́nɔfɔ́n bág ká bábɔ́lɛ́g agá gilu bákɛn guám negúné wa manáŋ abɔ́sa ká uwɔ́, usién úgúgí giŋi gá band. 23Umáal úmégúgi gɛ́, uwabɔ́lɛ́g agá nɔgɔnd gá gúbísógólonyí, niɔ́b mɔfuɔ́g wɔ́ ány ɔwɔ́ eŋényé. 24Gilu mabá gígányɛ agá ɔdɛm wá manáŋ abɔ́sa, binob mabá bígíde gɛ́, gágual ká ofufuny móolónín bɔ́ agá busió. 25Anɛ́ budug máabá búgányɛ ayáyá, uwúlín bɔ́, wanda agá madɛ́ga ugumuana. 26Bámáal naguán wɔ́ wanda agá madɛ́ga, abábia buwa. Bɔmɔyɔ́ ká: «Nnyɔl yɛ́!» Buwa ubuál ká bédúm guánsa. 27Kɔ́ na kɔ́, Yésu uwagálɛ́d gá bafɔ́nɔfɔ́n bág, uganyɛ ká: «Nubɛ́kɛ́ndɛ́n ó, yaŋuá wɔ́, nudɛbiá buwa.» 28Piéle uwɔgɔ́l gugál, uganyɛ gá Yésu ká: «Ɔgúnɔ́, aŋuá wɔ́ e? Mfá bugaga béguúl giáy gɔ́w, yánda agá madɛ́ga.» 29Uganyɛ gág ká: «Óló!» Piéle gusem agá gilu, uwanda agá madɛ́ga gá gɔb agá Yésu. 30Anyɛ́ Piéle máanaán ofufuny, buwa ubuádɛgɛn wɔ́, uwedúm gubíŋen agá madɛ́ga, uwánsɛ́d uganyɛ ká: «Ɔgúnɔ́, ndúgun!» 31Kɔ́ na kɔ́, Yésu uwodóŋinyi ɔmbɔ́g uwadɛgɛn wɔ́, uganyɛ gág ká: «Mɔnd wa nŋádáb yá fágɔfág, adimádáb gá giág e?» 32Anyɛ́ bámáabɔ́lɛ́g bɔ́bɔ́ bem bándɛ agá gilu, ofufuny uwédúmbi gulúŋ. 33Bɔsɔ́gɔ́ bámáabá agá gilu, ebéguns enú egegus ogóbusió bá Yésu bágányɛ gág ká: «Agá meliŋítas, anyɛ mɔɔn wa Gɔdányá.»
Giéŋugie agá giéns gá gus gá Genesalɛ́t
(Mál 6.53-56)
34Bámáal na guyɔɔg manáŋ abɔ́sa, ebéneég agá giéns gá gus gá Genesalɛ́t. 35Band bá kɔɔ́m agany abálɛns Yésu, ɔbɔ́nɔyɔɔ́n band bá giéns gá gus igiány, obólonin wɔ́ na band gidigid bámáanɔ́má. 36Bómobísógólónyí wɔ́ ká wádábɛn bɔ́ ká bébísíden odú wá gɛla gág. Ebe gidigid béméebísídén gɛ́, méeŋúgeén.
دیاریکراوەکانی ئێستا:
Matáyoso 14: MMU2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە