لوقا 9
9
عیسا حَواریلاری یولا سالیر
1عیسا اون ایکّی شاگردینی اؤز یانینا چاغیردی و اوللارا قُدرت و اِقتدار وئردی تا واری شیطانلی روحلاری خَلخدَن یازّیا چاخارتالّار و مَریضلیگلَری شفا وئرَلَّر. 2اوللاری یوللادی تا تارئ پادشاهلیگینینگ خوش خَبرینی اعلام ائدلَّر و مَریضلَری شفا وئرَلَّر. 3عیسا اوللارا دئدی: «یول ایچی هئچنه اؤزونز اینن گؤتورمهینز. نه اَل آغاجی، نه توربا، نه چؤرهک، نه پیل و نه ده اضافه رَخت. 4هر ائوده کی بئلَینزی یوئودّولار، او شَهرده اولانانچاز اؤردا قالینز. 5آما اگر او آداملار سیزی یوئودمادیلار، شَهرلَریندَن یازّیا چیخَنده، او شَهرینگ تورپاقینی قیچینزدَن سیلکینز تا اوللار ضدّینه بیر شهادت اولا.» 6پس اوللار یولا دؤشدولار و کَنددَن کَنده گزیرلَردی و واری یئرده تارئ پادشاهلیگینینگ خوش خَبرینی اعلام ائدیرلَردی و مَریضلَری شفا وئریرلَردی.
7او گؤنلَرده هیرودیس حاکم واری بو اولان ایشلَردَن خَبَر اولموشدو و سَخت حیران ایدی و گیج اولموشدو؛ بو سَبریه کی بیر پارا آدام دئییرلَردی کی تَعمید وئرَن یحیا اؤلومدن دئرّیلمیش. 8بیر پارا دئییرلَردی کی اِلیاس پیغمبر ظهور ائدمیش، بیر پارا دا دئییرلَردی کی قَدیم پیغمبرلَرینینگ بیرسی دئرّیلمیش، 9آما هیرودیس حاکم دئییردی: «من اؤزوم فرمان وئردیم کی یحیا باشینی کَسلَّر، پس بو آدام کیم دیر کی بو گپلَری اؤنونگ بارهسینده ائشیدیرَم؟» و تلاش ائدیردی کی عیسایی گؤره.
عیسا بئش مینگ نفره، خورَکی وئریر
10حَواریلار گئری دؤنَنده، واری او ایشلَری کی گؤرموشلَردی عیسایا دئدیلَر. عیسا اوللاری گؤتوردو و اؤزو اینَن بیر بِیتصِیْدا آدلی شَهره آپاردی تا اؤردا تَک اولالّار. 11آما جماعت بوندان خبر اولاندا، اؤنونگ آردی سورا یولا دؤشدولار. عیسا دا اوللاری خوش ایز اینَن قبول ائدی و تارئ پادشاهلیگیندان اوللار اینان دانیشدی و شفایا مُحتاج اولان آداملاری شفا وئردی. 12گؤن باتیردی کی عیسانینگ اون ایکّی شاگردی اؤنونگ یانینا گلدیلَر و دئدیلَر: «بو جمعیتی مُرخص ائد تا بو دئییر و بَردهکی کَندلَره و اَکینلَره گئدَلَّر تا سَرپناه و خورَکی بولالّار، بو سَبریه کی بورا بیر بیابان یئر دیر.» 13آما عیسا اوللارا دئدی: «سیزینگ اؤزونز اوللارا خورَکی وئرینز.» شاگردلَر دئدیلَر: «بیزده بئش دانا چؤرهک و ایکّی دانا بالیقدان آرتیق هئچنه یوخ. بهغیری کی اؤزوموز گئدَک و بو خَلخینگ واریسی ایچی خورَکی آلاک.» 14چونکی اؤردا بئش مینگه یاخین، کیشی وار ایدی. عیسا اؤز شاگردلَرینه دئدی: «اوللاری اَللی-اَللی بئیلهلَرده اوتوردونز.» 15شاگردلَر ده عیسا دئدیگی ایشی گؤردولَر و واریکَسی اوتوردولار. 16عیسا بئش دانا چؤرهکی و ایکّی دانا بالیقی گؤتوردو، گؤیه باخدی و چؤرهکلَر و بالیقلارا بَرکت وئردی. اوندان سورا دا چؤرهکلَری تیکهلهدی و شاگردلَره وئردی، تا خَلخ جلوسینا قؤیالّار. 17واریکَس یئدیلَر و دویدولار و چؤرهکلَر و بالیقلار خوردالاریندان اون ایکّی سَبد دؤلدو.
پِطرُسینگ گواهلیگی عیسا حَقّینده
18بیر گؤن عیسا بیر یئرده تَک دُعا ائدیردی و شاگردلَری ده یانیندا ایدیلار. عیسا اوللاردان خبر آلدی: «خَلخ دئییرلَر من کیمَم؟» 19شاگردلَر جواب وئردیلَر: «بیر پارا دئییرلَر سَن تَعمید وئرَن یحیایانگ، بیر پارا دئییرلَر کی سَن اِلیاس پیغمبرینگ و باقّی آداملار دا دئییرلَر کی قَدیم پیغمبرلَرینینگ بیرسییَنگ کی دئرّیلمیش.» 20عیسا اوللاردان خبر آلدی: «آما سیز نه دئییرینز؟ سیز دئییرَینز من کیمَم؟» پِطرُس جواب وئردی: «سَن تارئنینگ وَعده وئردیگی مَسیحییَنگ.»
21عیسا اوللارا قَدغَن ائدی و فرمان وئردی کی بو گپی هئچ کَسه دئمیَلَّر 22و دئدی: «انسان اوغلو چوخ سَخت زَجرلَر چَکهسی و شیخلَر، باش کاهِنلَر کی مَعبد عالِملَری دیرلَر و تورات معلّملَری طَرفیندَن رَد اولوناسی، اؤنو اؤلدورهسیلَر و او اؤچونجو گؤنده، دئرّیلهسی.»
23اوندان سورا عیسا واریکَسه دئدی: «هَرکَس کی سئیر مَنیم یولومو گئده، اؤز جانیندان اَل چَکسین، هر گؤن اؤز صَلیبینی گؤتورسین و منیم آردیم سورا گلسین. 24بو سَبریه کی هَر کَس کی سئیه اؤز جانینی ساخلایا، اؤنو اَلدن وئرهر آما هَر کَس کی منیم خاطریمه اؤز جانیندان گچه، اؤنو قورتارار. 25آدام ایچی نه فایده واری کی، واری دنیایی اَله گتیره، آما اؤز جانینی اَلدَن وئره یا دا اؤنا ضرر وورا. 26بو سَبریه کی هَر کَس کی مَندَن و منیم سؤزلَریمدَن عاری اولا، انسان اوغلو دا اوندا کی اؤز شوکتی اینَن و بووآسی شوکتی اینَن و مُقدّس فرشتهلَرینگ شوکتی اینَن گله، او آدامدان عاری اولور. 27گرچَکینی سیزه دئییرم، نئچه آدام بوردا تورموشلار کی، تا تارئ پادشاهلیگینی گؤرمهیَلَّر، اؤلمهزلَر.»
عیسا ظاهرینینگ دهییشیلمَکی
28تقریبا سَکّیز گؤن بو گپلَردن سورا عیسا، پِطرُسی و یوحَنّایی و یَعقوبو گؤتوردو و داغا گئتدی تا دُعا ائده. 29ائله او موقع کی دُعا ائدیردی، ایزی دهییشیلدی و رَختلَری آغ آپاغی اولدو 30و ایکّی کیشی عیسا اینان دانیشیرلار ایدی. او ایکّی کیشی موسای پیغمبر و اِلیاس پیغمبر ایدیلَر. 31اوللار شوکت ایچینده، ظاهر اولدولار و عیسانینگ بو دنیادان گئدمَکی بارسینده، کی ائله او تئزلیگده اورشلیم شَهرینده اولوناسیدی، دانیشیرلاردی. 32ائله او موقع پِطرُس اینان یانینداکیلارینگ گؤزلَرینی اوخو باسمیشدی آما اوخولاری قاچاندا عیسانینگ شوکتینی و اؤنونگ اینان توران کیشیلَری گؤردولَر. 33ائله او موقع کی او ایکّی کیشی عیسا یانیندان آیریلیرلاردی، پِطرُس عیسایا دئدی: «اُستاد، نه خوب اولدو کی بیز بوردایاک! قؤی تا بوردا اؤچ سایبان ووراک، بیرسی سَنینگ ایچی، بیرسی موسا ایچی، بیری ده اِلیاس پیغمبرینگ اولسون.» آما پِطرُس بو گپی بیلمَزلیگ اوستوندَن چالدی. 34حَلی گپی تؤکَنمهمیشدی کی بیر بولوت گلدی و اوللار اوستونه کؤلگه آتدی. اوللار بولوت ایچینه گئدَنده، شاگردلَر چوخ قورخدولار. 35بولوتدان بیر سَس گلدی کی دئییردی: «بو منیم اوغلوم دور، منیم سَچدیگیم؛ اؤنونگ سؤزونه قولاق آسینز.» 36او سَس تؤکَنَنده، اوللار عیسایی تَک گؤردولَر. او اؤچ شاگرد هَرنهیی کی گؤرموشلَر ایدی، او گؤنلَرده اؤز یانلاریندا ساخلادیلار و هئچکَسه دئمهدیلَر.
شیطانلی روحا گرفتار اولان اوغلونگ شفاسی
37او گؤنونگ صاباسی داغدان آشاغی گلَنده، بیر بویوک جمعیت عیسا پیشوازینا گئتدیلَر. 38بیردَن بیر کیشی جمعیت ایچیندَن اوجا سَس اینَن دئدی: «اُستاد، سَنه یالواریرام کی مَنیم اوغلوم حالینا بیر گوشا نَظر ائدینگ، من ائله بو بیر اوشاقی واریم. 39بیر شیطانلی روح اوغلومو توتیر و او بیردَن بَغیرماگا باشلاییر، غَشّ ائدیر و آغیزیندان کف گئدیر، او شیطانلی روح اؤنو یارالاییر و چوخ سَخت اؤنو ویل ائدیر. 40سنینگ شاگردلَرینگه یالواردیم کی او روحو اؤنونگ ایچیندَن چاخارتالّار، آما باشارمادیلار.» 41عیسا جواب وئردی: «ای ایمان سیز و ناخَلَف نَسل! هاچانانچاز سیزینگ اینَن اولام و سیزی تَحمّل ائدَم؟ اوغلونگو بورا گتیر.» 42اوغول عیسا یانینا گلَنده، شیطانلی روح اؤنو یئره ووردو و اؤنو چابالاماگا آتدی. آما عیسا او شَریر روحا تَشَر ووردو و اوغلو شفا وئردی و اؤنو بووآسینا گئری وئردی. 43واری خَلخ تارئنینگ عَظمتیندَن مات قالدیلار.
ائله بو حالدا کی خَلخ عیسانینگ واری ایشلَریندَن حیران قالمیشلاردی، عیسا اؤز شاگردلَرینه دئدی: 44«بو سؤزلَریم قولاقینزدا اولسون: بو تئزلیگده انسان اوغلو آداملار اَلینه وئریلَر.» 45آما اوللار حالیلاری اولمادی کی عیسا نه دئییر و بو گپینگ مَعنیسی اوللاردان پنهان ائدی تا اؤنو آنگلامیالّار. قورخیرلاردی ده کی بو گپینگ بارهسینده عیسادان خبر آلالّار.
بویوک اولماگ نه منه ده دیر؟
46شاگردلَر آراسیندا بیر گپ اولدو کی کیم واریکَسدَن بویوکتر دیر. 47عیسا کی اوللارینگ فکرلَریندَن آگاه ایدی، بیر اوشاقی گؤتوردو و اؤز یانینا اوتورتدو 48و اوللارا دئدی: «هَر کَس بو اوشاقی منیم آدیمدا قبول ائده، منی قبول ائدیر، و هَر کَس ده کی منی قبول ائده، منی یوللایانی قبول ائدیر. چونکی سیزینگ آراینزدا بویوک، او آدام دیر کی واریکَسدَن کوچوک دیر.»
49یوحَنّا دئدی: «اُستاد، بیز بیر کیشییی گؤردوک کی سَنینگ آدینگدا، شیطانلی روحلاری یازّیا چاخارتیردی آما چونکی بیزدَن دهییلدی، تلاش ائدیک قؤیمایاک بو ایشی گؤره.» 50عیسا اؤنا دئدی: «اؤنونگ جلوسینی توتماینز، بو سَبریه کی هَر کَس سیزینگ ضدّینزه اولمایا، سیزینگ اینَن دیر.»
سامِرهده، بیر کَندینگ خَلخی، عیسایی قبول ائدمئیرلَر
51اوندا کی عیسانینگ گؤیه آپاریلماکی وختی یاخین اولیردی، تَصمیم توتدو کی اورشلیم شَهرینه گئده 52و اؤزوندَن ایلَری، ائلچیلَر یوللادی. اوللار یولا دؤشدولار و سامِره منطقهسینینگ بیر کَندینه گئتدیلَر تا عیسا ایچی تدارک گؤرَلَّر. 53آما او کَندینگ آداملاری اؤنو قبول ائدمهدیلَر، بو سَبریه کی آلهیین ایدی کی او، اورشلیم شَهرینه ساری گئدیر. 54عیسانینگ شاگردلَری یَعقوب و یوحَنّا، بو جریانی گؤرَنده، دئدیلَر: «آقا، سئیرَینگ دئیهک گؤیدَن اوت یاغا و بوللارینگ واریسینی نابود ائده؟» 55آما عیسا بؤکولدو و اوللاری هَیلهدی و دئدی: «سیز بیلمئیرَینز هانی روح داناینز. 56چونکی انسان اوغلو گلمهمیش تا خَلخینگ جانینی آلا، بلکی گلمیش تا اوللاری نجات وئره.» و اوللار بیر آیری کَنده گئتدیلَر.
عیسا آردی سورا گئدمَکینگ بَهاسی
57یولدا گئدَنده بیر کیشی عیسایا دئدی: «هر یئره کی گئدَینگ، من سَنینگ آردینگ سورا گَلَرَم.» 58عیسا اؤنا دئدی: «تیلکیلَر ایچی دَلیگ وار و گؤیینگ قوشلاری ایچی ده یووآ وار، آما من کی انسان اوغلویام، هئچ باش دایاماک یئری ده یوخوم.» 59عیسا بیر آیری آداما دئدی: «منیم آردیم سورا گَل.» آما او جواب وئردی: «آقا، قؤی تا گئدَم، بووآم اؤلنده اؤنو تورپاقا تاپشیرام دا اوندان سورا گلَرَم.» 60عیسا او آداما دئدی: «قؤی تا اؤلولَر، اؤز اؤلولَرینی تاپشیرالار، سَن گئد و تارئ پادشاهلیگینینگ خوش خَبرینی اعلام ائد.» 61بیر آیری آدام دئدی: «آقا، من سنینگ آردینگ سورا گَلَرَم، آما قؤی تا اَوّل گئدَم و اوبامینگ آدامی اینان خدافظلیگ ائدَم.» 62عیسا اؤنا دئدی: «او آدام کی یئری خیش ائدمَکه باشلاییر و بؤکولور دالی آردینا باخیر، تارئ پادشاهلیگینا یاراشماز.»
دیاریکراوەکانی ئێستا:
لوقا 9: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company