یوحنا 17
17
عیسا دُعاسی، اؤزو ایچی
1عیسا بو سؤزلَری دئیَندن سورا، گؤیه باخدی و دئدی: «ای گؤیدهکی بووآ، او موقع ائتیشمیش. اؤز اوغلونگ شوکتینی آشکار ائد، تا اوغلونگ ده سنینگ شوکتینگی آشکار ائده. 2بو سَبریه کی سن اؤز اوغلونگا، بو اختیاری وئرمیشَینگ کی واری آداملارا زندلیگ وئره، تا واری اوللارا کی سن اؤنا وئرمیشَینگ، اَبَدی زندلیگ وئره. 3و اَبَدی زندلیگ بو دور کی اوللار سنی کی واحد حَقیقی تارئیانگ و یوللادیگینگ عیسا مَسیحی تانیالّار. 4من او ایشی کی سن بئلمه تاپشیردینگ، یئرینه ائتیشتیردیم و بئلهیین، سنینگ شوکتینگی یئر اوستونده آشکار ائدیم. 5ایندی ای بووآ، منی ائله او شوکته کی سنینگ اینن واریم ایدی، ائتیرد؛ ائله او شوکت کی دنیا یارانماگیندان ایلَری، سَنینگ یانینگدا واریم ایدی.
عیسا دُعاسی، اؤز شاگردلَری ایچی
6«من سنینگ آدینگی اوللارا کی بو دنیادان منه وئردینگ، آشکار ائدمیشَم. اوللار سنینگکی ایدیلر و سن اوللاری منه وئردینگ و اوللار دا سنینگ سؤزونگه عَمل ائدمیشلَر. 7ایندی اوللار بیلیرلَر کی هر سؤز کی من دئییرم، سنینگ طَرفینگدَن دیر. 8منه تاپشیردیگینگ سؤزلَری، اوللارا تاپشیرمیشام و اوللار او سؤزلری قبول ائدمیشلَر. اوللار گرچَکدن بیلمیشلَر کی من سنینگ یانینگدان گلمیشَم و اینانمیشلار کی سن منی یوللامیشانگ.
9«من اوللار ایچی کی سن منه وئرمیشَینگ دُعا ائدیرم. من او آداملار ایچی کی بو دنیایا تَعلّق وارلاری دُعا ائدمئیرم بلکی سن منه وئردیگی آداملار ایچی دُعا ائدیرم بو خاطره کی اوللار سنینگکی دیرلَر. 10واری او آداملار کی منیمکی دیرلَر، سنینگکی دیرلَر و واری او آداملار کی سنینگکی دیرلَر، منیمکی دیرلَر؛ منیم شوکتیم اوللار طَریقیندن آشکار اولیر. 11من بوندان آرتیق بو دنیادا قالمئیرام؛ من سنینگ یانینگا گلیرَم. آما اوللار حلی بو دنیا ایچینده دیرلَر. ای قُدّوس بووآ، اوللاری اؤز آدینگا وفالی ساخلات، ائله او آدا کی سن منیم طَریقیمدن آشکار ائدمیشَینگ، تا اوللار دا بیر اولالّار، ائله اولهیین کی بیز بیرَک. 12من اوندایانچاز کی اوللار اینان ایدیم، بئللرینی سنینگ آدینگا وفالی ساخلاتدیم، ائله او آدا کی سن منیم طَریقیمدن آشکار ائدمیشَینگ. من اوللاری حفظ ائدمیشَم و اوللارینگ هئچ بیری اَلدن گئدمهمیش بهغیری او کی هلاکته لایق ایدی، تا بئله مُقدّس یازیلیلار یئرینه ائتیشه.
13«ایندی من گلیرَم سنینگ یانینگا. من بو سؤزلَری وختی حلی اوللار اینان بو دنیا ایچیندهیَم دئمیشم، تا اؤرهکلَری منیم شادلیگیمدان دؤلو اولا. 14من سنینگ کلامینگی اوللارا وئرمیشَم. دنیا اوللاردان نفرت واری ایمیش، چونکی اوللار بو دنیایا تَعلّق یوخلاری، ائله اولهیین کی من بو دنیایا تَعلّق یوخوم. 15من سئمئیرَم کی اوللاری بو دنیادان آپارانگ، بلکی سئیرَم کی اوللاری شَریردن ساخلاتانگ. 16اوللار بو دنیایا تَعلّق یوخلاری، ائله اولهیین کی من بو دنیایا تَعلّق یوخوم. 17اوللاری حَقیقتده ساخلا تا سنه وَقف اولونالّار؛ سَنینگ کلامینگ حَقیقت دیر. 18ائله اولهیین کی سَن منی بو دنیا ایچینه یوللادینگ، من ده اوللاری بو دنیا ایچینه یوللامیشام. 19من اوللار خاطرینه اؤزومو سنه وَقف ائدمیشَم تا اوللار دا حَقیقتده، سنه وَقف اولونالّار.
عیسا دُعاسی، واری اوللار ایچی کی اؤنا ایمان گتیرَرلَر
20«من فقط بو شاگردلَر ایچی دُعا ائدمئیرم، بلکی او آداملار ایچی دا کی بو شاگردلَر طَریقیندن منه ایمان گتیرَرلر دُعا ائدیرم. 21ای گؤیدهکی بووآ، سن مَندهینگ و من ده سَندهیم. پس دُعا ائدیرم تا ائله اولهیین کی بیز بیرَک، اوللار دا واری بیر اولالّار؛ و دُعا ائدیرم کی اوللار دا بیزده اولالّار، تا دنیا اینانا کی سن منی یوللامیشانگ. 22من او شوکتی کی سن منیم طَریقیمدن آشکار ائدمیشَینگ، اوللارا وئرمیشَم تا ائله اولهیین کی بیز بیرَک، اوللار دا بیر اولالّار، 23و تا ائله اولهیین کی سَن مَندهینگ، من دا اوللاردا اولام. دُعا ائدیرم کی اوللار بورّی بیر اولالّار تا دنیا بیله کی سن منی یوللامیشانگ و ائله اولهیین کی منی چوخ سئیرَینگ، اوللاری دا چوخ سئیرَینگ.
24«ای گؤیدهکی بووآ، سئیرَم اوللار کی منه وئرمیشَینگ ائله اؤردا کی من وارام، منیم اینَن اولالّار، تا منیم شوکتیمی گؤرَلَّر. ائله او شوکتی کی سَن منه وئرمیشَینگ، بو خاطره کی دنیا بَنا بُنیادی قؤیولاندان ایلَری سَن منی چوخ سئیردینگ. 25ای عادل بووآ، هرچند دنیا سَنی تانیمئیر، آما من سَنی تانییرام و بوللار دا کی سن منه وئرمیشَینگ، بیلمیشلَر کی سن منی یوللامیشانگ. 26من سَنینگ آدینگی اوللارا تانیدیرمیشام و تانیدیرارام، تا او مُحبّت کی سَن منه وارینگ، اوللاردا دا اولا و من ده اوللاردا اولام.»
دیاریکراوەکانی ئێستا:
یوحنا 17: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company