یوحنا 14
14
عیسا یول دیر، حَقیقت دیر، زندلیگ دیر
1«اؤرهکینز پریشان اولماسین، تارئیا ایمان وارینز اولسون؛ منه ده ایمان وارینز اولسون. 2منیم گؤیدهکی بووآم ائوینده چوخ اُتاق وار. اگر بئلهیین دهییلدی، سیزه دئیهردیم. من گئدیرَم تا بئلَینز ایچی یئر آماده ائدَم. 3و اوندا کی گئتدیم و سیزه یئر آماده ائدیم، گئنه گلَرَم و سیزی اؤز یانیما آپارارام تا سیز ده ائله اؤردا اولاینز کی من وارام. 4من گئدَن یئرینگ یولونو سیز بیلیرَینز.» 5توما عیسایا دئدی: «آقا، بیز هئچ بیلمئیرَک سن هارا گئدیرَینگ، اؤرانینگ یولونو هاردان بیلَک؟» 6عیسا تومایا دئدی: «من یول و حَقیقت و زندلیگم. هئچکَس گؤیدهکی بووآ یانینا گلمَز، بهغیری منیم طَریقیمدن. 7اگر منی تانیسایدینز، منیم گؤیدهکی بووآمی دا تانیاردینز؛ ایندیدَن بئله اؤنو تانییراینز و اؤنو گؤرموشَینز.» 8فیلیپُس عیسایا دئدی: «آقا، گؤیدهکی بووآیی بیزه گؤرسَد، ائله بو بیزه بَس دیر.» 9عیسا اؤنا دئدی: «فیلیپُس، من چوخ وخت دیر سیزینگ اینَنَم، سَن حَلی ده آنگلامامیشانگ من کیمَم؟ هَر کَس کی منی گؤرموش، گؤیدهکی بووآیی گؤرموش؛ نهیین دئیه بیلیرَینگ: ”گؤیدهکی بووآیی بیزه گؤرسَد؟“ 10اینانمئیرانگ کی من بووآدایام و بووآ منده دیر؟ بو سؤزلَر کی سیزه دئییرم، اؤز یانیمدان دهییل، بلکی گؤیدهکی بووآ کی مَنده مَنزل واری اؤز ایشلَرینی منیم طَریقیمدن گؤرور. 11منیم بو سؤزومو اینانینز کی من بووآدایام و بووآ منده دیر؛ یوخسا او ایشلَر سَبرسینه کی گؤرورَم اینانینز. 12گرچَکینی سیزه دئییرم، مَنه ایمانی اولان آدام، ائله من گؤرَن ایشلَری ده گؤرَر، و حتّی اوندان بویوکتر ایشلَر ده گؤرَر، چونکی من گئدیرَم گؤیدهکی بووآ یانینا. 13هَرنهیی کی منیم آدیمدا سئیَنز، من اؤنو ائدهرَم تا گؤیدهکی بووآنینگ شوکتی اوغول طَریقیندن، آشکار اولا. 14اگر منیم آدیمدا بیر زاد مندن سئیَینز، اؤنو ائدهرَم.
عیسا وَعده وئریر کی تارئ، اؤز قُدّوس روحونو یوللایار
15«اگر منی چوخ سئیَینز، منیم حکملریمه عَمل ائدهرَینز. 16من گؤیدهکی بووآدان سئیَرم و او بیر آیری کؤمَکچی یعنی اؤز قُدّوس روحونو سیزه وئرهر کی همیشه سیزینگ اینَن اولا. 17او کؤمَکچی تارئنینگ حَقیقت روحو دیر کی دنیا اؤنو قبول ائده بیلمئیر، بو سَبریه کی اؤنو نه گؤرور، نه ده تانییر. آما سیز اؤنو تانیراینز، بو خاطره کی او سیزینگ یانینزدا مَنزل ائدیر و وجودینز ایچینده اولور.
18«سیزی بیکَس قؤیمام؛ گلَرَم یانینزا. 19بیر آز مُدّتدَن سورا دنیا داها منی گؤرمَز، آما سیز منی گؤرَرَینز. بو خاطره کی من گئنه زندلیگ ائدهرَم، سیز ده زندلیگ ائدهرَینز. 20او زامان ائتیشنده، بیلَرَینز کی من بووآدایام و سیز مندهیَینز و من سیزدهیَم. 21منی چوخ سئیَن آدام، او آدام دیر کی منیم حکملریمه قولاق آسیر و اوللارا عَمل ائدیر. گؤیدهکی بووآم منی چوخ سئیَن آدامی چوخ سئیَر و من ده اؤنو چوخ سئیَرم و اؤزومو اؤنا گؤرسَدهرَم.»
22یَهودا، نه یَهودا اَسخَریوط، عیسایا دئدی: «آقا، نهیین دیر کی اؤزونگو بیزه گؤرسَدهرَینگ آما بو دنیانینگ آداملارینا گؤرسَدمهینگ؟» 23عیسا جواب وئردی: «منی چوخ سئیَن آدام، منیم سؤزلریمه عَمل ائدهر. گؤیدهکی بووآم دا اؤنو چوخ سئیَر و بیز گلَرَک اؤنونگ یانینا و اؤنونگ اینَن مَنزل ائدهرَک. 24منی چوخ سئمیَن آدام، منیم سؤزلَریمه عَمل ائدمز. بو سؤزلَر کی ائشیدیرَینز مندَن دهییل، بلکی منی یوللایان گؤیدهکی بووآدان دیر.
25«بو سؤزلَری وختی حلی سیزینگ اینَنَم بئلَینزه دئمیشَم. 26آما اوندا کی من گئدَم، گؤیدهکی بووآ منیم آدیمدا او کؤمَکچییی، یعنی اؤز قُدّوس روحونو یوللایار. قُدّوس روح واری زادی سیزه اؤرگدهر و هَرنهیی کی من سیزه دئمیشم، یادینزا سالار. 27سیزینگ ایچی صُلح و سلامتلیگ قؤییرام؛ اؤز صُلح و سلامتلیگیمی سیزه وئریرَم. من سیزه وئردیگی صُلح و سلامتلیگی، دنیا سیزه وئره بیلمَز. اؤرهکینز پریشان اولماسین و قؤیماینز اؤرهکینزه قورخو دؤشه. 28ائله او طور کی سیزه دئدیم، من گئدیرَم آما گئنه گلَرَم یانینزا. اگر سیز گرچَکدن منی چوخ سئیردینز، شادمان اولاردینز کی من گئدیرَم گؤیدهکی بووآ یانینا، چونکی بووآ مندَن بویوکتر دیر. 29ایندی بونو، اولونماگیندان ایلَری سیزه دئمیشم، تا اوندا کی اولوندو ایمان گتیرَینز. 30داها سیزینگ اینَن دانیشماک ایچی چوخ فُرصت قالمامیش، بو سَبریه کی بو دنیانینگ رئیسی کی شیطان دیر، گلیر. آما او منیم اوستومه هئچ قُدرت یوخو؛ 31من او ایشی گؤرورَم کی بووآ منه حکم ائدمیش، تا دنیا بیله کی من گؤیدهکی بووآیی چوخ سئیرَم. تورینز آیاقی، بوردان گئدَک.
دیاریکراوەکانی ئێستا:
یوحنا 14: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company