एफिसि 1
1
सेउपाखा
1परमेस्वरको छाल्न्हाका चात्या जेङलि चुनिका का पावल, येसु ख्रिस्टता खाङधुरि पाका एफिसस सहरता हिका परमेस्वरको पबित्तरो जनगेलाइहेङ इदोइ पात्तारा लेखेदोङखा।
2का प्रार्थाना पाखा, कि केलाइको आबा परमेस्वर कालाउ प्रभु येसु ख्रिस्ट नेलाइ झाराङहेङ आनुग्रह कालाउ सान्ति प्याको।
ख्रिस्टता आत्मिक आसिस
3केलाइको प्रभु येसु ख्रिस्टको आबा परमेस्वरहेङ बाखानाइ ज्याको। हाइपालिपानु केलाइको ख्रिस्ट दोफाको सम्बन्धको कारन, वा केलाइहेङ स्वर्गसो लोका आसिस पितेङ गोताङ खाल्होइ आत्मिक रुपता आसिस पिका हि। 4परमेस्वर सुमिङ सिरजाइका खान्तेङ लाम्फा केलाइको ख्रिस्ट दोफाको सम्बन्धको कारन केलाइहेङ चुनिहि। कालाउकि केलाइ वाको आगाता पबित्तरो कालाउ निस्कलङ जेङलि द्वाको। 5परमेस्वर केलाइहेङ प्रेम पाकानाङ येसु ख्रिस्ट पाहासो केलाइहेङ ताइको सान्तान जेङलि लाम्फोरतिसोङ निर्नय पाका हिघाहि। कालाउ परमेस्वर इदोइ ताइकोङ खुसि कालाउ इच्छा आन्सार पाका हिघाहि। 6कालाउकि केलाइ वाको बार्का आनुग्रहको भाअ्सिङ परमेस्वरको बाखानाइ पालि द्वाको। या वा ताइको चान दोफाको केलाइको सम्बन्धको कारन केलाइहेङ एन्साङ पिका हि। 7ख्रिस्ट केलाइको भाअ्सिङ ताइको हिति होपातेङ सिकानाङ केलाइको पाप स्यामा जेङका हि कालाउ केलाइ स्वतन्तरो जेङका हिनाहि। ओह, परमेस्वरको आनुग्रह हेथे माहान हि, जाइ वा केलाइहेङ प्रसस्त पिका हि। 8परमेस्वर ताइको गोताङ बुद्दि कालाउ ग्यानता केलाइहेङ प्रसस्त आनुग्रह पिका हि। 9परमेस्वर ताइको योजाना आन्सार पाहि, कालाउ केलाइहेङ म्होन्हाका योजाना तिङपाहि, जेदोङ वा लाम्फाङ ख्रिस्ट पाहासो पुरा पालि योजाना पाका हिघाहि। 10योजाना चाहि या हि: ठिक सोमोइता परमेस्वर स्वर्ग कालाउ प्रिथिबिता हिका गोताङ आनेमानेगेलाइ ख्रिस्टको खाबाराता चुमावा।
11हाइपालिपानु गोताङ काथा परमेस्वरको योजाना कालाउ निर्नय आन्सार जेङका हि। परमेस्वर केलाइ यहुदिगेलाइहेङ बुङ ताइकोङ इच्छा आन्सार केलाइको ख्रिस्ट दोफाको सम्बनधको कारन इदोइ चाहि परमेस्वर लाम्फासोङ पाका निर्नय आन्सार पाका हि। 12परमेस्वर एसा पाहि, कालाउकि केलाइ यहुदिगेलाइ जाइ ख्रिस्टता लाम्फासोङ आस ताअ्का हिनाहि, केलाइ परमेस्वरको बाखिन कालाउ महिमा पाइने। 13नेलाइ दोफा बुङ इन्सिकाङ जेङहि। नेलाइ बुङ सत्ये सन्देस हिङसुन्हा, जेदोङ चाहि परमेस्वर नेलाइहेङ मुक्ति पिका बारेता सुसमाचार हि। जेलाउ नेलाइ ख्रिस्टता खाङधुरि पास्वाना, परमेस्वर नेलाइहेङ काङको दोङ दोअ्तेङ तिङपालि वा प्रतिग्या पाका पबित्तरो आत्मा प्याङ। 14हाइपालिपानु परमेस्वर केलाइहेङ पबित्तरो आत्मा पिलि दोका हि पानु, पाक्का दोङ वा केलाइहेङ प्रतिग्या पाका आरु रेम्का आमेनेगेलाइ बुङ प्याङ। कालाउ या जेनावा जेलाउ परमेस्वर केलाइहेङ वाकोङ द्याङगेलाइको रुपता पुर्न रितहोइ लाअ्पावा। कालाउकि केलाइ परमेस्वरको बाखिन कालाउ महिमा पाइने।
धन्यबाद कालाउ प्रार्थाना
15इदोइ गोताङको कारन जेलाउ का नेलाइको प्रभु येसुता खाङधुरि कालाउ गोताङ परमेस्वरको जनगेलाइको भाअ्सिङ नेलाइको प्रेमको बिसोइता हिङखा, 16का जेलाउ बुङ नेलाइको भाअ्सिङ परमेस्वरहेङ धन्यबाद पितेङ ह्याङका, कालाउ काङको प्रार्थानाता का नेलाइहेङ फोम पातेङ हिखा। 17का परमेस्वर दोफा प्रार्थाना पाखा, कि केलाइको प्रभु येसु ख्रिस्टको महिमाको आबा नेलाइहेङ आत्मिक बुद्दि कालाउ ग्यान प्याको कालाउ वासेहेङ बुङ परमेस्वर हासु दोअ्तेङ बुझिलि ग्यान प्याको। 18का या बुङ प्रार्थाना पाखा कि, वा नेलाइको ह्रदय हेअ्प्याको, कि हिदोइ आसको भाअ्सिङ वा नेलाइहेङ काइका हि, कालाउ परमेस्वरको जनगेलाइ निङलि गोइका आसिस हेथे बारका कालाउ महिमामय हि दोअ्तेङ नेलाइ गिलि दोसु। 19कालाउ केलाइ ख्रिस्टता खाङधुरि पाकालाइको भाअ्सिङ परमेस्वरको सरबुङ हेथे माहान हि, दोअ्का काथा नेलाइ बुङ गिका का भोखा। 20या ओदोङ माहान सरबुङ दोङ हि, जाइ पाहासो परमेस्वर ख्रिस्टहेङ सिकासो आरोङ सिन्हु पालाउ कालाउ वा ख्रिस्टहेङ स्वर्गता ताइको दाम्पाहा साम्मानको थामेता योम्पाहि। 21इन्ता ख्रिस्ट गोताङ सासकगेलाइ, आधिकारिगेलाइ, सरबुङगेलाइ, कालाउ राजागेलाइ खान्तेङ ह्रुता, कालाउ इदोइ युगको खिनिङ माको, कालाउ लोका युगता बुङ गोताङ उपादिगेलाइ खान्तेङ झाउका हि। 22परमेस्वर गोताङ काथागेलाइ ख्रिस्टको खाबाराता ताअ्पिहि, कालाउ मन्डलिको भालाइको भाअ्सिङ गोताङ काथा ह्रुता वासेहेङ परमेस्वर आगुवा बानाइहि। 23मन्डलि चाहि ख्रिस्टको जिउ हि, जेसाङ वा सारा सुमिङता ताइको सरबुङको प्रयोग पाखे, एन्साङ पातेङ ख्रिस्ट ताइको सारा सरबुङको प्रयोग केलाइको माझाता पाखे।
دیاریکراوەکانی ئێستا:
एफिसि 1: DHINT
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Dhimal New Testament, by The Love Fellowship is licensed under Creative Commons Attribution-ShareAlike 4.0 License.