1 कोरिन्थि 6
6
ता-ताइमिता मुद्दा सुल्झाइसु
1जेसापा नेलाइ मध्येसो एमि खान्धुराइ द्याङ भेनेङ खान्धुराइ ओने दोफा फेसुका हि पानु, न्यायको भाअ्सिङ आदालतता मान्हाको भरु ताइको मन्डलिको आरु खान्धुराइगेलाइकोता हानितेङ, हासु चाहि सहि हि दोअ्का काथाको निर्नय पालि लागाइलि गोइखे। 2नेलाइहेङ थाहा दोङ हि कि भबिस्यता परमेस्वरको जनगेलाइ दोङ इदोइ सुमिङको द्याङगेलाइको न्याय पावा। ओदोङ भाअ्सिङ इसिका म्हुइका फेसुका मिलि पालि ते नेलाइ ताइमिङ दोस्वाना। 3नेलाइहेङ थाहा हि, कि भबिस्यता केलाइ स्वर्गसो ओल्लेपाका दुतगेलाइको न्याय पाङ, ओदोङ भाअ्सिङ केलाइ दिनाङको समस्या ताइमिङ सुल्झाइलि द्वाङ। 4इसिका फेसुका जेङलाउ नेलाइ इङको काथा मिलि पालि खान्धुराइ आदार मापाका द्याङकोता माचुम्पुसु। 5का नेलाइहेङ लेदेरपालि या दोअ्दोङखा। हाइ नेलाइको मन्डलिता खान्धुराइ ओनेगेलाइको फेसुका मिलि पालि एमि बुङ बुद्दिमान द्याङ मान्थु रो? 6कालाउ एमि खान्धुराइ ओने भेनेङ खान्धुराइ ओनेको बिरोधता आदालातता हानिखे, कालाउ परमेस्वरहेङ मानाल्का कोता हानितेङ फेसुका मिलिपाखे।
7जेलाउ नेलाइ मध्ये हासु बुङ भेनेङ खान्धुराइ ओनेहेङ फेसुका मिलि पालि आदालातता चुम्पुखे पानु, नेलाइ खाङधुरिता जियाइलि आसफल जेङका तिङपाखे। भरु आरु खान्धुराइगेलाइ दोङ नेलाइको गल्ति तिङपाको। कालाउ जेसापा हिदोइ बुङ खान्धुराइ ओने नासेहेङ थगितेङ नाङको हाइ दोङ चुम्पुनु वासेहेङ हाइ दोङ मापा। 8कालाउ नेलाइते ताइकोङ खान्धुराइ ओनेगेलाइहेङ आन्याय पासुखेना कालाउ थगिसुखेना।
9दुस्ट द्याङगेलाइ परमेस्वरको सासनता दुल्लि मानिनाङ दोअ्का काथा नेलाइहेङ थाहा दोङ हि। हासु बुङ नेलाइहेङ धोका मापियाको, छाडा काम पाका द्याङगेलाइ, मुर्ति पुजा पाकालाइ, कासिबिरिगेलाइ, बेजान दोफा बेजान जिम्कालाइ, वाबाल दोफा वाबाल जिम्कालाइ, 10खुकालाइ, दिकालाइ, म्हाकालाइ, मन्दा माताकालाइ, धाताइकालाइ परमेस्वरको सासनता दुल्लि मानिनाङ। 11नेलाइ हेथेते इन्सिकाङ हिघासुखेना, कालाउ परमेस्वर नेलाइको पाप झाअ्पिहि, कालाउ प्रभु येसु ख्रिस्टको मिङता केलाइहेङ पबित्तरो आत्मासो धर्मि कालाउ पबित्तरो बानाइहि।
कासिबिरि
12आधिमि दोअ्तावा, “का हाइ दोङ पालाउ बुङ जेनाङ” कालाउ गोताङ काथाहोइ नेलाइको भालाइ मापाखे। का दोअ्लि दोअ्धाङका, “का जेदोङ पालाउ बुङ जेनाङ” हाइपालिपानु का ख्रिस्टको हिघा, का हिदोइ बुङ काथाको आधिनता हिलि माखाङका। 13आधिमि दोअ्तावा, “चाका आनेमाने जिउको भाअ्सिङ, कालाउ जिउ चाहि चाका आनेमानेको भाअ्सिङ हि।” इङको थिकोङ हि, कालाउ परमेस्वर केलाइको जिउ कालाउ चाका आनेमाने न्हेमिहेङ नासा पाङ। केलाइको जिउ कासिबिरिको भाअ्सिङ माको, कालाउ केलाइको जिउ चाहि प्रभुको भाअ्सिङ हि, कालाउ प्रभुको सेवा पालिको भाअ्सिङ हि। 14केलाइको जिउ महत्व पुर्न हि, हाइपालिपानु जेसाङ परमेस्वर प्रभु येसुहेङ ताइको सरबुङसो सिकासो सिन्चाल पाहि, कालाउ केलाइहेङ बुङ वाको सरबुङसो सिकासो सिन्हु पाङ। 15नेलाइको जिउ ख्रिस्टको जिउको आङगगेलाइ दोङ हि दोअ्का काथा नेलाइहेङ थाहा दोङ हि। एन्सा पानु हाइ का ख्रिस्टको आङगगेलाइ चुम्पुतेङ कासिबिरिको आसुद्द आङग बानाइलि? मिधुलाउ बुङ माको। 16कासिबिरिकोता हानिका कासिबिरि दोफा एनोङ दोङ जिउ जेङखे दोअ्का काथा नेलाइहेङ थाहा दोङ हि। हाइपालिपानु धर्मसास्तरता इसिका लेखेका हि, “उङको न्हेमि एनोङ दोङ जिउ जेनावा।” 17कालाउ जाइ प्रभु दोफा ए-जेङखे, वाको आत्मा कालाउ प्रभुको आत्मा बुङ एनोङ दोङ जेनावा।
18कासिबिरिसो दुरे दोङ हिसु, आरु हिसिकालाउ बुङ पाप द्याङ पाखे, इङको जिउसो बाहार दोङ पाखे, कालाउ कासिबिरि पाका ताइकोङ जिउको बिरोधता पाप पाखे। 19नेलाइहेङ थाहा दोङ हि, कि नेलाइको जिउ पबित्तरो आत्माको मुन्दिर दोङ हि। परमेस्वर पिका पबित्तरो आत्मा दोङ नेलाइको जिउ लिता बासा हिखे, ओदोङ भाअ्सिङ नेलाइ परमेस्वरको दोङ हिसुना। 20हाइपालिपानु नेलाइहेङ परमेस्वर दाम तिरितेङ चोल्का हि। ओदोङ भाअ्सिङ नेलाइ ताइको जिउसो परमेस्वरको महिमा पासु।
دیاریکراوەکانی ئێستا:
1 कोरिन्थि 6: DHINT
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Dhimal New Testament, by The Love Fellowship is licensed under Creative Commons Attribution-ShareAlike 4.0 License.