পত্থম 25
25
অব্রাহামর অন্য বংশগুনো কধা
1অব্রাহামে কটূরা নাঙে আর এক্কো মিলেরে ললঅ। 2সিবে পেদত্ সিম্রণ, যক্ষণ, মদান, মিদিয়ন, যিশ্বক আর শূহর জর্ম ওইয়্যে। 3শিবা আর দদানে এলাক যক্ষণ ঝি-পুয়ো। অশূরীয়, লটূশীয় আর লিয়ূম্মীয়গুনে এলাক দদান বংশর মানুচ্। 4ঐফা, এফর, হনোক, অবীদ আর ইল্দায়া এলাক মিদিয়ন ঝি-পুয়ো। ইগুন বেক্কুনে এলাক কটূর ঝি-পুয়ো আর তা ঝি-পুয়োগুনোর বংশ।
5অব্রাহামে তার বেক্ ধন-সোম্বত্তিগানি ইস্হাকরে দিলো। 6তার আর এক্কো মোগোর্ ঝি-পুয়োগুনোরেয়ো তে বাঁজি থাগদে ভালোক্কানি দান গোজ্যে। এ ঝি-পুয়োগুনোরে তে ইস্হাক লগে ন-রাগেইনে দূরোত্ পূগেদি এক্কান্ দেজত্ পাদেই দিলো। 7অব্রাহামে একশঅ পাজাত্তুর্ বজর্ বাঁজি এলঅ। 8এক্কান দোল্ আর সুগোর্ জীংকানি কাদেইনে ভালোক্ বজর বাদে তে মুরি যেইনে তা পুরোণি মানুচ্চুনো ইদু গেলগোই। 9মম্রি শঅর পূগেদি হিত্তীয় সোহর পুয়ো ইফ্রোণ ভুইয়োত্ মক্পেলার গাত্তোদ্ তার পুয়ো ইস্হাক আর ইশ্মায়েলে তারে গারেলাক্। 10এ ভুইয়ান তে হিত্তীয়গুনত্তুন্ কিনি নেযেয়্যে। ইয়েনত্ তা মোক্কো সারারে আর তারে গারা ওইয়্যে। 11অব্রাহামর মরানার্ পরেদি তার পুয়ো ইস্হাকরে গোজেনে বর্ দিলো। ইস্হাকে বের্-লহয়-রোয়ীর ইদু বজত্তি গরা ধুরিলো।
ইশ্মায়েল বংশধর
12সারার চাগরানী মিসরীয় হাগার পেদত্ অব্রাহামর পুয়ো ইশ্মায়েলর জর্ম ওইয়্যে। 13ইয়েন অলঅ ইশ্মায়েলর বংশর কধা: জর্ম অনুসারে তার পুয়োগুনোর্ নাঙানি অলঅ, পোইল্যে নবায়োৎ, সে পরেদি কেদর, অদ্বেল, মিব্সম, 14মিশ্ম, দূমা, মসা, 15হদদ, তেমা, যিটূর, নাফীশ আর কেদমা। 16ইশ্মায়েলর এ বারজন পুয়ো এলাক্ বারবো গুট্টির্ সদ্দার্। তারা নাঙানি অনুসারে তারার আদাম আর আদাম বারেন্দি তাম্বুল-তাঙেবার জাগার্ নাঙানি রাগা ওইয়্যে। 17ইশ্মায়েলে একশঅ সাত্রিশ বজর বাঁজি এলঅ। সে পরেদি তে মুরি যেইনে তা পুরোণি মানুচ্চুনোর ইদু গেলগোই। 18হবীলাত্তুন্ শূর সং যে জাগাগান এলঅ তা বংশর্ মানুচ্চুনে সিদু বজত্তি গুরিদাক্। জাগাগান্ এলঅ মিসর ইদু, আসিরিয়া যেবার পদত্। তারার্ ভেই ইস্হাক বংশধরুনো দেজত্ তারা থেদাক্।
এষৌ আর যাকোবর জর্ম
19ইয়েন অলঅ অব্রাহামর পুয়ো ইস্হাকর জীংকানির বিজগ কধা। অব্রাহামর পুয়ো ইস্হাক। 20ইস্হাকে চোল্লিশ বজর বয়জত্ রিবিকারে লোইয়্যে। রিবিকা অলদে পদ্দন-অরাম দেজর অরামীয় বথূয়েলর ঝি আর অরামীয় লাবনর বোন। 21ইস্হাক মোক্কো ভাঝ্ এলঅ বিলি ইস্হাকে তাত্তে লগেপ্রভু ইদু ভিক্ষ্যে চেলঅ। লগেপ্রভু সিয়েন মানি লল সেনে রিবিকা পিদিলী অলঅ। 22তা পেদত্ জামা পুয়ো এলাক আর তারা একজনে আরেকজন লগে ঠেলাঠেলি গরা ধোজ্যন। সেনত্তে রিবিকা কলঅ, “মর্ কিত্তে এবাবোত্যে অর্?” ইয়েন কোইনে বেপারান্ কি, সিয়েন্ জানিবাত্তে তে লগেপ্রভু ইদু তবনাগান গুরিবাত্তে গেলঅ।
23লগেপ্রভু তারে কলঅ,
“তঅ পেদত্ দ্বিবে আলাদা জাদর্ আরম্ভ ওইয়্যে,
জর্মত্তুন্ ধুরি তারা দ্বিবে আলাদা বংশ অবাক্।
এক্কোত্তুন্ আরঅ এক্কো বেশ্ বোলী অবাক্,
দাঙর্বো চিগোন্ ভেইবোর্ চাগর্ অবঅ।”
24গুরঅ অবার অক্তত্ দেগা গেলঅ ঘেচ্চেক্গুরি তা পেদত্ জামা গুরঅ আগন্। 25পোইল্যে যে পুয়োবোর জর্ম অলঅ তা কিয়্যে রঙান্ এলঅ রাঙা আর তা কিয়্যেগান কেশ সুলুমো ধোক্ক্যেন কেশ্সোই ঢাক্ক্যে। সেনত্তে তার নাঙান্ রাগা ওইয়্যে এষৌ (যিয়েনর ভেদ্তান্ “কেজ্বলা”)। 26সে পরেদি এষৌর টেংঅ মুরিবো-ধোজ্যে গুরি তা ভেইয়োর জর্ম অলঅ। সিয়েনত্তে তা নাঙান্ রাগা অলঅ যাকোব (যিয়েনর ভেদ্তান্ “টেংঅ মুরি ধোজ্যে”)। ইস্হাকর ষায়েত্ বজর বয়জত্ তা মোক্কোর্ পেদত্ ইগুনোর জর্ম ওইয়্যে।
দাঙর্ পুয়োবোর সোম্বোত্তি বেজানা
27এ পুয়োগুনে দাঙর্ অনার পরেদি এষৌ জদবদে কাবিল্ শিগেরী অলঅ। তে বারেদি মাদঠ্ ঘুরি বেরেদ, মাত্তর্ যাকোবে এলঅ অলর্ মিক্যে। তে ঘরত্ থেবাত্তে গম্ পেদঅ। 28শিগের্ গোজ্যে য়েরা হেবাত্তে ইস্হাকর এক্কান আওজ্ এলঅ বিলিনে তে এষৌরে বেশ্ কোচ্পেদ, মাত্তর্ রিবিকা বেশ্ যাকোবরে কোচ্পেদ।
29একদিন্যে যাকোবে ডেল্ রানের্, এ অক্তত্ এষৌ মাদত্তুন্ ফিরি এলঅ। সেক্কে তে অমকদ বল্পোজ্য এলঅ। 30তে যাকোবরে কলঅ, “মত্তুন অমকদ বল্পোজ্যে। তর্ সে রাঙা জিনিসছানত্তুন্ মরে কিজু হেবাত্তে দে।” এ কধাগানত্তে এষৌর আরঅ এক্কান নাঙ্ অলঅ ইদোম (যিয়েনর ভেদতান্ “রাঙা”)।
31যাকোবে কলঅ, “মাত্তর দাঙর্ পুয়ো ইজেবে তর যে অধিকার সিয়েন এচ্চ্যে তুই মইদু বিজি দে।”
32এষৌ কলঅ, “চাহ্, মঅ পরাণান্ নিগিলি যার্, দাঙর্ পুয়োবোর অধিকারান্দোই মুই কি গুরিম্?”
33যাকোবে কলঅ, “আগে তুই মইদু শমত্ খা।” সেক্কে এষৌ শমত্ খেইনে দাঙর্ পুয়োবোর্ অধিকারান যাকোব ইদু বিজি দিলো।
34যাকোবে ইয়েন পরেদি এষৌরে পিদে আর ডেল্ হেবাত্তে দিলো, আর এষৌ হানা-বিনে শেজ্ গুরিনে উদি গেলগোই। ইঙিরিনে এষৌ তা দাঙর্ পুয়ো অবার অধিকারানরে কনঅ দাম্ ন-দিলো।
دیاریکراوەکانی ئێستا:
পত্থম 25: CBT
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Copyright © 2021 Bangladesh Bible Society