Luuka 3
3
Yowani Mutondihi akalongese baatu hutso a kumu a nzala
Mty 3.1-6; Mlk 1.2-6; Yow 1.19-23
1Hwaba ilima hya kuumi na bitaanu, hi Kayisaali Tiberiyu haba mutumi matsi moosi ma Looma. Ponse Pilaato aba mutumi a tsi a Yuda, mu ilima mo hiina. Eloode aba pfumu itaanzi hya Ngalili, na mwaana a ngu a nde Filipo, pfumu itaanzi hya Iturya na Takonita. Lisanyasi aba pfumu itaanzi hya Abilena. 2Ane na Kayifa baaba bakuutu ba bangaanga ba Nzambi. Mu taangu mo yiina, Yowani mwaana a Zakariya aba mutso a kumu a nzala. Nzambi ayabisi nde mambu ma nde. 3Ni mu buuna, Yowani hataangili itaanzi hyoosi hya Yolodani, nde akata ibila: «Sobwaani mbiili, Yakaani tondihili mana Nzambi anyahula masumu ma benu.»
4Ni we bu baasonehe mu muhanda a mumbihuli Esaya:
«Yiniiyi ni ndaha a muutu wuuna wu li mu uta ibila mu kumu a nzala:
“Vangimasaani nzila a Pfumu,
suungahaani misoho mya nde! 5Kisalaani mitsundu myosi,
syengaani bisyelo na bitukidi bikituha bidede.
Suungahaani manzila ma maatengeme,
na syengaani misoho mi milahi mi mabaku.
6Buuna baatu boosi bu umono liyobolo la Nzambi#Esa 40.3-5.”»
7Konge a baatu yayidi huli Yowani, mana nde atondehe bo. Nde akaleele huli bo: « Benu ibaandu hi bapili, na alongese benu mu ubata kesi a Nzambi? 8Ni mu buuna, butaani mbutu yi yukaata imbangi ti benu limisobo mbiili a benu. Na a lilelesene mu mitima mya benu ve ti: “Bisu lili na taata a bisu Abrahami.” Ka me ndeele benu ti, mamanya mo maniima, Nzambi utwala ukitusa mo baana ba Abrahami. 9Pa pibi bamiivangimasa mu ukwanga muti mu manganzi. Ni mu buuna, pasi muti wu uvelebuta mbutu yimbwe, bu ukwanga nde na ubwaha nde hu mbaahu.»
10Konge a baatu yakafuula nde: «Bisu hima lafwana usa?» 11Nde afutili bo: «Nyaha muutu wu uli na biyunga byole, akaba imosi huli wu avele na hyo. Na wu uli na byudya, akabila bana.»
12Hwayidi kaka bakuukihi ba limandu, mana batondehe bo, na bo baafuuli Yowani: «Mulongisi, bisu hima lafwana usa?» 13Nde aleeli bo: «A linono bibyafulala ŋa yulu a bi baava benu muswa ve.» 14Masadaadu kaka maayafuula nde: «Ka bisu kaka, hima lafwana usa?» Nde aleeli bo: «A lipatula mbongo a muutu ve, a lileele dyaambu li upfuta mu muutu ve, ka baatalaani ndulu pfuta a benu.»
Yowani Mutondihi ayabisi wuna wu uli mu uya
Mty 3.11-12; Mlk 1.7-8; Yow 1.24-28
15Baatu bu baaba mu ukeele na hiitu hyoosi, boosi baakafulasana byuhu bo mwakulu hutso mitima mya bo, tso Yowani ni Masiya. 16Yowani afutili huli boosi: «Me, me ndi mu utondehe benu mu mamba. Ka, wu uli mu uya, afulala me matwala, na me a handi tso wu akuha mu uba muviha, mu unyangula midi mi bikodi bya miilu mya nde ve. Nde wuuna utondehe benu mu Livupu la Ngidi na mu mbaahu. 17Nde li na iyengese hya nde ŋa hoho, mu ukahula mbutu na biimbu. Nde ukukaha muhunu hutso iswehili hya nde, ka nde utsuha biimbu hu mbaahu yi yuuveledima.»
18Yowani akayabisa Musamu wu Mubwe huli konge, na uva bo kwadisili kima yindahi. 19Ŋa yulu a ŋaana, Yowani asyembi mutumi Eloode wu avoli na ukwele Elodyadi, mukadi a mwaana a ngu a nde. Na nde abwesyembe Eloode mu tooni mavaanga moosi ma mabi ma nde hasiidi. 20Ŋa yulu a maana moosi, Eloode akotisi Yowani mu kondaayi.
Tondihili a Yisu
Mty 3.13-17; Mlk 1.9-11; Yow 1.29-34
21Humbisa utondehe baatu boosi, Yowani atondihi kaka Yisu. Na bu Yisu hakasambila, yulu laadibumi, 22na Livupu la Ngidi laakulimini ŋa yulu a nde we libembe. Na ndaha mosi yamati hu yulu: «We ni Mwana a me wu litondo, wu me umbapfulala utondo.»
Bukulu bu ibaandu hya Yisu
Mat 1.1-17
23Bu Yisu habandihi isalu hya nde, nde aba bebele na bilima maku matatu. Baatu baakatsima ti nde aba mwaana a Yosefi. Na Yosefi mwaana a Eli. 24Eli aba mwaana a Matati, Matati mwaana a Leevi. Leevi aba mwaana a Meleki, Meleki mwaana a Yanayi. Yanayi aba mwaana a Yosefi, 25Yosefi mwaana a Matatyasi. Matatyasi aba mwaana a Amosi, Amosi mwaana a Nahumi. Nahumi aba mwaana a Esely, Esely mwaana a Nangayi. 26Nangayi aba mwaana a Mahate, Mahate mwaana a Matatyasi. Matatyasi aba mwaana a Semeni, Semeni mwaana a Yoseki. Yoseki aba mwaana a Yoda, 27Yoda mwaana a Yowanani. Yowanani aba mwaana a Resa, Resa mwaana a Zorobabele. Zorobabeli aba mwaana a Salatyele, Salatyele mwaana a Neri. 28Neri aba mwaana a Meleki, Meleki mwaana a Adi. Adi aba mwaana a Kosami, Kosami mwaana a Elemada. Elemada aba mwaana a Eri, 29Eri mwaana a Yisu. Yisu aba mwaana a Elyezeri, Elyezeri mwaana a Yorimi. Yorimi aba mwaana a Matati, Matati mwaana a Levi. 30Levi aba mwaana a Simeyoni, Simeyoni mwaana a Yuda. Yuda aba mwaana a Yosefi, Yosefi mwaana a Yonami. Yonami aba mwaana a Elyakimi, 31Elyakimi mwaana a Meleya. Meleya aba mwaana a Mena, Mena mwaana Matata. Matata aba mwaana a Natani, Natani mwaana a Davidi. 32Davidi aba mwaana a Yese, Yese mwaana a Obedi. Obedi aba mwaana a Booze, Booze mwaana a Sala. Sala aba mwaana a Nasoni, 33Nasoni mwaana a Aminadabi. Aminadabi aba mwaana a Adimini, Adimini mwaana a Alani. Alani aba mwaana a Esiloni, Esiloni mwaana a Falesi. Falesi aba mwaana a Yuda, 34Yuda mwaana a Yakobi. Yakobi aba mwaana a Isaki, Isaki mwaana a Abrahami. Abrahami aba mwaana a Tara, Tara mwaana a Naholi. 35Naholi aba mwaana a Seruki, Seruki mwaana a Ragahu. Ragahu aba mwaana a Faleki, Faleki mwaana a Heberi. Heberi aba mwaana a Sela, 36Sela mwaana a Kayinami. Kayinami aba mwaana a Alfasade, Alfasade mwaana a Semi. Semi aba mwaana a Nowa, Nowa mwaana a Lemeki. 37Lemeki aba mwaana a Matusalemi, Matusalemi mwaana a Enooke. Enooke aba mwaana a Yaleti, Yaleti mwaana a Maleleheli. Maleleheli aba mwaana a Kayinami, 38Kayinami mwaana a Enosi. Enosi aba mwaana a Seti, Seti mwaana a Adami. Adami aba mwaana a Nzambi.
دیاریکراوەکانی ئێستا:
Luuka 3: TSA
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© (Active), Wycliffe Bible Translators, Inc. All rights reserved.