LEEWAAWOOTA 2
2
GIDU FUSHSHAATE
1«Aye manchino ane Kaaliiqira gidu fushshaate abbanno yannara, liiqaabbino bullee shiqishe, aanaho zayite dune hixaana giirona. 2Aarooni sircho ikkitino qeesootiwa haa're abbona. Qeesichuno zayitenna hixaanu aanaho noo bullee mitto hoowo wo'ma haa're, kakkallanni darga masse shilqishona; giirre shiqinshanni kakkalo shilqonnite fooli anera tashshi yaannoe gede, wo'munku aneha ikkinota egensiisate kakkallanni dargira haadhe massitona. 3Gatinohu gidu fushshaati qeesootunniha ikkona. Kuni, anera shilqinshannihunni bande gatinsoonniha ikkinohura lowo geeshsha qullaawaho.
4«Gidu fushshaati raino tima ikkiro, shiishinokkiha ikkona; liiqo bullee zayitetenni liinse du'ma tima gannona; woy shaashshine tima ganne zayite aanaho buurronna. 5Gidu fushshaati mixashshote gannanniha ikkiro, liiqo bullee zayitetenni liinsoonnita shiishshukkinni gannona. 6Timano hiiqqaqqitine aanaho zayite duntine gidu fushshaate assitine shiqishshinanni. 7Gidu fushshaati xiltaame mixashshora rainsoonniha ikkiro, liiqo bulleenninna zayitetenni qixxeessinona. 8Kunni garinni qixxaawino fushshaate haadhine anera shiqishshinanni; qeesichaho uyitineenna kakkallanni dargira haa're massanno; 9gidu fushshaati wo'munku anera shiqinshoonniha ikkinota egensiisate, foolesi anera tashshi yaannoha asse kakkallanni darga masse shilqishanno. 10Gatino gidi qeesootunniho; kunino anera shiqinshoonnihunni bande gatinsoonnniha ikkinohura lowo geeshsha qullaawaho.
11«Ane Kaaliiqira shiqinshannihu gidu fushshaati shiishinoha woy malawo ikkiro, shilqisha dihasiisanno'ne. 12Gidi'nenni umiha abbitinanni woyite, shiishinohanna malawo kayinni babbaddine shiqisha dandiitinanni; ikkollana kakkallanni darga shilqinshanni kakkalo assitine shiqisha didandiitinanni. 13Shiqishshinanni fushshaati baalaho maxine worre; maxine anenna ki'ne mereero noo gondooro kultannotena, fushshaati'nera maxine worre.
14«Anera abbitinannihu gidunnihu umi fushshaati, daddarroonnita woy du'rinshoonni shoye ikkitona. 15Gidu fushshaatira, zayitenna hixaana aanaho worre. 16Qeesichuno hixaananna daddarroonni gide zayitete ledo haa're, wo'munku anera shiqinshoonniha ikkinota egensiisate kakkallanniwa haa're shiqishanno.
دیاریکراوەکانی ئێستا:
LEEWAAWOOTA 2: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014