LEEWAAWOOTA 1
1
SHILQOTE KAKKALO
1Kaaliiqi Muse woshshe, Xaadu Dukkanira hee're kunninni aane noo coye coyi'rinosi: 2Israeelete, «Ki'ne giddonni ayino ane Kaaliiqira saadate fushshaate aanno yannara lalu, ge'reewu woy meu giddonni shiqishona.
3«Shilqote kakkalora shiqishanno fushshaati lalunniha ikkiro, ani adheemmo gede, muso afi'rinokkiricho Xaadu Dukkani nafarira haa're abbona. 4Shilqote kakkalo asse shiqishanno saada umi aana angasi woreenna, cubbosi agurate adheemmo kakkalo ikkitanno. 5Bootono ane albaanni gorrona; Aarooni sircho ikkitinori qeesootu mundee anewa shiqishshuhu gedensaanni, massite Xaadu Dukkani nafara kakkallanni darga shoolente maddera wixxona. 6Hakkunni gedensaanni shiqishino manchi goga dule hoolona; maalano dani danisinni fushshona. 7Manchu togo assanni hee'reenna, qeesootu kakkallanni darga haqqe duunte giira giirtona. 8Qeesootu murmurroonni maala, umonna cooma aanaho ledde duunnoonni haqqe aana wortona. 9Hakku manchi, bootunniha godowirenna dadubba wayinni hayishshona; qeesichuno fushshaate baala gudise kakkalote darga masse shilqote kakkalo asse shiqishona; tenne giirre shiqinshanni kakkalo shilqonnite fooli anera tashshi yaannoha ikkanno.
10«Shilqote kakkalora ge'reewu woy meu giddonni shiqishannoha ikkiro, muso afi'rinokki goco abbona. 11Kakkalo shiqishannohu, kakkallanni dargira aliyye ragaanni ane albaanni abbe gorrona; qeesootu mundee massite kakkallanni darga shoolente maddera wixxona. 12Shiqishinohu maala dani danisinni fushshona; qeesichuno umonna cooma lede kakkalote darga bubbara worroonni haqqe aana worona. 13Godowirenna dadubba wayinni hayishshona. Qeesichu fushshaate baala abbe kakkalote darga shilqishona. Tenne shiqinshanni kakkalo shilqonnite fooli anera tashshi yaannoha ikkanno.
14«Anera shilqote kakkalora shiqishanno fushshaati ceanniha ikkiro, bukukkaama woy lemboola haa're abbona. 15Qeesichuno kakkallanni dargira masse umo micciirona; taino umono kakkalote darga masse shilqishona; mundeeno kakkalote dargi qooxeessira coccossona. 16Ceate daammanna qoolla bade hoole kakkallanni dargira soojjaatoonni, buluulo dunnanniwa masse tugona. 17Qoolla lamewa facona; kayinnilla gudise babbadoonke; qeesichuno kakkalote darga bubbanno giira aana shilqishona. Tenne shiqinshanni kakkalo shilqonnite fooli anera tashshi yaannoha ikkanno.
دیاریکراوەکانی ئێستا:
LEEWAAWOOTA 1: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014