मत्ती 28
28
यीशु दोबारा जिन्दे हून्दे हिन
यीशु रा फिरी जिन्दा होणा
1विश्राम दिन रे बाद रविवार जो भ्याग हुन्दे ही मगदला सहर री मरियम अते दुसरी मरियम कब्र जो दिखणे तांइ आई। 2अते दिख्खो, इक्क बड़ा बड्डा हिलण गेया, किजोकी स्वर्ग का इक्क स्वर्गदूत तित्ते उतरेया अते तित्ते आई करी उसने कब्र का पत्थर जो लुढ़ाकाई दित्तेया अते उस पर बेई गेया। 3उसेरा रुप आसमान री बिजली सांई थिया अते जे तिनिये कपड़े पाये रे थिये से बर्फ सांई साफ थिये। 4से सिपाई #28:4 इस वचन बिच ए “सिपाई” रोमी साम्राज्य री हूकुमत बिच थिये।जे कब्रां पर पहरा देया करदे थिये, डरे रे मारे कमणे लगे अते इदेय होई गे जिय्यां मरी गे हो। 5तां स्वर्गदूत ने उन्हा जनानियां जो बोल्लेया, डरो मत, मैं जाणदा कि तुसा यीशु जो तोपेया करदे हिन जिस जो सुली पर चढ़ाई दित्तेया थिया। 6से इत्ते नी हिन जिय्यां कि उन्हा ने बोल्लेया थिया, तिन्हा मरणे का बाद फिरी जिंदा होई जाणा आओ, उस जगाह् जो दिख्खो, जित्ते से लेटे रे थिये। 7अते फिरी झट जाओ अते उसेरे चेल्लेयां जो बोल्लो, से मरे रेयां बिच का फिरी जिंदा होई गेया, अते से तुसा रे का पैल्ले गलील जो जाया करदे हिन, तुसा तिसजो उत्ते ही दिखणा दिख्खो, मैं तुसा जो बोल्ली दित्तेया। 8से डर अते बड़ी खुसी कने कब्र का हटी करी उसेरे चेल्लेयां जो सुब बसेख दैणे तांइ दौड़ी गेईयां। 9तां यीशु उन्हा जो मिल्ले अते बोल्लेया, सलाम उन्हा ने तिन्हा का जाई करी उन्हेरे पैर पकड़ी करी उन्हेरी प्रणाम कित्ती। 10तां यीशु ने उन्हा जो बोल्लेया, डरो मत, मेरे चेल्लेयां का जाओ जे भाईयां सांई हिन, अते उन्हा जो बोलो कि से गलील जो चली जाण, तित्ते ही तिन्हा मेरे जो दिखणा।
सपाईयां रा खबर पूजाणा
11हल्ले से जनानियां अपणे रस्ते बिच ही थी कि जाई करी चेल्लेयां जो ए सब किच्छ दस्सी सकण, कि किच्छ सिपाई जे पैहरेदार थिये, सहर जो गे अते जे किच्छ होया थिया, तिसेरी सारी जानकारी बड्डे पुरोत्त जो दस्सी दित्ती। 12तां तिन्हा बुजुर्ग लोक्कां अते यहूदी नेतेयां कने मिल्ली करी इक्क योजना बणाई उन्हा ने सपाईयां जो मता चाँदी देई करी बोल्लेया, 13मणूआं जो ए बोलेयो कि से यीशु रे चेल्ले रात्ती आये अते जां असी सुत्ते रे थिये उसेरी लास जो चोरी करी लेई गे। 14अते जे सोणे वाली गल्ल राजपाल तक पूजदी तां असी तिसजो समझाई लिंगे अते तुसा जो कोई आँच नी आणे दिंगे। 15पैहरेदारां ने चाँदी लेई करी तिय्यां ही कित्तेया, जिय्यां उन्हा जो दस्सेया गेया थिया अते ए झूठ्ठी जानकारी कि चेल्ले यीशु री लास चुराई करी लेई गे थिये यहूदियां बिच अज्ज तांइ इस्सी तरिक्के कने फैली री है।
यीशु रा चेल्लेयां जो लिबणा ते आखरी हुकम
16फिरी ग्यारा चेल्ले गलील बिच उस पहाड़ी बिच पूज्जे जित्ते जाणे जो यीशु ने बोल्लेया थिया। 17जां उन्हा ने यीशु जो दिख्खेया तां तिन्हा जो प्रणाम कित्तेया, पर किच्छ रे दिला बिच शक थिया कि से फिरी जिन्दा होई गेरे हिन। 18फिरी यीशु ने उन्हेरे का जाई करी बोल्लेया, स्वर्ग ते जमीन बिच सब हक मेरे जो दित्ते गे हिन। 19इधेरे तांइ तुसा जाओ अते जाति-जाति रे लोक्कां जो मेरा चेल्ला बणाओ तुसा जो ए कम्म परम पिता रे नां बिच, पुत्तर रे नां बिच अते पवित्रात्मा रे नां बिच उन्हा जो बपतिस्मा देई करी पूरा करणा है। 20से सब हुकम जे मैं तुसा जो दित्ते हिन, उन्हा जो उन पर चलणा सिखाओ: अते याद रख्खो, कि मैं दुनिया रे अंत तक हमेसा तुसा रे कने है।
دیاریکراوەکانی ئێستا:
मत्ती 28: CDHNT
بەرچاوکردن
هاوبەشی بکە
بەراوردکردن
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.