मोत्ती 1
1
ईशूओ खिंब
(लूका 3:23-38)
1आबरामे आद-लुआद, राज़ै दाबेदे आद-लुआद मसीहा ईशूए खिंबे बही:
2आबरामो शोहरू त इसहाक। इसहाको हुअ आजू याकब। याकबा का हुअ यहूदा अर तेऊए होर भाई।
3यहूदा अर तामारा का हुऐ आजू फिरिस अर जेराह। फिरिसा का हुअ आजू हिस्रोन। हिस्रोना का हुअ एराम।
4एरामो शोहरू त अमीनादाब। अमीनादाब का हुअ आजू नहशोन। तेऊ का हुअ आजू सलमोन।#रूत. 4:19-20
5सलमोन अर तेऊए लाल़ी राहाबा का हुअ आजू बोआज़। बोआज़ अर तेऊए लाल़ी रूता का हुअ ओबेद। रहाब अर रूत नांईं तै यहूदी आथी तिंयां थिऐ होरी ज़ातीए। ओबेदो शोहरू त ईशैई।
6ईशैईओ शोहरू त दाबेद राज़अ। दाबेद राज़ैओ शोहरू हुअ आजू सुलैमान तैहा बेटल़ी का ज़ुंण पैहलै उरियाह सैनापतिए लाल़ी थिई।#2 शमू. 12:24
7सुलैमाना का हुअ रहबाम। तेऊ का हुअ आजू अबियाह। अबियाह का हुअ आजू असाप।
8असाप का हुअ आजू जहोशापात अर तेऊओ हुअ आजू जोराम। तेऊओ हुअ आजू उज़ियाह।
9उज़ियाह का हुअ जताम। जतामो हुअ आजू आहाज़ अर तेऊओ हुअ आजू हिजकिया।
10हिजकिया का हुअ मनिश्शे। मनिश्शे का हुअ आजू अमोन। अमोनो थिअ आजू जोशिया।
11बाबेल देशे गलामी दी डेऊणैं का आजी हुअ जोशिये पोचै जकोनया अर तेऊए होर भाई।#जेर. 27:20
12बाबेल देशे गलामी दी डेऊई हुअ जकोनया का आजू शालतीएल। शालतीएलो हुअ जरूबाबल।
13-14जरूबाबलो हुअ अबिहूद। अबिहूदो हुअ आजू इल्याकिम। इल्याकिमो हुअ अजोर। तेऊओ त आजू सदोक अर तेऊओ हुअ आजू अखीम।
15अखीमा का हुअ आजू इलीहूद अर तेऊओ हुअ आजू एलीआजर। एलीआजरो हुअ आजू मतान। मतान आसा याकबो बाब।
16याकबा का हुअ युसुफ, ज़ुंण मरिअमो लाल़अ त। मरिअमा का हुअ पबित्र आत्मां करै ईशू ज़ुंण मसीहा आसा।
17आबरामा का दाबेद राज़ै तैणीं हुई पठी च़ौदा पोस्ती, दाबेद राज़ै का बाबेल देशे गलाम हणैं तैणीं बी हुई च़ौदा पोस्ती अर तिधा का मसीहा तैणीं बी हुई च़ौदा पोस्ती।
ईशूओ ज़ल्म
(लूका 1:26-38; 2:1-7)
18ज़धू ईशू मसीहो ज़ल्म हुअ, सह हुअ इहअ कि ज़धू तेऊए ईज मरिअम कुंआरी आसा ती, तेसे बरनीं लाई युसुफा संघै। तिन्नें बैहा हणैं का आजी हुई मरिअम पबित्र आत्मां करै सुंदी।
19मरिअमो लाल़अ युसुफ त धर्मीं मणछ। सह निं मरिअमा बदनाम करनअ च़ाहंदअ त। युसुफै सोठअ इहअ कि तेऊ दैणीं मरिअम च़ुपच़ाप छ़ाडी।
20ज़ांऊं युसुफ इना गल्ला सोठदअ थिअ लागअ द, परमेशरो एक स्वर्ग दूत शुझुअ तेऊ का सुपनै अर तेऊ स्वर्ग दूतै बोलअ युसुफा लै इहअ, “राज़ै दाबेदे लुआद युसुफा, तूह निं मरिअमा संघै बैहा करनै का निं डरी। किल्हैकि तेसे ओदरै पल़दअ गर्भ आसा पबित्र आत्मां करै। 21तेसो हणअ एक शोहरू, तेऊ शोहरू नाअं डाहै तूह ‘ईशू,’ तेऊ करनअ आपणैं लोगा लै तिन्नें पापा का छ़ुटकारअ।”#ईशा. 7:14
22अह हुअ तैही कि ज़ुंण बैण प्रभू आपणैं गूर ईशायाह बाती बोलै तै, तिंयां पूरै होए,
23“हेरा, एक कुंआरी शोहरी का हणअ एक शोहरू,
तेऊ शोहरू नाअं डाहणअ तैहा ‘इमानुएल’
तेतो मतलब आसा इहअ कि परमेशर आसा हाम्हां संघै।”
24युसुफ उझ़ुअ निंजा का खल़अ अर ज़िहअ प्रभूए स्वर्ग दूतै तेऊ लै सुपनै बोलअ त, तिन्नां गल्ला मनी किअ तेऊ मरिअमा संघै बैह। 25ज़ेभै तैणीं तेसो शोहरू नांईं हुअ, तेभै तैणीं निं सह मरिअमा संघै कठा सुत्तअ आथी। तेऊ डाहअ तेऊ शोहरूओ नाअं “ईशू।” #लूक. 2:21
دیاریکراوەکانی ئێستا:
मोत्ती 1: OSJ
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.