आमोस 9
9
बिधातो नसाफ
1मुखा शुझुअ म्हारअ मालक बिधाता बेदी सेटा खल़्हुअ द। बिधाता दैनअ हुकम, “भबने थाम्हा प्रैंदै बाह एही ज़ोरै कि हेठा का सारी आथरी च़ुक्के, इना पा फाल़ी अर ईंयां लोल़ी लोगे मुंडा प्रैंदै पल़ै। ज़ुंण एता का बच़े, तिंयां पाणै मुंह जुधा दी तलबारा करै मारी। इना मांझ़ै निं एक बी बच़णअ। 2ज़ै ईंयां डुघी खात्ती खण्हीं पैईताल़ै बी लुक्के, तेता का बी घिशणै मुंह ईंयां उझै, ज़ै ईंयां उझै सरगा लै बी उखल़े, तिधा का बी शोटणै मुंह ईंयां धरनीं। 3ईंयां ज़ै कर्मेल धारे च़ुंडी बी लुक्के, ईंयां आणनैं मुंह तेता का लोल़ी करै ढाकी। ज़ै ईंयां मुखा समुंदरे थाल्लै बी लुक्के, तेथ बझ़ैल़णअ मुंह इना लै शपैल़ा का चटाक बाहणैं। 4ज़ै तिन्नें दुशमण तिन्नां पराऐ देशे गलामी दी निंए, मुंह करनअ इज़राईलीए तिन्नां दुशमणा लै हुकम कि तिन्नां तलबारा करै मारे। ऐबै आसा मंऐं तिन्नें बनाश करने डाही दी, मुंह निं तिन्नें मज़त करनी।”
5ज़ेभै स्वर्गे सारी सैने मालक बिधाता धरती छ़ुंहंणी;
तेथ हणीं तेभै ज़ाज़री अर बस्सै दै सोभी पल़णअ शोग।
सारअ संसार उझ़णअ मिसर देशे नील नदीए छ़ाल्ली ज़िहअ उझै
अर तिन्नां ई छ़ाल्ली ज़िहअ बेशणअ धरनीं।
6बिधाता आसा स्वर्गै आप्पू लै घअर बणाअं द,
पृथूई आसा तेऊ सरगै डाही दी टकैल़ी।
समुंदरे पाणीं शादा सह भाफे रुपै,
संघा दैआ धरती दी तरैल़ी।
तेऊ नाअं आसा बिधाता!
7बिधाता बोला इहअ, “इज़राईलीओ, तम्हैं आसा मुल्है कूश देशा का खास। ज़िहै मंऐं तम्हैं मिसर देशा का आणै, तिहै ई आणै मंऐं पलिश्ती कप्तोर देशा का अर अरामी लोग कीर नगरी का। 8हुंह थारअ मालक बिधाता आसा तम्हां इज़राईलीए पापी राज़ा भाल़अ लागअ द। मुंह करनअ धरती का थारअ राज़ खतम। पर याकबे आद-लुआद निं मुंह पठी खतम करनै। अह गल्ल डाही मंऐं बिधाता बोली।
9“मुंह करनअ हुकम, मुंह छ़ान्हणै मेरी परज़ा इज़राईली देशा-देशा जैंदरी बडैल़णै दी नाज़ा ज़िहै, संघा काढणैं सोभ बृथा मणछ पोर्ही ज़िहै नाज़ा जैंदरा का गट्टै टाल़ा। 10मेरी परज़ा जैंदरे पापी मणछ पाणै जुधा दी मारी ज़ुंण इहअ बोला, ‘बिधाता निं हाम्हां झ़ाई-फांगअ बी लागणै दैंदअ।’”
इज़राईल हणअ भिई खल़अ
11बिधाता बोला इहअ, “ज़ेभै अह बगत एछणअ, तेभै करनअ मुंह राज़ै दाबेदो राज़ भिई खल़अ, ज़ुंण ढूल़ै दै बसेरै ज़िहअ आसा। मुंह करनी तेते भित्ती लेस्सी-टुशी राम्बल़ी संघा च़िणनअ मुंह सह भिई तिहअ ई ज़ेही शोभा तेते पैहलै आसा ती।#शधा. 15:16-18 12तेखअ करनअ इज़राईली तिन्नां एदोमी संघै जुध ज़िती राज़ ज़ुंण बच़ै दै हणैं। तिन्नां होरी देशा प्रैंदै बी करनअ राज़ ज़ुंण मेरै आसा तै।” ईंयां गल्ला बोली बिधाता, तेऊ करनी ईंयां गल्ला ज़ेही बोली तेही ई पूरी।
13बिधाता बोला इहअ,
“एक बगत एछणअ, थारै खेचै हणीं साल-फसल खास्सी,
फसल निं लऊई मुक्कणैं कि तेतरी जाणअ खेचा बाहणां लै हल़ ज़ुंडी,
अज़ी निं बऊई बी मुक्कणैं कि तेतरी जाणी दाख पाक्की रस काढणा लै हई।
धारा हणीं मिठै दाखे रसे ट्रिहुंणीं लागी दी अर धारठी हणअ रस निटरदअ लागअ द।
14मुंह आणनीं परज़ा इज़राईली तिन्नें आपणैं घअरा लै फरेऊई।
तिन्नां च़िणनी आपणीं उज़र पल़ी दी नगरी भिई, संघा बस्सणै तिधी,
तिन्नां लाणैं दाखे बाग संघा झुटणअ दाखो रस रज्ज़ी।
तिन्नां पज़ेरनै बाग-बगिच़ै संघा खाणैं तेते फल़।
15मुंह रोप्पणी आपणीं परज़ा तैहा ज़ैगा भिई ज़ुंण मंऐं तिन्नां लै आसा दैनी दी।
तेखअ निं मुंह तिंयां तिधा का कधि पेच़णैं।”
अह गल्ल बोली थारै परमेशर बिधाता।
دیاریکراوەکانی ئێستا:
आमोस 9: OSJ
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.