आमोस 3
3
1इज़राईलो! समाद शूणां! ज़ुंण बिधाता थारै खलाफ बोलअ।
अह समाद आसा तम्हां सोभी इज़राईली लै:
“ज़ुंण मंऐं बिधाता मिसर देशा का आणै तै बच़ाऊई।
2सारै संसारा का छ़ांटै तै मंऐं बिधाता सिधै तम्हैं इज़राईले टोली,
तैही दैणीं मुंह ऐबै थारै कदुष्ट कामां लै सज़ा बी।”
गूरो काम
3ज़ेभै तैणीं दूई मणछ आप्पू मांझ़ै राज्ज़ी निं हुऐ,
तेभै तैणीं निं तिंयां संघा हांढी सकदै।
4शकार ढाकै बाझ़ी निं सिह बणैं क्रुंगदअ,
नां खारकअ सिह भुखै पेटै जुहल़ी क्रुंगदअ।
5बाझ़ी च़ुनणै निं ज़बाल़ा दी च़ेल्लू पेशदअ,
बाझ़ी फाही निं ज़ज़ाल़ा दी च़ेल्लू शाचदअ अर
ज़ेभै तैणीं ज़ज़ाल़ा दी च़ेल्लू निं शाचै, तेभै तैणीं निं शकारी ज़ज़ाल़ झाल़दअ।
6इहअ निं हई सकदअ कि नगरी दी नर्शिंगै बाज़दै शुण्हिंए अर लोग नांईं डरे!
ज़ेभै तैणीं बिधाता कहा नगरी लै आफ़त निं पाए,
तेभै तैणीं निं तैहा नगरी दी आफ़त एछदी।
7मालक बिधाता निं कधि आपणैं दास गूरा का भेद खोज़ै बाझ़ी किछ़ै करदअ।
8सिह क्रुंगदअ शूणीं छ़ुटा सोभी दर्छ़णअ,
मालक बिधाता दैनै दै समादा खोज़णैं का निं कोह पिछ़ू हटदअ।
सामरी मुल्खो बनाश
9मिसर देश अर अशदोद नगरीए गहल़ै-कोटै खोज़ा इहअ:
“सामरी देशे धारा हआ कठा,
तिधा का लागा भाल़ै कि सामरी देशै
किहै उपद्रभ अर ज़ुल्म आसा हंदै लागै दै।”
10बिधाता बोला इहअ, “इना मणछा निं भलअ करनअ एछदअ ई आथी! इनै आसा आपणैं गहल़-कोट उपद्रभ अर ज़ुल्म करी झाल़ी दी च़िज़ा करै भरै दै! 11तैही बोला हुंह इनो मालक बिधाता कि एकी दुशमणा गोटणअ अह देश फेरा-फेर, तेऊ पाणै इने गहल़-कोट ढोल़ी अर इने खज़ानै लुटणैं तेऊ पठी।”
12बिधाता बोला इहअ, “ज़िहअ फुआल सिहे खाखा का आपणीं भेडे सिधै दूई गुल़छ़ू कि एक कान ई आणा छ़ड़ैऊई, तिहै ई बच़णैं सामरी मुल्खै इज़राईली मांझ़ै सिधै धख ज़िहै ज़िऊंदै। तिंयां हणैं रेशमी च़ादरे पुंझ़ा का बच़ी दी धख ज़ेही शाट्टी अर सारै पलका का बच़ै दै पाऊए एकी ठोरा ज़िहै।”
13स्वर्गे सारी सैनो मालक बिधाता बोला इहअ, “ऐबै शूणां! याकबे आद-लुआदा लै दैआ चतैनगी। 14ज़ेभै मुंह इज़राईली लै तिन्नें पापे सज़ा दैणीं, तेभै करनी मुंह बेतेल बणाईं दी बेदी बी खतम। बेदीए कूणैं शोटणै मुंह चोल़ी करै धरनीं।#2 राज़. 23:15 15सामरी नगरीए ज़ेठै-शाल़्है रहणें मैहल अर हिंऊंदै रहणें मैहल पाणै मुंह ढोल़ी। तिन्नें हाथी दांदे किम्मती च़िज़ा करै सज़ाऊऐ दै मैहल अर बडै शोभलै मैहल पाणै मुंह सोभ ढोल़ी। अह गल्ल डाही मंऐं बिधाता बोली।”
دیاریکراوەکانی ئێستا:
आमोस 3: OSJ
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.