1 करिन्थी 10
10
इज़राईले बितै ज़मानैं का चतैनगी
1भाईओ, हुंह च़ाहा तम्हां का आद फरेऊंणी कि म्हारै दादा-बाबा संघै रेगीस्तानै किज़ै हुअ। परमेशरै निंयैं तिंयां एक बादल़ छ़ाडी ज़ुंण तिन्नां आजू-आजू रहा त सरगै हांढदअ लागी अर परमेशरै पजैल़ै तिंयां लाल समुंदरे पाणीं जैंदरी पार टपाऊई करै राज्ज़ी-राम्बल़ै शुक्की ज़ैगा दी।#लुआ. 14:29
2हाम्हैं सका इहअ बोली, ज़ेही हाम्हैं प्रभू ईशूए हणां लै डुबकी दैनी, तिहै ई रहै तिंयां बादल़े छ़ैल्ली दी अर लाल समुंदरे पाणीं जैंदरी निखल़ै तिंयां पार सह थिई तिन्नां लै डुबकी ज़ेही संघा हुऐ तिंयां मोसा गूरे बधाना मनणै आल़ै। 3तिन्नैं सोभी खाई सह ई रोटी ज़ुंण परमेशरै स्वर्गा का दैनी।#लुआ. 16:35; बधा. 8:3
4तिन्नैं झुटअ सह ई पाणीं ज़ुंण परमेशरै मोसा गूरा करै टोल्हा का काढअ। ज़ुंणी तिन्नां लै टोल्हा का पाणीं दैनअ, सह रहा तिन्नां संघै हांढदअ लागी। सह टोल्ह थिई मसीहा।#लुआ. 17:6; गण. 20:11
5पर परमेशर निं तिन्नां मांझ़ै कई का खुश हुअ आथी, अर तैही मूंऐं तिंयां उज़र रेगीस्तानै।#इब्रा. 3:17
6ईंयां गल्ला हुई हाम्हां लै सबक लणा लै, कि ज़िहअ इनै मांण किअ, तिहअ निं हाम्हां बी बूरी च़िज़ो मांण करनअ लागा, 7अर नां तम्हैं मुहुर्ती पूज़णै आल़ै बणी ज़िहै तिन्नां मांझ़ै बी हुऐ तै, ज़िहअ पबित्र शास्त्रा दी आसा लिखअ द, “लोग लागै खांदी-पिंदी अर नाच़दी-खेल्हदी कंझ़रदै।” 8नां तम्हैं कंज़रैई करी, ज़िहअ तिन्नां मांझ़ै बी कई लोगै किअ, अर तिंयां मूंऐं एकी धैल़ी भितरी त्रेई हज़ार मणछ।#गण. 25:1,9
9नां प्रभू परखदै लागी ज़िहै तिंयां बी परमेशरा परखदै लागै तै, अर तिंयां किऐ तै दानुईं करै खतम।#गण. 21:5-6
10नां तम्हैं पिठी पिछ़ू निंदा करदै लागी, अर ज़िहै म्हारै तिन्नैं दादै-बाबै बी किअ त, तिंयां पाऐ तै स्वर्ग दूतै मारी। 11पर ईंयां सोभै गल्ला, ज़ुंण तिन्नां लै हुई, तेता का लागा हाम्हां सीख लणी ज़ुंण हाम्हैं एऊ संसारा खतम हणें ज़मानैं आसा लागै दै रहंदै।
12तैही ज़ुंण विश्वासी इहअ सोठा कि तेऊओ विश्वास आसा पाक्कअ सह डाहै धैन कि सह किधी नभैऊशै पाप नां करे। 13पाप करने सोठ एछा हाम्हां सोभी पाक्कै दी। पर परमेशर आसा शुचअ, ज़ेतरी खरी तम्हैं ज़िरी सका तेता का खास्सी खरी निं सह तम्हां लै एछणैं दैंदअ। पर सह दैआ तम्हां लै बल कि तम्हैं तेता ज़िरी सके अर पाप करनै का दूर रहे।#2 पत. 2:9
मुहुर्ती पूज़ा करने बारै चतैनगी
14ए मेरै पैरै भाईओ, मुहुर्ती पूज़ा निं करी, तेते च़ाकरी करनै का रहै तम्हैं बच़दै। 15हुंह समझ़ा तम्हां समझ़कार अर हुंह बोला तम्हां लै इहअ कि ज़ुंण हुंह बी बोला तिन्नां गल्ला लै दैआ धैन कि तिंयां ठीक आसा कि गलत। 16ज़ेभै हाम्हैं प्रभू भोज़ा दी एकी प्रिहअ का दाख रस झुटा, ज़ेता लै हाम्हैं परमेशरो शूकर करा, हाम्हैं हआ असली ईशू मसीहे लोहू दी साझ़ू। ज़ांऊं हाम्हैं रोटी चोल़ी करै खाआ अर हाम्हैं हआ असली दी मसीहे देही दी साझ़ू। 17ज़ै कि एक्कै ई रोटी आसा ज़ुंण मसीहा आसा। तै हआ हाम्हैं खास्सै बी एक किल्हैकि हाम्हैं खाआ तैहा एकी ई रोटी का।
18इज़राईलीए बारै सोठा, ज़ेभै सोभी मणछै परमेशरै दैनी दी रोटी खाई, तिंयां हुऐ बेदीए तेऊ बल़ीदाना दी साझ़ू। ठीक इहअ ई ज़ुंण मुहुर्ती दी बल़ीदान किई दी रोटी खाआ, तिंयां बी हआ तिन्नां मुहुर्तीए पूज़ा दी साझ़ू।
19हुंह निं इहअ बोल्दअ आथी लागअ द कि मुहुर्ती दी च़ढाऊअ द बल़ीदान निं किछ़ै आथी अर मुहुर्ती निं किछ़ै आथी। 20पर मेरअ बोल़णैंओ मतलब आसा इहअ कि होरी ज़ातीए लोग ज़ुंण मुहुर्ती दी बल़ीदान करा, तिंयां निं परमेशरा लै करदै आथी, पर तिंयां करा भूता लै, अर तिन्नां का निं ऐहा गल्लो थोघ हंदअ आथी कि तिंयां आसा भूते साझ़ू।#बधा. 32:17
21तम्हैं प्रभूए प्रिहै अर भूते प्रिहै दुही का झुटी सकदै। इहअ निं हई सकदअ कि तम्हैं प्रभूए पलग का बी खाए अर राख्से पलगा का बी खाए!#मोत्त. 6:24
22ज़ै तम्हैं इहअ करे, तम्हैं आणा इहअ करै परमेशरा लै रोश्शै अर हाम्हैं निं परमेशरा का खास्सै ज़ोरा आल़ै आथी।#बधा. 32:21
विश्वासीए आज़ादी
23तम्हां बोल़णअ, “हाम्हैं सका सोभै गल्ला करी,” पर सोभै फाईदे निं आथी। तम्हां बोल़णअ, “हाम्हैं सका सोभै गल्ला करी” पर सोभी च़िज़ा संघै बढोतरी निं आथी। 24आपणीं भलाई निं भाल़णीं आथी, पर दुजे भलाई भाल़णीं। 25ज़ुंण बज़ारै बिक्का तेऊ सका तम्हैं खाई इहअ पुछ़णें ज़रुरत निं तम्हां आथी कि अह मुहुर्ती सेटा का आणअ या होरी ज़ैगा का।
26किल्हैकि पबित्र शास्त्रा दी आसा इहअ लिखअ द,#भज. 24:1
“सारी पृथूई अर तेते हर च़िज़ा बी आसा बिधाते।”
27ज़ै कुंण विश्वास नांईं करनै आल़अ तम्हां लै छ़ांदअ दैए, अर तूह डेओऐ, ताल्है तिधी ज़िहअ खाणैं लै दैए, तै खाऐ तूह तेता ई, परमेशर निं ताल्है इहअ बोल्दअ कि तूह पुछ़ तेऊ का इहअ कि तेऊ तिंयां रोटी किधा का आणी।
28पर ज़ै ताल्है कुंण इहअ बोले, “अह ता मुहुर्ती लै बल़ी किई दी च़ीज़।” तै निं तूह तेता खाई। 29हई सका कि थारी समझ़ा दी निं एतो किछ़ फरक पल़दअ, पर होरी मणछा निं एतो थोघै कि इहअ भोज़ खाई सका कि नांईं? तूह सका इहअ बोली, “मुल्है भलअ किज़ै आसा अर बूरअ किज़ै आसा, एतो फैंसलअ करनअ आल़अ होर कुंण हआ? मेरी आसा मरज़ी, ज़िहअ मेरअ दिल बोले मुंह करनअ तिहअ! 30ज़ै हुंह परमेशरा लै शूकर करी तिन्नां मुहुर्ती दी च़ढाऊई दी रोटी खाआ, तेता पिछ़ू कुंण मेरी निंदा किल्है करा?”
31एतो ज़बाब आसा इहअ कि च़ाऐ खाआ, च़ाऐ पिआ, च़ाऐ किछ़ बी करा सह लोल़ी परमेशरे प्रतप्पा लै हुअ। 32-33ज़ुंण बी मंऐं किअ, हुंह च़ाहा तेता करै सोभी खुश करनअ, मंऐं निं सिधअ आपणैं फाईदे बारै सोठअ पर मंऐं सोठअ सोभिए भलाईए तैणीं ताकि तिंयां बच़ी सके। एही ई लागा तम्हां बी तेही ज़िन्दगी ज़िऊंणीं नां यहूदी लै लोल़ी दुख हुअ, नां होरी ज़ाती लै लोल़ी दुख हुअ अर नां लोल़ी परमेशरे टोली लै दुख हुअ।
دیاریکراوەکانی ئێستا:
1 करिन्थी 10: OSJ
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.