EPIHU 6
6
Da ana dàngu da ama da inada
1Ha dimi ana! Ba tau ma-kikungu lai Karitu-kai#Da lawiti ndai da manda pirada nda ningua: Ba tau ma-kikungu lai Karitu-kai. nyimi, patundungu-wa la amami la inami, nadu ba timi nu bàdi hi ràkana. 2“Tembiha da amamu da inamu,” wàna na kawunga pareta-na i Ala na maningu njanjingu: 3“Ka peku mànjaku-mu dàngu ka namalai na lurimu la pinu tana,” wàna.
4Angu dedi, nyimi ba amakai! Àmbi tikadu pa-halawàla-nja da anami hi lupa dambeni wànya, tàka màtawa kai pa-matua-ha bai panaunja la huri dàngu bai ajaru-ha la pambuha-na i Miri.
Da ata dàngu da miri
5Angu dedi manjadi ata! Tundu-njawa da pareta mirimi la pinu tana yiana. Ba timi nu màta ka weli etimi bai tembiha dàngu bai patundu-nja, hama tuna ba timinya nu i Karitu wiki. 6Màta ba timi nu àmbu mbulungu biana jàka ningu ma-tanara-kai, ka nawotu wànggama tau ba wàmi. Tàka màtawa ba timi nu ba ngaha paata-na i Karitu-kai na maweli etina la pa-patundu-nya na pambuha-na i Ala. 7Na paràma na pa-paloku-mi ba atakai, màta kai ràma hàmu etiya, ba hama tuna jiaya i Miri na palumu-mi, nda mbulungu tau biaya. 8Namuya mbuu ndàbana na tau, ka ataya ka tau marandeka-yakai, ba kawàra ngalangu-mananya himbalu-na welingu lai Miri ndumada da mahàmu da paraï rukuna.
9Angu dedi nyimi manjadi miri! Màtawa na hurimi ka timi nu bai hangganja da atami. Àmbi hilu hanggàritu-dunjapa. Namuya, nyimi dàngu da atami hama ninguma haàtu pa-tangara-mi, nu i Miri la awangu. Nyuna nda na-tàngaru-a kaba mata tau-duna.
Da dàkana i Ala da mamàtu ndàba
10La njàpuna, màtawa nyimi kai kapingatu, bai màka wànya na kapingatu pangala-mi welingu la kuaha-na i Miri, nadu bai pa-mbulungu dàngu Nyuna. 11Wànjawa mbuu ndàbada da madàka pa-pabera wàngu da mamàtu ndàba da pawua-na i Ala lai nyimi, ka pekuna bai pajàrungu la palawa-nya na akalu kahili-na i Kambàliku. 12Nadu nyuta ba ta-patarangu nda lawa-ndanja da angunda pataua tàka lawa-ndanja mbuu ndàbada da wàndi kambàliku da makuaha-ya nggubulu-na na hanggubu awangu. 13Jiaya ba tuna nu, nàhu, paki-hawa mbuu ndàbada da dàka pabera-na i Ala, ka peku màkami palawa-nya napa la lodu akatu ba nahada ngàndingu patungu na muhu. Dàngu ka jiapa-mayapa na kaborangu-mi bai hàlaka pa-patarangu lundu hupu njàpuna.
14Màtawa nyimi kai màra mangga rimangu. Paki-yawa na tuturu-mi lai Ala hama tuna na ruhu bànggimi, dàngu na patutungu hama tuna na kalembi waja. 15Màtawa na wàngu etimi la pa-bobaru-ya na Lii Mànangu na mangàndi mànjaku, ka halapa wihi-minya. 16La nimbihu rehi wànyawa na pawaimi lai Ala ka temingu ma-patipangu; wànya na pawai nuna mimàka papàda-ha mbuu ndàbada da ana pana epi welingu lai ma-akatu. 17Pitiya na mànangu ka tubuku wajami dàngu na puluna i Ala ka hapanda welingu la Ngahuna i Alaya. 18Pahàra-nyawa nuna mbuu ndàbana ba dàngu hamayangu-mi la pakarai pa-ndulangu welingu lai Ala. La era ngia papeku-na, hamayangu-wa hama tuna ba nairu ngàndikai Ngahuna i Ala. Màtawa kai rimangu mànu dàngu àmbi tamaï-du. Hamayangu mànu ndumada mbuu ndàba banjaru-na i Ala. 19Dàngu hamayangu-wa ndumanggu nyunggambu, ka pekuna nyungga ba talànga kareuku-nggu, i Ala ka nawua-nggaha da panii da ma-jàngapu. Dàngu ka peku toru mbeninggu pa-bunggahu-ya na pa-kàpingu la Lii Mànangu. 20Nadu ba lumuna na Lii Mànangu nunadu hi tuka wunangu nyungga, tàka nàhu nyungga ningga la uma kapàtangu. Hamayangu-wa ka peku toru mbeninggu papanii-ya na rukuna na Lii Mànangu, hama tuna na ràka papanii wànggu.
Na lii malangu la njàpuna
21I Tihiku angu dedinda, na ma-tuturu la lumunya na paràma-na i Miri, nyunaka duna napa na mapeka-nggaiha mbuu ndàbana na ngeranggu nyungga, kai pinya jàka nggàra ehinggu dàngu jàka nggàra ulanggu. 22Nunaya na pakiri-na hi ku-palewa-ya nyuna lai nyimi, la papeka-nggai nyimi mbuu ndàbami jàka nggàra ehima nyuma, ka peku nggaüru wànguda da etimi.
23Màla àruki i Ala na Ama, dàngu i Miri Yehu Karitu ka na-wuangu ngia papeku-na nggubulu-da da kabungguru ka da-pambulungu dàngu ka da-kawàra pa-mbuhangu màlai ka da-padaingu la papawai lai Karitu. 24Màla àruki i Ala ka na-pakanyuru-kai angu dedi mbuu ndàbami mambuha-nya na Mirinda i Yehu Karitu wàngu mbuhangu na panda hilu pàda.
Matembi-kai, Paulu
دیاریکراوەکانی ئێستا:
EPIHU 6: KAM
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@LAI 1995 Indonesian Bible Society (Lembaga Alkitab Indonesia)