LUK 2
2
A voraana noi Jisas
(Mat 1.18-25)
1Lo taroki aia hini i Sisa* a hugwe nona ngwera Rom a hinana i Ogastas, aia u tuliki na leo kwara vae rana lai savi na hina na tangaloi takwa-hi mo hugwe korora. 2Hikani ramo lai a hina tomua halaradu lolona hi i Kwaerinias aia a kavman lakua lo vanua Siria. 3Lo taro aia hi a tangaloi savia rau mulemule vaki lo gwatugwatui-vanuaga kwara a tangaloi rana lai a hinaga. 4Vae i Sosev mo tiraki Nasaret lo vanua Galili* mo vano vaki Betlehem lo vanua Sutia, hinea a hugwe lakua i Devit mo vora eia. I Sosev u vano takwahini huri aia a gwaloana noi Devit. 5I rarua mai Meri raru vano kwara a tangaloi rana lai hinagaru. I Meri, aia hi i Sosev mo taubibia kwara ne laki maia, vae u tatagwangira. #Luk 1.27 6Lolona i rarua lo gwatuivanua Betlehem, a vulana mo rovo kwara ne hagovi i natuna. 7Vae a tanotano tikei lolo ingwa na maturua, hokinia raru mo vano vaki lo tanotano hinea rau tuku vanga boboroa eia. Vunu i Meri mo hagovi i natuna tomua halaradu, a natu ngwera. Mo vivihia lo lugwa, mo lulukinia lolo bokisi na duvu gorugoru kana boboroa. #Mat 1.25
A kaitagahuri na sivsivi mana kaihora tina taetae
8Takwa-hi a kaitagahuri na sivsivi rau hugu lo talutalu na boboroa bongi, rau tagahuri bulaga sivsivi. 9A kaihora tina taetae nona Hugwe mo maravuti kinira, a hahaviada nona Hugwe mo kwaka tiluga, vae aira rau mataku haburu. 10Vae a kaihora hi mo viti lakwara kwara, “Tulu hatu mataku, huri i nau nu vanamai kwara na viti na roro karea lakwakamu, aia hi ne lai a hahavutiana lakua lakwa na tangaloi savia. 11Lolo bongi hikani a nomiu Kaivakahi u vora lo gwatuivanua i Devit. Aia a Hugwe*, i Vurae* hinea i God u tuliki terekakinia tuai kwara ne vanamai. 12Hikani a kaivosangi lakwakamu. I kamu tulu ne hagwe na natu kelekele rau kakavua kina lugwa, u ngwalulu lolo bokisi na duvu gorugoru kana boboroa.” 13Heheriki a kaihora tina taetae rusa ramo maravuti kinira ramo kaho kaluhaki God, ramo viti
14“!Kaluhaki God
hinea lolo taetae aulu sea!
A magemuana lo varamana
lakwara hinea i God u lagwa maira.”
15Lolona a kaihora tina taetae ramo vano tiura ramo mule vaki lolo taetae taliku, a kaitagahuri na sivsivi vano hi ramo kwahakwaha kinira siboga ramo viti kwara, “De, ta vano vaki Betlehem ta tagai na kinau hi a Hugwe mo vitia lakwakita.”
16Vunu ramo vaivai heheri ramo vano, ramo hagwe i Meri mai Sosev, ramo tagai na natu kelekele hi u ngwalulu lolo bokisi na duvu gorugoru kana boboroa. 17A kaitagahuri na sivsivi ramo tagaia, ramo viti na leo hi a kaihora tina taetae mo vitia huri na natu kelekele hi. #Luk 2.10-12 18A tangaloi savia ramo rongo na leo hi a kaitagahuri na sivsivi ramo vitia lakwara, rau idila haburu. 19Vae i Meri u domidomi-bibi na kinau vunuhia aira vano hi, u kwiribibira lolo domina. #Luk 2.51 20Hikani a kaitagahuri na sivsivi ramo mule taliku rau kaho kaluhaki God huri na kinau savia hinea ramo rongo ramo taga, hokinia hini a kaihora tina taetae mo viti lakwara.
Ramo tau na hina i Jisas
21A rani kaikwaluki mo maravuti aia a taro na natu kwara rana vai na kaimatai* lo siosio luna. Ramo tau na hinana i Jisas*. A hina hi a kaihora tina taetae aia u taua tomuaki, vunu i Meri mori tatagwangira kinia. #a Jen 17.12; Lev 12.3; b Luk 1.59; d Luk 1.31
I Sosev mai Meri raru bete i Jisas lakwa na Hugwe i God lolo Vanua Kokona noi God
22A taroki mo taritarisa huri i Sosev mai Meri kwara raru ne vai a havakinau hini a Tangwata* noi Mosis mo viti, raru ne vai lo halaki hinea kwara vae i Meri ne ngwasara lo nako i God. Vae hokinia raru mo lavi na natu hi vaki Serusalem kwara raru ne betea lakwa na Hugwe i God, #Lev 12.3,6 23hokinia u uliana lo Tangwata nona Hugwe i God kwara, “Vunuhi na natu ngwera hinea a natu tomua, rana betera lakwa na Hugwe i God.” #Eks 13.2,12,15 24Vake raru vano kwara raru ne hile nogaru hura boniboni, a ngwaki kairua, diko a kwiba ngwalageloki kairua, hokinia a Tangwata hi mo viti. #Lev 12.8
25A ngwera katukwale u hugu Serusalem, a hinana i Simion. Aia a tangaloi bakoto u mavaki God. U tuku hugu tara na taro aia hi kwara vae i God ne vakahiki na gwaloana noi Isrel*. A Tanungwe Kokona aia maia. #Aes 40.1; 49.13 26I Simion u kikilai bakotoki lalahi na Tanungwe Kokona kwara aia nehe mate tea, vae tarisaki hi ne tagai i Vurae* hinea a Hugwe i God mo tuliki terekakinia. 27A Tanungwe Kokona mo lavia vaki lolo Vanua* Kokona noi God. Vunu a tama mana retahi raru mo lavi na natu hi i Jisas vaki lolo Vanua Kokona noi God, kwara raru ne vai a havakinau lakwae hokinia hi a Tangwata mo viti. 28Vae lo taro hi i Simion mo kwali hakeki na natu hi lo kabana, mo lagwakinia lakwai God mo viti
29“Hugwe,
hika i nigo ku kwiribibi na nomu tulikileo.
I nau a nomu kaihora,
ko tirakiau na mule lo magemuki,
30huri nu taga kina matagu kareaki
a tangaloi hinea kona lalahia
kwara kona vakahiki na tangaloi rusa.
31A tangaloi hi, komo tau raraia
lo livuka na tangaloi vunuhira. #Aes 40.5; 52.10; Luk 3.6; Taet 2.11
32Aia a leleha hinea ne vosangi na halamu
lakwa na tangaloi tavalavarea tina gwaloana noi Isrel,
ne tabe hakeki na hina na nomu tangaloi
a gwaloana noi Isrel.” #a Aes 42.6; 49.6; b Aes 46.13
33A tama mana retahi na natu hi raru idila haburu kina kinau aira vano hi i Simion mo viti huri na natu hi. 34Vunu i Simion mo kwahakwaha tabetabeki maira mo viti kwara, “I God ne vai tabetabekikamu.” Vunu mo kwaha mai Meri, a retahi na natu hi, mo viti kwara, “A natu hikani i God u taua huri kwara vae ne magaraki na gwaloana rusa noi Isrel, vunu rusa vake ne vakahikinira. Aia ne kwareki a kaivosangi ti God vae a tangaloi rusa rana kwaha bulakikinia, #Aes 8.14; 1 Kor 1.23; 1 Pita 2.8 35vae hokinia ne matangwasaraki na noga domidomi tavuniki tivarea. Vae i nigo kona rongo hati. A nomu rongohati ne hoki na bue u hoko lo gweregwereki ne keliko ne volohi na domimu.”
36-37A vavine duruduruki katukwale a hinana i Ana, i natu i Vanuel, u gwalo vanamai lui Asere. Lolona u ngwalagelo u laki vae u hugu a hukao kaibitu mai tuana ngwarasea. Vunu u gwati a hukao ngavu kaikwalu dongwaki kaivati. Hikani aia u ngwarasea haburu. #2.36-37: Lo hala kairuaki a domidomi na leo hi lo duviki kaitoluki maia kaivatiki na ves hi aia hokinia hika kwara, Vunu u gwati vae hikani u ngwarasea haburu, a hukaona ngavu kaikwalu dongwaki kaivati. Aia he tiraki na Vanua Kokona noi God te vohoki. U rani, u bongi, u kaluhaki God, u rete, u tiutangaroa vake. #1 Tim 5.5 38Lo taro hi nga mo maravuti mo hile lagwaana lakwai God, vake mo viti huri na natu lakwara doluaki hinea rau tuku hugu tara i God kwara ne kasatukuhi na ngwera Serusalem tina noga tavaluivuro. #Aes 52.9
Ramo mule taliku vaki Nasaret
39Hokinia raru mo vai vunuhi na kinau hinea a Tangwata* nona Hugwe i God mo viti, vunu ramo mule taliku vaki Galili* vaki lo noga tokakivanua Nasaret. #Mat 2.23 40A natu hi mo ngwarasea mo huira. U kikikila vohoki, u domi sea, vae tigwaravu i God u vai tabetabekinia. #a Luk 2.52; b Luk 1.80
I Jisas mo vano vaki lolo Vanua Kokona noi God lolona aia a natu radu nga
41Vataha na hukao i tama i Jisas mai retahina raru tuku vano vaki Serusalem huri na Kanikani* na Tivekiana. #Eks 12.24-27; Dut 16.1-8 42Lolona i Jisas a hukaona mo hangavulu dongwana kairua, ramo vano vaki lolo kanikani hokinia ramo toko vano tigwaravu. 43Hokinia a rani na kanikani mo rovo vunu raru mo tinakaki raru mo mule. Vae a natu hi i Jisas u hugu Serusalem. I tamana mai retahina raru he kikilai tea. 44Raru tuku domi kwara aia te hike maira rau mule haragoki. Hokinia raru mo lakao rani katukwale. Vunu raru mo soro haroa mai rabelagaru vake mai rabuluigaru, 45vae raru he hagwea tea. Hokinia mavukona raru mo mule taliku vaki Serusalem, raru mo soro haroa takwa-hi. 46Lo rani kaitoluki raru mo hagwea lolo Vanua* Kokona noi God, u hugu mana tangaloi huhui aira a gwaloana noi Isrel*. Mo rongohurira mo toko uduhuri a leo uduuduhuri rusa kinira. 47Vunuhira hinea ramo rongoa, rau idila haburu kina nona kikikila mana nona kaidaraki na leo, huri rau bakoto. 48I tamana mai retahina raru mo tagaia raru idila haburu. Vae i retahina mo kwaha maia mo viti kwara, “Mama. ?Kworoho komo vaikamirua kwehi? I kamirua mai tamamu keru rongo hati haburu keru mo toko soro haroko.”
49Mo daraki lakwararua mo viti kwara, “?Kworoho kuru mo toko soro haroau? ?Kuru he kikilai tea kwara i nau na va toko hugu lolo ingwa i Tamagu?” #Sione 2.16 50Vae raru he kikilai tea kwara u viti a havakinau lakwararua.
51Vunu i Jisas mo hurirarua taliku vaki Nasaret, mo hugu tavutigaru takwa-hi. I retahina u kwiribibi savi na kinau aira vano hi lolo domina. #Luk 2.19 52Vae i Jisas mo ngwarasea hake lo tarabehina mana nona kikikila. I God u lagwa maia, a tangaloi rau lagwa maia vake. #1 Saml 2.26; Prov 3.4; Luk 1.80
دیاریکراوەکانی ئێستا:
LUK 2: HWT
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Havakinau New Testament © Bible Society of the South Pacific, 2016.