စံးထီၣ်ပတြၢၤ 66
66
တၢ်စံးထီၣ်ပတြၢၤဒီးတၢ်စံးဘျုးစံးဖှိၣ် အတၢ်သးဝံၣ်
1စံးထီၣ်ပတြၢၤကစၢ်ယွၤလၢတၢ်သူၣ်ဖှံသးညီ
အတၢ်ကိးထီၣ်တက့ၢ်.
ပှၤကလုာ်ခဲလၢာ်သ့ၣ်ဧၢ.
2သးဝံၣ်ထီၣ်အမံၤအလၤကပီၤ,
ဟ့ၣ်ထီၣ်အီၤလၢတၢ်လၤကပီၤ
အတၢ်စံးထီၣ်ပတြၢၤန့ၣ်တက့ၢ်.
3စံးဘၣ်ကစၢ်ယွၤ, “နမၤတၢ်တဖၣ်န့ၣ်
မ့ၢ်တၢ်ပျံၤအလီၢ်ဆံးဒိၣ်လဲၣ်.
လၢနစိဒိၣ်ကမီၤထီအဃိန့ၣ်,
နဒုၣ်နဒါတဖၣ်ဆီၣ်လီၤအသးလၢ
နခီၣ်ထံးမဲာ်ညါလီၤ.
4ပှၤဟီၣ်ခိၣ်ဖိခဲလၢာ်ဘူၣ်ထီၣ်ဘါထီၣ်နၤ,
သးဝံၣ်စံးထီၣ်ပတြၢၤနၤ,
သးဝံၣ်စံးထီၣ်ပတြၢၤနမံၤန့ၣ်လီၤ.” စ့လၤ
5ဟဲဒီးကွၢ်တၢ်လၢကစၢ်ယွၤမၤတ့ၢ်န့ၣ်တက့ၢ်.
အဝဲမ့ၢ်တၢ်ပျံၤအလီၢ်လၢ
အတၢ်မၤတဖၣ်လၢပှၤကညီအကျါန့ၣ်လီၤ.
6အဝဲဒုးကဲထီၣ်ပီၣ်လဲၣ်ဆူ ခိဒီးပမိၢ်ပၢ်ဖံဖုတဖၣ်
ခီဂာ်ထံကျိလၢအခီၣ်လီၤ. ဒီးအဝဲသ့ၣ်သးခုလၢ
တၢ်လၢယွၤမၤတ့ၢ်ဝဲအဃိန့ၣ်လီၤ.
7ပၢတၢ်အစိၤစိၤအဃၣ်ဃၣ်လၢအစိအကမီၤလီၤ.
အမဲာ်ကွၢ်ထံပှၤကလုာ်တဖၣ်လီၤ.
မ်ပှၤပူထီၣ်တၢ်ဖိတဖၣ်
အသုတပာ်ထီၣ်ထီအသးတဂ့ၤ. စ့လၤ
8ပှၤကလုာ်ခဲလၢာ်သ့ၣ်ဧၢ, စံးထီၣ်ပတြၢၤပကစၢ်ယွၤ,
မ်သုတၢ်စံးထီၣ်ပတြၢၤအသီၣ်ဟူထီၣ်တက့ၢ်.
9ပၢၤဃာ်ပသးလၢပှၤမူသ့ၣ်တဖၣ်အကျါ
ဒီးတဟ့ၣ်ပခီၣ်လီၤတလံာ်ဘၣ်.
10ကစၢ်ယွၤဧၢ, အဂ့ၢ်ဒ်အံၤ, နမၤကွၢ်တ့ၢ်လံပှၤလံ.
နမၤပှံၢ်တ့ၢ်လံပှၤ ဒ်စ့
ဘၣ်တၢ်မၤပှံၢ်အီၤအသိးန့ၣ်လီၤ.
11နဒုးလဲၤနုာ်တ့ၢ်ပှၤလၢပှာ်ဧိၤစၤဧိၤအပူၤ,
နပာ်တၢ်ဖှီၣ်လၢပယီၢ်ဒ့အလိၤ,
12နပျဲပဒုၣ်ပဒါတဖၣ်ယီၢ်တံၢ်ပှၤ,
ပလဲၤခီဖျိမ့ၣ်အူဒီးထံ,
ဘၣ်ဆၣ်ခဲအံၤနဟဲစိာ်ပှၤဆူ
တၢ်ပူၤဖျဲးအလီၢ်န့ၣ်လီၤ.
13ယကဟဲဆူနဟံၣ်ပူၤဒီးတၢ်လုၢ်မ့ၣ်အူတဖၣ်,
ယကဟ့ၣ်ထီၣ်နၤလၢယတၢ်ဆိၣ်သ့ၣ်တဖၣ်,
14လၢအထီၣ်ဖျဲးလၢယနိးဖံးတဖၣ်,
ဒီးယထးခိၣ်အၢၣ်လီၤဖဲ
ယဘၣ်တၢ်ကိၢ်တၢ်ဂီၤန့ၣ်လီၤ.
15ယကလုၢ်ထီၣ်
တၢ်လုၢ်မ့ၣ်အူလၢ ဆၣ်ဖိကီၢ်ဖိတဖၣ်ဆူနၤ,
ဒီးတၢ်ဆိၣ်ကဲၤနၢမူဘၣ်ဃးဒီးသိဖါတဖၣ်,
ယကလုၢ်ဂီၤဖံးဖါဒီးမဲာ်တဲးလဲးတဖၣ်လီၤ. စ့လၤ
16ပှၤလၢအပျံၤကစၢ်ယွၤခဲလၢာ်သ့ၣ်ဧၢ, ဟဲကနၣ်တက့ၢ်.
ဒီးယကတဲတၢ်လၢအမၤတ့ၢ်ဝဲလၢယဂီၢ်န့ၣ်လီၤ.
17ယကိးထီၣ်ဆူအအိၣ်လၢတၢ်မၤစၢၤအဂီၢ်,
ယစံးထီၣ်ပတြၢၤအီၤလၢတၢ်သးဝံၣ်တဖၣ်လီၤ.
18ယမ့ၢ်ပာ်ကဲတ့ၢ်တၢ်အၢလၢယသးကံၢ်ပူၤဒီး
ယွၤတဒိကနၣ်ဘၣ်ယၤဘၣ်.
19မ့မ့ၢ်ကစၢ်ယွၤကနၣ်လံဝဲလံ. အဝဲဒိကနၣ်တ့ၢ်လံဝဲ
ယတၢ်ထုကဖၣ်အကလုၢ်န့ၣ်လံ.
20စံးထီၣ်ပတြၢၤကစၢ်ယွၤတက့ၢ်. အဂ့ၢ်ဒ်အံၤ
တဃၣ်ဒူချၢအသးလၢယတၢ်ထုကဖၣ်ဘၣ်
ဒီးတသုးကွံာ်အတၢ်အဲၣ်ဂၢၢ်ကျၢၤလၢယၤဘၣ်.
دیاریکراوەکانی ئێستا:
စံးထီၣ်ပတြၢၤ 66: KSWC
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sgaw Karen Common Bible © Bible Society of Myanmar, 1992.