စံးထီၣ်ပတြၢၤ 65
65
တၢ်စံးထီၣ်ပတြၢၤဒီးတၢ်စံးဘျုးစံးဖှိၣ်
1ကစၢ်ယွၤဧၢ, ဂ့ၤဝဲလၢပကစံးထီၣ်ပတြၢၤနၤလၢစံယိၣ်
ဒီးပၢၤဃာ်ပတၢ်အၢၣ်လီၤဒီးနၤ,
2မ့ၢ်လၢနစံးဆၢပတၢ်ထုကဖၣ်အဃိန့ၣ်လီၤ.
ပှၤကလုာ်လၢလီၢ်ကိးပူၤဒဲးကဟဲဆူနအိၣ်,
3လၢအတၢ်ဒဲးဘးတဖၣ်အဃိန့ၣ်လီၤ.
ပတၢ်ကမၣ်တဖၣ်မၤနၢၤပှၤ
ဘၣ်ဆၣ်နပျၢ်ပတၢ်ကမၣ်လီၤ.
4ပှၤလၢနဃုထၢအီၤ,
ပှၤလၢနဟဲစိာ်အီၤဆူနလီၢ်စီဆှံအပူၤ
ဒ်သိးကအိၣ်ကဆိးဘၣ်ဝဲအဂီၢ်တဖၣ်န့ၣ်
ဘၣ်ဆိၣ်ဂ့ၤဝဲလီၤ.
ပကသူၣ်မံသးမံလၢတၢ်ဂ့ၤတဖၣ်လၢနဟံၣ်ပူၤ,
နတၢ်လုၢ်ဟံၣ်စီဆှံအတၢ်ဆိၣ်ဂ့ၤဆိၣ်ဝါတဖၣ်န့ၣ်လီၤ.
5နစံးဆၢပှၤခီဖျိနဟ့ၣ်ပှၤတၢ်မၤနၢၤ
ဒီးနမၤတၢ်လီၤလးတဖၣ်လၢပတၢ်ပူၤဖျဲးအဂီၢ်လီၤ.
ပှၤကလုာ်လၢဟီၣ်ခိၣ်ချၢခဲလၢာ်
ဒီးလၢပီၣ်လဲၣ်ပီၣ်တြီၤသ့ၣ်တဖၣ်
သန့ၤအသးလၢနၤလီၤ.
6နပာ်လီၤကစၢၢ်ကလိသ့ၣ်တဖၣ်လၢအလီၢ်ဒၣ်ဝဲ
ခီဖျိနဂံၢ်နဘါ,
ပာ်ဖျါထီၣ်နတၢ်စိတၢ်ကမီၤဖးဒိၣ်န့ၣ်လီၤ.
7နဒုးအိၣ်ဘှီၣ်ပီၣ်လဲၣ်အသီၣ်
ဒီးလပီတဖၣ်အသီၣ်,
ပှၤဂီၢ်မုၢ်အတၢ်တၢထီၣ်တၢလီၤန့ၣ်လီၤ.
8ဟီၣ်ခိၣ်ဒီဘ့ၣ်ညါကမၢကမၣ်ဝဲလၢတၢ်မၤဖးဒိၣ်တဖၣ်
လၢနမၤတ့ၢ်အဃိန့ၣ်လီၤ.
နတၢ်မၤတဖၣ်ဒုးအိၣ်ထီၣ်တၢ်ကိးပသူ
လၢမုၢ်ထီၣ်တုၤလီၤလၢမုၢ်နုာ်န့ၣ်လီၤ.
9နဒုးနဲၣ်ဖျါထီၣ်နတၢ်အံးထွဲကွၢ်ထွဲဟီၣ်ခိၣ်ခီဖျိ
နဒုးဟဲစူၤလီၤမူခိၣ်,
နမၤအါထီၣ်ဟီၣ်ခိၣ်ညၣ်ထ့ၣ်န့ၣ်လီၤ.
နမၤပှဲၤထံကျိဖိတဖၣ်လၢထံ,
နကတဲာ်ကတီၤဟီၣ်ခိၣ်လၢ
တၢ်မုၢ်တၢ်ဘိတဖၣ်လီၤ.
တၢ်အံၤမ့ၢ်တၢ်လၢနမၤဝဲန့ၣ်လီၤ.
10နဒုးဟဲစူၤလီၤမူခိၣ်အါအါကလဲာ်လၢပျီပူၤ
ဒီးမၤဘၣ်စီၣ်အီၤလၢထံန့ၣ်လီၤ.
နမၤကဘုးလီၤဟီၣ်ခိၣ်ခီဖျိတၢ်စူၤ
ဒီးဒုးဒိၣ်ထီၣ်တၢ်မုၢ်တၢ်ဘိတဖၣ်န့ၣ်လီၤ.
11နတၢ်ဂ့ၤတၢ်ဝါဟ့ၣ်ထီၣ်တၢ်ကူးက့ၤအထူးအတီၤ,
ဖဲနလဲၤတပူၤလၢ်လၢ်န့ၣ်တၢ်အိၣ်လၢအိၣ်ပှဲၤလီၤ.
12တၢ်အီၣ်ဆၣ်အလီၢ်တဖၣ်ပှဲၤဝဲဒီးသိအဖုတဖၣ်,
ကစၢၢ်ကလိတဖၣ်ပှဲၤဒီးတၢ်သးခုန့ၣ်လီၤ.
13စံာ်ပျီတဖၣ်ဘၣ်တၢ်လုၣ်ဘၢအီၤလၢ သိတဖၣ်
ဒီးတၢ်ပၢၤခိၣ်န့ၣ်အိၣ်ပှဲၤဒီး
ဘုဧိၤဟုဧိၤလီၤ.
အဝဲသ့ၣ်ကိးပသူထီၣ်ဒီးသးဝံၣ်သကိးတပူၤဃီလၢတၢ်သးခု အဃိန့ၣ်လီၤ.
دیاریکراوەکانی ئێستا:
စံးထီၣ်ပတြၢၤ 65: KSWC
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sgaw Karen Common Bible © Bible Society of Myanmar, 1992.