Mumpar 49
49
Jekɔb swee andɛɛɡa tɛ o bibaala
1Jekɔb yerɛ o bibaala asɛ dɛ ŋɔ, “Hé bwa ba cheme, ásɛ n baɡle heyaa waa aa dɛ ba he nɛɛ bala kerekere.
2Hé bwa ba cheme dɛ no.
Hé ba no he mɛɛ Jekɔb wa.
3Rubin haa ɛ n binyoa nɔ,
henee n kpeɡri.
Henee n tɔ sie lolɛ
n bonɔɔne saŋ,
dɛ dɔ jirima ne bokpeɡa
ɡwaa n bii bwa.
4He we-ɛɛla do kɛŋɔ nehɛma,
he jirima tonɔ.
Dɛkalkɛ he lawɛ n hanɛɛte
chɔ n chɔɔbɔr,
dɛ kpɔ doŋa kah mɛ.#1We 5:1
5Simeon ne Lewi ɛ nimanar.
Ba kpɔ ba dɔmkwaa
dɛɛ ba yoi ne.
6Maa ba nɛɛ ja ba
wobɛlbwa baa vɔrɔwe ta.
Ba baah diu waa,
ba dɛ kpoo nɛra,
dɛɛ ŋwɛne nae ɡe nakpale
pɛɛpɛɛ á bɛ won valɛ.
7Ba bandia ne ba nyubinikpeɡ
nomanta, bá bwɛɛlɛ!
Mɛɛ lɔ ba naanaree
peɡre Israel harɛ bwa.
Dɛ laɡ ba le ba nɛra bini.
8Juda, he dɔɔranar ɛɛ duurii,
ásɛ he nɔn dawɛ
he dɔma nɛ.
He dɔɔranar ɛɛ ba ɡuŋi
he siee.#1We 5:2
9Juda do kɛŋɔ nyujente ken.
Kpaahna taa he che dɛ kpeɡ.
O chɔ harɛ kɛ nyujente aa,
umee dɛ wonu wɔ?
10Koodaŋɡbala aa o nɔn ta
lee ba,
mmarare doe ɡe
aa o habɔɔ le,
ásɛ harɛre nɛra
kpɔ koŋkɛɛla baa tɛo,
dɛ́ ba ɡuŋi o sie dɛɛ duuru.
11Daa baa kpɔ o nɔna dɛɛ ɛ
sen la taa wɛɛ ba
o keeɡo bie lawa vɔwɛ.
A sen nee wɛɛ ba o laala chɛɡa.
12Sen ɛɛ ɡeloo o sibie swɛɛ,
ásɛ na-elne kohona
ɡe ɡel o nyena to.
13Sebulon sobɔree mpo nyoa,
o jwɛh ka tel Sidon,
ásɛ stiimaere che bela
wobɛlbwa aa wola an ɛ.
14Isaaka do kɛŋɔ keeɡo ɡwaŋe,
dɛ chɔ o bone baah ta,
15o nao kɛŋɔ bela
waa dɛ ba ona la ɛ
bodɛɛɡe asɛ silɛɛ do bela aa,
wɛɛ kpɔ vaamaa lɛa,
dɛ́ kpɔ o te tɛ tomkpeɡa.
16Dan ɛɛ ba nyiŋi o nɛra nɛɛ.
Baa doo kɛŋɔ
Israel deene aa kaa la.
17Wɛɛ ɛɔ kɛŋɔ domkpule,
dɛ́ chɔ ŋwɛnɛ nyoa,
dɛ́ choɡe jaaɡɔ nakpala,
ásɛ nɛn waa soɡe o ta la
ka le habɔɔ.
18N Naa Korowii,
n soɡoo dɛɛ kpa kɛŋɔ
he ba dɛ́ ba lɛ yaa.
19Ŋwɛɛra ɛɛ bao dɛ́ ba yo Gad.
Kɛ o ɡe ɛɛ berɔ teŋɛ
ba nɛɛ dɛ́ yoo ba.
20Aasa harɛ ɛɛ ɛ kondikondɛɛɡaa,
wɛɛ kpɔ anɔ la
aa dɔ pɛlaa ka tɛ kooro.
21Naftale ɡe ɛɛ doo kɛŋɔ welo
waa kpaŋa dɛ chwa
dɛɛ kaa.
Wɛɛ lolɛ bii ba do wer.
22Josef ɡe do kɛŋɔ daa
waa won nɔna kohona,
dɛ che nee nyoa,
o kpala ɛɛ teeh danjwɛɛ.
23O dɔma ɛɛ ba yoo
á do kpeɡri,
dɛ́ teŋɛ o nɛɛ dɛɛ tao hɛma.
24Nemenɛ Korowii,
o mɛɛ Jekɔb Kpeɡnɛn
waa tomɔ nomanta,
wɛɛ do kpeɡrii dɛ́ kpoŋe
o to bini kiŋkiŋ.
Peteɡre waa dɛ lɛ Israel tena,
dɛ do kɛ Bwetal laanee
dɛ́ chao.
25Korowii he mɛɛ aa tomɔ
laanee dɛ́ chae.
Korowii Waa Ɛ Kpeɡri Bwa Dɔɔ
sweere andɛɛɡa dɛ́ pili
nyundua bwaala nɛ tɛɛ,
dɛ́ tɛɛ nee aa le harɛ bini.
Onee dɛ́ tɛɛ kondɛɛra
ne naanar kohona.
26He naawa sweera
baa sweera tɛ he mɛɛ la
ɡwaa kondɛɛɡa
haa dɛ naa deŋɡarere dor.
Korowii le Josef cheɡ
dɛ tɛo a ɡɛ hɛɛra nɔ
a dawɛ o tile ta,
dɛkalkɛ o ɡwaa o dɔɔranar.
27Bɛnjamen do kɛŋɔ noniete
o sie aa beɡre ol lawa dɛ́ di.
Chɔɔ ne jɔmɔra bwaa
o te ɛɛ kpoo ola dɛɛ dia.”
28Gɛɛ Israel deene fi dɛ anɛ la waa do. Gɛɛ ba mɛɛ Jekɔb bol ɡɛ saŋ waa sweera tɛɛ ba la.
Jekɔb seo ne o huɡa wa
29Ate, Jekɔb berɛ ŋɔ o bii la be ŋɔ, “Taraken, n dɛ ba sewa. N baa sewaa, hé ka huɡ mɛ n mɛɛwa huɡri bɔr o fa aa lɔ Hiti te Efron koo ta. 30Makpɛlaa o do, o bɛne Mamre waa lɔ Keenan harɛ ta. Abraham yawɛ a ɡɛ bɔr nɔ ne koo la le Efron be o ɛ ba huɡri bɔr. 31Belaa ba huɡe Abraham ne o haah Saara. Dɛ huɡe Aesek ne o haah Rebɛka ɡe. Belaa n huɡe Lea ɡe. 32Koo la ne bwebɔɔ waa lɔ o ta la, yawaa n naa Abraham yawɔ le Hiti tena be. Hé huɡ mɛ bela.”
33Jekɔb aa bol o waa bwa tonɛ o bii la be la, o kpɔ o nyu bil kapuri ta dɛ sewɛ.
دیاریکراوەکانی ئێستا:
Mumpar 49: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.