Mumpar 45
45
Josef baɡle o nɛnsoo
1Josef ta wone lawɛ o te o bonɔɔna la sie, o kpɔ takpeɡ ŋɔ ba be ŋɔ nomɛlbwa le buse, asɛ dɛ kpɔ o te baɡle o dɔɔranar la. 2O wio kohona, asɛ Ijipt harɛ tena la no, kooro dem tena la bwa no. 3A habɔɔ la, Josef ŋɔ o dɔɔranar la be ŋɔ, “Menee Josef. N mɛɛ ta lole naa?” Waa bɔɔ ba ɡɛ la, ba ta wone chaŋe wobɛlbwa, dɛkalkɛ ɔmee laɡ ba. 4Anee o ŋɔ ba be ŋɔ, “N poo heya, hé suuh tel mɛ.” Baa suuhna telo la, asɛ o ŋɔ, “Menee he nime Josef haa yoɡ mɛ tɛ Ijipt tena la. 5He bɛ ɡel a we he nɛ, he bɛ he te pwah kɛŋɔ haa yoɡ mɛ. Korowiirii cheɡa ɡɛ dɛ lee mɛ, n tɔ he sie dɛ́ ba lɛ nɛra mkpa. 6Lɔr nɔ bene anɛɛ la. A ta ka bene anue nomɛlbwa aa wola won du kwaa a ba ɛ kɛŋɔ wɛɛ dɔ kondikwaa. 7Korowiirii cheɡa ɡɛ, dɛ lee mɛ ŋɔ n tɔ he sie, dɛ́ ba lɛ heyaa ɡɛ nyokpoa ŋwɛnɛ nɔ ta, ásɛ he ne he naanar dɔ mkpa. 8He laa ba n ne bonɔ, Korowiirii ba n ne. Onee ɛɛ mɛ nomonjen n ja kooro nɛɛ dɛɛ nyiŋi o dem tena ne Ijipt harɛ bwa ta.
9He ɛ warane ka ŋɔ n mɛɛ be ŋɔ men o bie Josef ŋɔ, ‘Korowii ɛɛ mɛ nomonjen Ijipt harɛ bwa ta.’ Ó ba n be warane. 10Ó ba, dɛ́ ba so Gosen waa lɔ Ijipt harɛ nɔ ta dɛ́ bɛn mɛ. Ó kpɔ o bii ne o naanar ne peera ne boohna, ne o nae dɛ komɛlbwa waa dɔa ba. 11O baa so Gosen aa, anee mɛɛ ba wona nyiŋu. Lɔr nɔ ta ka bene anue, anomanta, maa nyin kɛŋɔ lɔr kpo o ne o bii ne kondɛɛra.”
12O berɔ ŋɔ, “Taraken, he ne Bɛnjamen bwa nao kɛŋɔ menee dɛɛ bol waa he be la. 13He ka ŋɔ n mɛɛ be n kpeɡri maa dɔɔ Ijipt harɛ ta bonɔ, ne wobɛlbwa haa naa bonɔ bwa, ásɛ dɛ ɛ warane, dɛ́ kpɔɔ ba n be bonɔ.”
14Belaa o kpɔ o nɔɔra dawɛ o nime Bɛnjamen vaama ta dɛ wi, asɛ o ɡe lawɔ pɛl o te dɛɛ wi. 15O mo o dɔɔranar la lwɛrɛme dɛ wi. Asɛ a habɔɔ o ne ba bol wa.
16Baa no koodem kɛŋɔ Josef dɔɔranar balɔ la, kooro ne o nomonome bwa sie lɛo. 17Asɛ kooro ŋɔ Josef be ŋɔ ó ŋɔ o dɔɔranar la be ŋɔ bá kpɔ ba bone la dawɛ keeɡore la ta, ásɛ dɛ berɛ kaa Keenan harɛ ta, 18dɛ́ ka kpɔ ba mɛɛ ne ba bii ne ba dem tena bwa ba Ijipt harɛ ta. Dɛ́ wɛɛ tɛɛ baa bela waa wera Ijipt harɛ ta bonɔɔ, ásɛ ba dɔ komɛlbwa baa dɛ nyin. 19Berɛ ŋɔ ba be ŋɔ bá kpɔ kwaa aa dɔ tɔre baa taɡa kɛ torɔɡo ba vɔwɛ pɛl jaɡre, dɛ́ ka kpɔ ba haahna ne bii, dɛ́ kpɔ ba mɛɛ ɡe ba. 20Ba bɛ komɛlbwa waa lii a we ba nɛ. Kondɛɛɡa aa lɔ Ijipt harɛ ta la bwa ɛ ba kwa.
21Anomanta, Jekɔb bii la ɛ ɡɛ baa bol ba be la bwa. Josef kpɔ torɔɡore baa vɔwa pɛl jaɡre la ane tɛɛ ba ɡɛ kooro aa bola la. Asɛ dɛ tɛɛ ba kondikwaa baa di ŋwɛnɛ ta ɡe ja. 22O berɔ tɛ ba bini bɛlbwa laalafala, dɛ tɛ Bɛnjamen te suuɡapoŋa lafraatoro ne laalafala bele anue. 23Dɛ kpɔ Ijipt harɛ laala aa wera kohona tɛ ŋɔ ba ka tɛ o mɛɛ, keeɡore fii cheɡaa, asɛ keeɡoneenanar fi ɡe che boyu ne kondikwaa bwa soo siwi waa di ŋwɛnɛ ta dɛ́ berɛ ba. 24O kaa do o dɔɔranar ŋwɛnɛ asɛ baa dɛ kaa la, o ŋɔ ba be ŋɔ, “Hɛɛ berɛ ka yoi ŋwɛnɛ ta noo!”
25Ba le Ijipt harɛ ta dɛ ba Keenan harɛ ta ba mɛɛ be. 26Baa tel ba mɛɛ be dem la, ba bol o be ŋɔ, “Josef ta lole! Onee dɛɛ nyiŋi Ijipt harɛ ta.” Baa bol ɡɛ o mɛɛ be la, o nyoa kpoo, o ta ɡɛ waa ɛ nae.
27Kɛ baa bol waa Josef aa bol ba be baɡlo o no, dɛ na kwaa aa dɔ tɔre baa taɡa kɛ torɔɡo ba vɔwa pɛl jaɡre, Josef aa kpɔa tɛɛ ba ŋɔ bá kpɔ ba kpɔɔ ba Ijipt la, o berɔ wɛr. 28Asɛ o ŋɔ, “Anɔɔ mɛɛ nyin dɛ́ no. N bie Josef ta lole! Mɛɛ lao ka nao mɔɔ dɛ́ sewɛ.”
دیاریکراوەکانی ئێستا:
Mumpar 45: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.